നിഴലായ് അരികെ 12

Author : ചെമ്പരത്തി

[ Previous Part ]

 

&nbsp

ഒരു നിമിഷത്തെ പകപ്പിനു ശേഷം നന്ദൻ സമനില വീണ്ടെടുത്ത് അമ്മക്ക് നേരെ തിരിഞ്ഞു…..

 

“നിങ്ങൾക്കൊക്കെ എന്താ എന്നാ എനിക്കു മനസിലാകാത്തത്…… ആരെങ്കിലും എന്തെങ്കിലും പറയുന്നത് കേട്ട് ഞങ്ങളോട് ചാടാൻ തുടങ്ങുന്നേ…… ഓർമ വച്ച നാൾ മുതൽ ഒപ്പം നടക്കുന്നതാ ഇവൾ ഒരു നിഴലുപോലെ…. ഇന്നേവരെ ഞങ്ങളെ അറിയുന്ന  ഒരാളും പറയാത്ത ഒരു കാര്യം നിങ്ങൾക്ക് എങ്ങനെ വിശ്വസിക്കാൻ  തോന്നി…. കോളേജിൽ ഉണ്ടായ പ്രശ്നങ്ങൾ  നിങ്ങളോട് പറഞ്ഞു നിങ്ങളെ കൂടി ടെൻഷൻ അടിപ്പിക്കണ്ട എന്ന് കരുതിയിട്ടാ പറയാതിരുന്നത്…. ആ കുട്ടികൾക്കെല്ലാം കാര്യം എന്തെന്ന് മനസിലായി….. പക്ഷെ നിങ്ങൾ…….. ”

 

സ്വരം ഇടറിയിട്ട് നന്ദൻ ഒന്ന് നിർത്തി

 

“ഇവൾ ഉണ്ടായതിനു ശേഷം ആണ് നിങ്ങൾ,  എനിക്ക് വേറെ മകൾ വേണ്ട ഒരു മകളായി ഇവൾ ഉണ്ടല്ലോ എന്നും പറഞ്ഞു വേറെ ആരെയും വേണ്ട എന്ന് വച്ചതു…. എന്നൊക്കെ  പലപ്പോഴും ഇവിടെ പറയുന്നത് കേൾക്കാമായിരുന്നല്ലോ…… ഇപ്പോൾ എന്തെ…. മകൾ അല്ലാതായോ??? അതോ അവൾ പറയുന്നത് വിശ്വാസം ഇല്ലാതായോ….. അതെങ്ങനെയാ സ്വന്തം രക്തം അല്ലാത്തപ്പോൾ എപ്പോ വേണമെങ്കിലും വാക്ക് മാറാമല്ലോ…..മകൾ  അ……”

 

 

എന്നാൽ പറഞ്ഞു പൂർത്തിയാക്കുന്നതിനു മുന്നേ വസുന്ധരാമ്മയുടെ കൈ നന്ദന്റെ കരണം പുകച്ചിരുന്നു…..

 

പകച്ചു അമ്മയെ നോക്കിയ നന്ദൻ അടികിട്ടിയ കവിൾ പൊത്തിനിന്നു…

 

“അമ്മേ…. വേണ്ട……… നന്ദനെ തല്ലല്ലേ…… ”

 

ആര്യ കരഞ്ഞു കൊണ്ട് നന്ദന്റെയും അമ്മയുടെയും ഇടയിൽ കയറി..

 

“മോള് മാറി നിൽക്ക്……. ”

 

വസുന്ധരാമ്മ അവളെ ബലമായി മാറ്റിനിർത്തിയിട്ട്  നന്ദന്റെ ഷർട്ടിൽ പിടിച്ചു ഉലച്ചു….

 

“നീ…. നീ എന്താ പറഞ്ഞെ… അവൾ…അവൾ  എന്റെ മോൾ അല്ലെന്നോ..??  എന്റെ മകൾ തന്നെയാണിത്… ഞാൻ വളർത്തിയ എന്റെ മോളാണിവൾ…….