നിഴലായ് അരികെ -12 [ചെമ്പരത്തി] 378

റൂമിൽ കയറിയ ആര്യ, തന്റെ പുറകിൽ വാതിൽ അടയുന്നത് കണ്ട് ഒരു നിമിഷം പകച്ചു നിന്നു.. സമനില വീണ്ടെടുത്തു വാതിൽ തുറന്നു പുറത്തിറങ്ങിയപ്പോഴേക്കും  അടുത്ത റൂമിന്റെ വാതിൽ അടയുന്നത് ഒരു മിന്നായം പോലവൾ കണ്ടു… ഓടി വാതിൽക്കൽ എത്തി, വാതിലിൽ കൈ ചുരുട്ടി ഇടിക്കാനാഞ്ഞ അവൾ എന്തോ ഓർത്തപോലെ ചുറ്റും നോക്കിയിട്ട് വാതിലിൽ പതിയെ തള്ളി നോക്കി…

ലോക്ക് ആണെന്ന് മനസിലായ അവൾ പതിയെ പിന്തിരിഞ്ഞു, ഇടറിയ പാദങ്ങളോടെ നന്ദന്റെ റൂമിലേക്ക്‌ നടന്നു….

റൂമിൽ കയറി വാതിൽ അടച്ച ആര്യ ചുറ്റും ഒന്ന് നോക്കി… ഇന്നാദ്യമായി അവിടെ ഒരപരിചിതത്വം തന്നെ പൊതിയുന്നത് അവൾ അറിഞ്ഞു…. നെഞ്ചിൽ നീറുന്ന നോവണക്കാനെന്നവണ്ണം നന്ദന്റെ ബെഡിൽ കിടന്ന പില്ലോ വലിച്ചെടുത്തു നെഞ്ചോട് ചേർത്തിറുകെ പുണർന്നുകൊണ്ടവൾ വിതുമ്പിക്കരഞ്ഞു…..

പൊടുന്നനെ വാതിലിൽ മുട്ട് കേട്ടവൾ തിടുക്കത്തിൽ വാതിൽ തുറന്നു….. മുന്നിൽ നിന്ന, നന്ദന്റെ ആന്റിയെ കണ്ടതോടെ  അവളുടെ ഉള്ളിലൂറിയ സന്തോഷം എങ്ങോ പോയോളിച്ചു…..

ആന്റി അവളുടെ മേക്കപ്പും ആഭരണങ്ങളും എല്ലാം ഊരി മാറ്റാൻ സഹിയച്ചതിനു ശേഷം താഴേക്കു പോയി…

ഡോർ അടച്ചിട്ടു അവൾ ബെഡിലേക്ക് മറിഞ്ഞു…. ഇത്രയും ദിവസം തന്റെ ദുഃഖങ്ങൾ മാറ്റാൻ കഴിഞ്ഞിരുന്നൊരാ മെത്ത ഇന്ന് തന്റെ സങ്കടങ്ങളെ ഇരട്ടിപ്പിക്കുന്നതെന്തെന്നു ചിന്തിച്ചവൾ ആ കിടക്കയിലേക്ക് മുഖം പൂഴ്ത്തി….

തൊട്ടപ്പുറത്തെ മുറിയിൽ നന്ദൻ വെരുകിനെപ്പോലെ നടന്നു…. തല വെട്ടിപ്പൊളിക്കുംപോലെ തോന്നിയിട്ട് അവൻ നേരെ വാഷ്റൂമിലേക്ക് കയറി ഷവർ തുറന്നിട്ട്‌ കുറെ നേരം അതിനടിയിൽ നിന്നു…ഷവറിൽ നിന്നൊഴുകിപടർന്ന വെള്ളത്തിന് കൂട്ടായി മാറിയ ഒരു കണ്ണുനീർതുള്ളി എവിടേക്കോ ഒഴുകി മറഞ്ഞു….

വൈകുന്നേരം 7 മണിയോടെ, തൊട്ടടുത്തു തന്നെ ഉള്ള ഓഡിറ്റോറിയത്തിൽ എല്ലാവരും എത്തിച്ചേർന്നു…..

ഗോൾഡനും മെറൂണും ഇട കലർന്ന ലഹങ്കയിൽ,ചെറു മേക്കപ്പും, വളരെ കുറച്ചു ആഭരണങ്ങളും ഇട്ട ആര്യയുടെ സൗന്ദര്യം ജ്വലിച്ചു നിന്നു….

ലഹങ്കക്ക് മാച്ച് ആകുന്ന ഷേർവാണി ആയിരുന്നു നന്ദന്റെ വേഷം….

ഇരുവരും കൂടി അവിടെ ഒരുക്കി വച്ചിരുന്ന കേക്ക് കട്ട്‌ ചെയ്തു, പരസ്പരം വായിൽ വച്ചു കൊടുത്തു….