? ഋതുഭേദങ്ങൾ ?️ 12 [ഖല്‍ബിന്‍റെ പോരാളി ?] 991

എന്തായാലും അത്തുവിന്‍റെ വിവാഹം വരെയാണ് ആ ഉടമ്പടി. അതിന് മുമ്പ് അവളുടെ പിജി അഡ്മിഷന്‍ തുടങ്ങും. അവള് പഠിക്കാന്‍ പോയിക്കോട്ടെ ആ സമയം കൊണ്ട് രണ്ടുകുടുംബക്കാരെയും ഞാന്‍ തന്നെ പറഞ്ഞു മനസിലാക്കണം. അപ്പോഴും പ്രശ്നം മാളുട്ടിയാണ്. ഇത്രയും നാള്‍ കിട്ടാത്ത അമ്മയുടെ സ്നേഹവും വാല്‍സല്യവും പരിചരണവും അവള്‍ക്ക് കിട്ടിയത് അനഘയില്‍ നിന്നാണ്. ഇവിടെ വന്നെ പിന്നെ ഉണ്ണാനും ഉറങ്ങാനുമെല്ലാം അവളുടെ കുടെ അനഘയുണ്ടായിരുന്നു. പെട്ടെന്ന് ഒരു ദിവസം അതെല്ലാം ഇല്ലാതാവും എന്നറിയുമ്പോ അവള്‍ക്ക് സഹിക്കാന്‍ പറ്റുമോ….? മാളുട്ടിയെ പിരിഞ്ഞു പോകാന്‍ അനഘയ്ക്ക് സാധിക്കുമോ….?  ഓരോന്ന് ചിന്തിച്ചു നടന്ന ദേവ് പിന്നെ നില്‍ക്കുന്നത് അവരുടെ പാടത്ത് എത്തിയപ്പോഴാണ്. എതോ പണിക്കാരന്‍ കുശലം ചോദിച്ചപ്പോ ദേവ് തിരിച്ചു സ്വബോധത്തിലെത്തി. പിന്നെ ചിന്തകള്‍ക്ക് സമയം കൊടുക്കാതെ ദേവ് അവിടെത്തെ കാര്യങ്ങളില്‍ ശ്രദ്ധിക്കാന്‍ തുടങ്ങി.

ഇതേ സമയം മാളുട്ടിയ്ക്ക് ഫോണില്‍ കാര്‍ട്ടുണ്‍ വെച്ചുകൊടുത്തു അടുത്തിരുന്നു ചിന്തകളിലായിരുന്നു അനഘ.

എത്ര ഒഴിഞ്ഞുമാറി നടന്നാലും ഇന്നത്തെ പോലെ ഓരോ സംഭവങ്ങളുണ്ടായിക്കൊള്ളും…. ദേവേട്ടന്‍റെ ആ നേരത്തെ നോട്ടം കണ്ടപ്പോ എന്‍റെ പ്രതികരണശേഷിയെല്ലാം പാടെ ഒലിച്ചുപോയ പോലെ തോന്നി. എന്തിനാ എന്‍റെ ദേവി…. എന്നെ അങ്ങേരിലേക്ക് അടുപ്പിക്കുന്നത്….? ഇനിയുമെന്നേ പരിക്ഷിക്കുകയാണോ…..?

✿•••┈┈┈┈┈┈┈┈┈┈┈┈┈┈┈┈┈┈•••✿

ദിനങ്ങള്‍ കൊഴിഞ്ഞു പോയിക്കൊണ്ടിരുന്നു. മറ്റൊരു പുജാരിയെ കണ്ടെത്താനുള്ള ബുദ്ധിമുട്ടുകൊണ്ട് കമ്മിറ്റിക്കാര്‍ക്ക് ദേവിന്‍റെ ആവശ്യങ്ങള്‍ അനുസരിച്ചുകൊണ്ട് തുടര്‍ന്നും പുജ നടത്താന്‍ നിയോഗിച്ചു. മനു എന്നും ഓരോ ചോക്ലേറ്റുമായാണ് വൈദരത്ത് രാത്രി എത്തുന്നത്. മാളുട്ടി ആദ്യമെല്ലാം കുടെയുള്ള ആളെ മുന്നിലേക്ക് വെച്ച് അവള്‍ ഇടയിലുടെ ചോക്ലേറ്റ് വാങ്ങി ഓടി പോവുകയായിരുന്നു പതിവ്. പിന്നെ പിന്നെ ആരുമില്ലെങ്കിലും അവള്‍ ഓടി വന്ന് വാങ്ങി തിരിച്ചൊടി പോവും. ഒരു വാക്കോ ചിരിയോ ഒന്നും അവളില്‍ നിന്ന് കിട്ടിയില്ല. എന്നാലും ഇപ്പോ വൈദരത്ത് കയറിചെല്ലുമ്പോള്‍ ഇടംകണ്ണിട്ട് ഒരു നോട്ടം മനുവിന് നേരെ വരുന്നുണ്ടായിരുന്നു….. പിന്നെ അവന്‍റെ ബാഗിലേക്ക് ആ കണ്ണുകള്‍ ചലിക്കുന്നതും കാണാം… ബാഗില്‍ നിന്ന് ആ മിഠായി എടുത്ത് നീട്ടുമ്പോ കണ്ണുകള്‍ വീടര്‍ത്തി ഓടി വരുന്ന ഒരു കാഴ്ചയുണ്ട്. ഇത്രയും നാളിനുള്ളില്‍ ഇതും മനുവിന്‍റെ ദിനചര്യയായി മാറിയിരുന്നു.