? ഋതുഭേദങ്ങൾ ?️ 02 [ഖല്‍ബിന്‍റെ പോരാളി ?] 656

““ഇല്ല്യാച്ചാ…. എല്ലാം സുഖായിരുന്നു….”” നമ്മുടെ ഭര്‍ത്താവ് ഭയഭക്തിബഹുമാനത്തോടെ പറഞ്ഞു.

പിന്നെയങ്ങട് സ്നേഹപ്രകടനത്തിന്‍റെ സമയമായിരുന്നു. അച്ഛനും അമ്മയും അങ്ങോരോട് ഓരോ വിശേഷങ്ങള്‍ സംസാരിച്ച് നിന്നു. കുടെ പേരശ്ശിയും കൂടി. ഇവിടെ ഒരുത്തിയെ കെട്ടിച്ചയച്ചത് കൊണ്ട് മറന്നതാണോ എന്ന് അറിയില്ല. കണ്ട ഭാവം ആരും കാണിക്കുന്നില്ല.

അമ്മ കുറച്ച് കഴിഞ്ഞപ്പോ കാപ്പിയുണ്ടാക്കാനായി അകത്തേക്ക് പോയി. പിറകെ പേരശ്ശിയും. ഞാന്‍ അങ്ങേരുടെ കുടെ ആര്‍ക്കും വേണ്ടത്താ മൈല്‍കുറ്റിയായി നിന്നു. നിന്ന് കാല് കഴച്ചപ്പോ ആരോടും അനുവാദം വാങ്ങാതെ ഞാന്‍ ഉള്ളിലേക്ക് നടന്നു.

കഴിഞ്ഞ ഇരുപത്തിരണ്ട് കൊല്ലം അധികാരത്തോടെ ഭരിച്ച എന്‍റെ മുറിയിലേക്ക് ചെന്നു. ഇന്നിത് അത്തുവിന്‍റെ അധികാരത്തിലാണ്. അതിന്‍റെ എല്ലാ അലങ്കോലങ്ങളും അവിടെ കാണാനുണ്ട്. കുറച്ച് നേരം മുറിയുടെ ചുറ്റും നോക്കി ഒരു ദീര്‍ഘശ്വാസം വിട്ടു.

““എട്ത്തി…..”” പിറകില്‍ നിന്ന് അത്തുവിന്‍റെ ശബ്ദം കേട്ടു. ഞാന്‍ തിരിഞ്ഞ് നോക്കി.

““എട്ത്തി… ദേ അമ്മ വിളിക്ണു…”” അവള്‍ രണ്ടുവാക്കില്‍ കാര്യം പറഞ്ഞ് ദേ വന്നു ദാ പോയി… ഇനി ഞാന്‍ അങ്ങോട്ട് പോയിട്ടെന്തിനാണവോ….

ഇനിയും ആ കോന്തന്‍റെ അടുത്ത് ഇരിക്കാനാവും…. ശ്ശോ അങ്ങേരാണേല്‍ ലോക ഉടായിപ്പും…. പുറത്ത് മറ്റുള്ളവരുടെ മുന്നില്‍ എന്തൊരു മാന്യന്‍. രാത്രി തനി അസുരന്‍. എന്തായാലും ചെന്ന് നോക്കാന്‍ തന്നെ തിരുമാനിച്ച് ഹാളിലേക്ക് നടന്നു.

വിചാരിച്ച പോലെ നമ്മടെ കോന്തന്‍ ഹാളിലെ സോഫയില്‍ ഞെളിഞ്ഞിരുപ്പുണ്ട്. അദ്ദേഹത്തിന്‍റെ അടുത്ത് അത്തുവും. അതെനിക്ക് തീരെ പിടിക്കുന്നില്ല. അച്ഛനും പേരശ്ശിയും അടുത്ത സോഫയിലിരിക്കുന്നു. അമ്മ നില്‍ക്കുകയാണ്. ഞാന്‍ കണവന്‍റെ അടുത്തേക്ക് നടന്നു.

““ഹാ…. മോളെ…. ഇരിക്ക് ദാ കാപ്പി കുടിക്ക്….”” അമ്മ സ്നേഹത്തോടെ പറഞ്ഞു. ഭാഗ്യം, ഞാന്‍ വന്നത് അറിഞ്ഞിട്ടുണ്ട്…. ഞാന്‍ കാപ്പി ഗ്ലാസ് എടുത്ത് എന്‍റെ കണവന്‍റെയും അത്തുവിനും ഇടയില്‍ പോയി ഇത്തിരി ഗ്യാപില്‍ കയറിയിരുന്നു.

ഞെരുക്കം കുടിയപ്പോ അപ്പുറവും ഇപ്പുറവും ഉണ്ടായിരുന്ന രണ്ടാളും എന്നെ ഒരു കോനിഷ്ട് നോട്ടം നോക്കി എതിര്‍ സൈഡിലോട്ട് മാറി ഇരുന്ന് എനിക്ക് സ്വസ്ഥമായി ഇരിക്കാനുള്ള സ്ഥലം ഉണ്ടാക്കി തന്നു. ആഹാ നല്ല മനസുഖം… ഞാന്‍ നമ്മുടെ മണവാളനെ ഒന്നു നോക്കി. ഇതെന്ത് കൂത്ത് എന്ന ഭാവമായിരുന്നു അങ്ങേര്‍ക്ക്…. ഞാനൊരു ചിരി നല്‍കി കാപ്പി ഗ്ലാസ് ചുണ്ടില്‍ മുട്ടിച്ച് കുടിച്ച് തുടങ്ങി.

ചര്‍ച്ച പിന്നെയും നീണ്ടു. എനിക്കാണെങ്കില്‍ അത് കേട്ട് നില്‍ക്കാന്‍ ഒരു സുഖവും തോന്നിയില്ല. കുറച്ച് കഴിഞ്ഞപ്പോ പയ്യെ അവിടെ നിന്നു വലിഞ്ഞു. ഞാന്‍ പോയ തക്കത്തിന് അത്തു വിണ്ടും അങ്ങേരുടെ അടുത്തെത്തി. എനിക്ക് നല്ല ദേഷ്യം വന്നെങ്കിലും അവിടെ പോയി അവരുടെ സംസാരം കേട്ടിരിക്കാന്‍ വയ്യാത്തത് കൊണ്ട് ഞാന്‍ അതിന് തുനിഞ്ഞില്ല.