🌞 ഋതുഭേദങ്ങൾ 🌧️ 11 [ഖല്‍ബിന്‍റെ പോരാളി 💞] 900

““ഇല്ലച്ഛാ…. കുറച്ചുടെ കിടന്നോട്ടെ എന്നുവെച്ചു.””  അനഘ മറുപടി കൊടുത്തു. അച്ഛന്‍ ഒരു ചിരിയില്‍ അതിന്‍റെ മറുപടിയൊതുക്കി. അനഘയും തിരിച്ചു ഒരു ചിരി നല്‍കി അടുക്കളയിലേക്ക് നടന്നു. അവിടെ അമ്മമാരും മായേട്ത്തിയും ഉണ്ട്. മൂന്ന് പേരും കാര്യമായ ചര്‍ച്ചയിലാണ്. അനഘ വന്നതോടെ അവളും അതില്‍ ചേര്‍ന്നു. പകുതിയിലെറേയും മാളുട്ടിയുടെ കാര്യങ്ങളാണ്. പിന്നെ മനുവേട്ടന്‍റെ അവളോടുള്ള അകള്‍ച്ചയും.

ഏകദേശം എഴുമണിയായപ്പോ അനഘ മാളുട്ടിയെ വിളിയ്ക്കാനായി തങ്ങളുടെ റൂമിലേക്ക് പോയി. അവിടെ സ്ഥിതി പഴയപോലെ തന്നെയായിരുന്നു. മാളുട്ടി നല്ല ഉറക്കം തന്നെ.

““കണ്ണാ….””  മാളുട്ടിയുടെ അരികില്‍ ഇരുന്നു കൊണ്ട് അനഘ മാളുട്ടിയെ തട്ടി വിളിച്ചു.

““കണ്ണാ…. മതി ഉറങ്ങ്യേത്…. എണീക്ക് കണ്ണാ….””  അനഘ പിന്നെയും തട്ടി വിളിച്ചു. മാളുട്ടി പതിയെ കണ്ണ് തുറന്നു. മുന്നില്‍ അനഘയെ കണ്ടതും അവള്‍ വീണ്ടും കണ്ണടച്ചു കിടന്നു. എന്നാല്‍ മാളുട്ടി കണ്ണു തുറക്കുന്നതും തന്നെ കണ്ടപ്പോ വേഗം ഒരു ചിരിയോടെ കണ്ണടയ്ക്കുന്നതും അനഘ ശ്രദ്ധിച്ചിരുന്നു. അവള്‍ക്ക് അറിയാതെ ചിരി പൊട്ടി.

““അയ്യോ…. കണ്ണന്‍ ഉണരുന്നില്ലല്ലോ…. എന്തൊരു ഉറക്കമാ ഇത്…. അല്ലാ ഉറക്കുന്ന കുട്ടികള്‍ കാലു പൊക്കുമല്ലോ…. അമ്മേടെ കണ്ണനത് ചെയ്യുന്നതില്ലല്ലോ….ശ്ശോ…. കഷ്ടമായി പോയി… ””  അനഘ മാളുട്ടി കേള്‍ക്കനായി ചിരിയോടെ പറഞ്ഞു. അത് കേട്ടതും അല്‍പസമയത്തിനുള്ളില്‍ മാളുട്ടി തന്‍റെ വലതുകാലു വായുവിലേക്ക് പൊക്കാന്‍ തുടങ്ങി. അതുകണ്ട് അനഘ നേരത്തെ കടിച്ചുപിടിച്ചിരുന്ന ചിരി കുടെ പുറത്തേക്ക് വന്നു.

““അമ്പടീ കള്ളി…. നീ കള്ള ഉറക്കത്തിലാണല്ലേ….””  അനഘ മാളുട്ടിയെ ഇക്കിളിയാക്കികൊണ്ട് പറഞ്ഞു. അതോടെ ഇക്കിളി കാരണം മാളുട്ടിയും ചിരിക്കാന്‍ തുടങ്ങി. അനഘ അവളെ എടുത്ത് ഒക്കത്തിരുത്തി.

““മതി ഉറങ്ങിയത്…. മാളുട്ടിയെ കാണാന്‍ താഴെ മുത്തശ്ശിമാരും മുത്തശ്ശനും മായമ്മയും ഒക്കെ കാത്തിരിക്ക്യാ….””  തന്‍റെ കണ്ണുകള്‍ തിരുമ്പുന്ന മാളുട്ടിയെ നോക്കി അനഘ പറഞ്ഞു.

““ദേവേട്ടനെവിടെ…..?””  മാളുട്ടി ചുറ്റും നോക്കി കൊണ്ട് ചോദിച്ചു….

““കണ്ണനോട് ഇന്നലെ പറഞ്ഞില്ലേ, ഇനി ദേവേട്ടനെന്ന് വിളിക്കരുതെന്ന്…..”” അനഘ മുഖം കറുപ്പിച്ചുകൊണ്ടു ചോദിച്ചു. അതു കണ്ടതും മാളുട്ടിയുടെ തല താഴ്ന്നു.

““എന്തു വിളിക്കാനാ അമ്മ പറഞ്ഞത്…. ?””  അനഘ വീണ്ടും ചോദിച്ചു.

““അച്ഛാ ന്ന്…..””  മാളുട്ടി അല്‍പം സമയമെടുത്തു പറഞ്ഞു….

““ഹാ…. ഇനി അങ്ങനെ വിളിക്കാവുട്ടോ…. ആരു ചോദിച്ചാലും മാളുട്ടിയുടെ അച്ഛനാണ് അത്…. അത് അച്ഛനും പറഞ്ഞില്ലേ….””  അനഘ ചോദിച്ചു. മാളുട്ടി അതെയെന്നര്‍ത്ഥത്തില്‍ തലയാട്ടി.