ഒന്നും ഉരിയാടാതെ 42 [നൗഫു] 5992

“”എടാ.. നിന്റെ നാജിയുടെ നിക്കാഹ് വേറെ ഒരാളുമായി നടത്താൻ തീരുമാനിച്ചു…”” 

“”എന്താ.. എന്താ നീ പറഞ്ഞത്..”” 

അവൻ പറയുന്നത് എന്ത് തന്നെ ആയാലും അതുൾക്കൊള്ളാൻ മനസില്‍ സംഭരിച്ചു വെച്ചിരിക്കുന്ന ശക്തി മുഴുവൻ ചോർന്നു പോകുന്നത് അറിയാതെ ശരീരം തളർന്ന് പോകുന്നതിനിടയിൽ ഞാൻ ചോദിച്ചു…..

“”ഞാൻ കെട്ടിയ പെണ്ണിനെ.. ഞാൻ തലാക് ചെല്ലാതെ മറ്റൊരാൾ കെട്ടുകയോ… ഒരിക്കലും സംഭവിക്കില്ല…”” 

തെറ്റാണെന്നറിഞ്ഞിട്ടും റബ്ബിന്റെ പരീക്ഷണത്തിൽ ഞാൻ വെറുമൊരു പുഴുവിനെ പോലെ ആയത് പോലെ എന്റെ ഉള്ളിൽ തോന്നി… 

ആഷിക് കൈകൾ എന്റെ തോളിലൂടെ മെല്ലെ ഇട്ടു എന്നെ ചേര്‍ത്ത് പിടിച്ചു…

അവന്‍ എന്നും അങ്ങനെ തന്നെ ആയിരുന്നു.. എനിക്കോ അവനോ ഒരു ഇടങ്ങേറ് വരുന്ന സമയം തമ്മിൽ അടുത്തുണ്ടെൽ ഈ തോളിലൂടെ ഒന്ന് കൈ ഇട്ടു ചേർത്തു നിർത്തിയാൽ മാത്രം മതി.. എന്റെ സങ്കടമെല്ലാം എങ്ങോട്ടാ മറഞ്ഞു പോകുന്നത് കാണാം…

“”സത്യമാണ്.. നിന്റെ തലാക്കില്ലാതെ.. ഒരു ഡിവോഴ്സ് വാങ്ങാതെ നിന്റെ മാമന്റെ വീട്ടിൽ അങ്ങനെ ഒരു കാര്യം നടക്കുന്നുണ്ട്…””