? ഋതുഭേദങ്ങൾ ?️ 12 [ഖല്‍ബിന്‍റെ പോരാളി ?] 991

““വല്യച്ഛന് ഇതാ….”” മനുവിന്‍റെ മറ്റേ കൈയിലുള്ള ചെറിയ കഷ്ണം കാണിച്ചുകൊണ്ട് മാളുട്ടി പറഞ്ഞു. മനു അതിന് ദയനീയ ഭാവം കാണിച്ചു നിന്നു. അവന്‍ വലിയ കഷ്ണം പിറകിലേക്ക് കൊണ്ടു പോയി…

““മാളുട്ടിയ്ക്ക് അത് താ…..”” മാളുട്ടിയുടെ ശബ്ദം ഉയര്‍ന്നു തുടങ്ങി. രണ്ടുമൂന്ന് തവണ കുടെ അവള്‍ വാശി പിടിപ്പിച്ചപ്പോ ഇനിയും കളിപ്പിച്ച അവള്‍ കരയുമെന്ന് മനുവിന് തോന്നി. ഒരിക്കല്‍ അവള്‍ കരഞ്ഞതിന്‍റെ ബാക്കിയാണ് ഇപ്പോ നടക്കുന്നതെല്ലാം. ഇനിയും വയ്യ. അതുകൊണ്ട് അധികം അവളെ വാശി കയറ്റാതെ വലിയ കഷ്ണം അവള്‍ക്ക് കൊടുത്തു. അതോടെ അവളുടെ കണ്ണുകളില്‍ സന്തോഷം വന്നു നിറഞ്ഞു. അവള്‍ കിട്ടിയ പാടെ അത് കഴിക്കാന്‍ തുടങ്ങി. അവളുടെ ധൃതി കണ്ടു മനു അറിയാതെ ചിരിച്ചു പോയി. അവന്‍ തന്‍റെ കൈയിലുള്ള ചെറിയ കഷ്ണം വായിലേക്ക് ആക്കി മാളുട്ടിയുടെ മഞ്ച് തീറ്റ നോക്കി നിന്നു.

““മനുവേട്ടാ….”” പെട്ടെന്ന് പിറകില്‍ നിന്ന് ഒരു വിളി വന്നു. മനു തിരിഞ്ഞു നോക്കുമ്പോള്‍ മായയാണ്. മാളുട്ടിയും മനുവും ഒന്നും രണ്ടു പറഞ്ഞിരിക്കുന്നത് കണ്ട് അതിശയത്തോടെ നില്‍ക്കുകയാണ് മായ. അവള്‍ സോഫയ്ക്കരികിലേക്ക് നടന്നടുത്തു.

““അല്ല…. ഇന്ന് വന്നിട്ട് കുളിയും തേവാരവും ഒന്നുമില്ലേ….”” മായ മനുവിനോട് ചോദിച്ചു.

““ഹാ… ഞാന്‍ മാളുട്ടിയ്ക്ക് മഞ്ച് കൊടുക്കുകയായിരുന്നു. അല്ലേ മാളുട്ടി….”” മനു മാളുട്ടിയോട് ചോദിച്ചു.

““ഹാ….”” മാളുട്ടി കാര്‍ട്ടുണ്‍ ശ്രദ്ധിച്ചുകൊണ്ടും മഞ്ച് നുണഞ്ഞുകൊണ്ടും ആരെയും നോക്കാതെ തന്നെ ഒറ്റവാക്കില്‍ മറുപടിയൊതുക്കി. അതുകണ്ട് മായയും മനുവും ഒന്നു ചിരിച്ചു.

““മനുവേട്ടന്‍ കുളിച്ചു വാ…. ഞാന്‍ കാപ്പിയെടുക്കാം….”” മായ മനുവിനോടായി പറഞ്ഞു.

““ഹാ….”” ഇത്രയും പറഞ്ഞു മനു ബാഗുമെടുത്തു റൂമിലേക്ക് നടന്നു.
പിറ്റേന്ന് ഞായറാഴ്ചയായിരുന്നു. മനുവിന് അന്ന് ലീവായതിനാല്‍ രാവിലെ അല്‍പം വൈകി എഴുന്നേറ്റ്. സാധാരണ ദിവസം അവന്‍ ഉണര്‍ന്നില്ലേങ്കിലും മായ വിളിച്ചുണര്‍ത്തുമായിരുന്നു. ഞായറാഴ്ച അവളും അതിന് മുതിരാറില്ല. അന്ന് വൈകി എഴുന്നേറ്റ് പ്രഭാതകര്‍മ്മങ്ങള്‍ എല്ലാം കഴിഞ്ഞു പ്രാതലിനായി ഡൈനിംഗ് ടെബിളിലെത്തിയപ്പോഴേക്കും ദേവ് അമ്പലം കഴിഞ്ഞെത്തിയിരുന്നു. മനുവും ദേവും അനഘയും മായയും ഒന്നിച്ചാണ് കഴിക്കാനിരുന്നത്. മരുന്ന് കഴിക്കാനുള്ളത് കൊണ്ട് ഭദ്രമ്മ നേരത്തെ കഴിച്ചു. അതിനോടൊപ്പം മാളുട്ടിയും. ഭക്ഷണം കഴിച്ചു കഴിഞ്ഞു പൂമുഖത്തേക്കിറങ്ങിയ മനു അരമതിലില്‍ ഇരുന്ന് പത്രം വായിക്കാന്‍ തുടങ്ങി. കുറച്ചു കഴിഞ്ഞപ്പോ ദേവ് പുറത്തേക്ക് ഇറങ്ങുന്നുണ്ടായിരുന്നു.