?പ്രണയ വർഷം? [Jeevan] 140

പ്രണയത്തിൻ്റെ നിറക്കൂട്ടിൽ ചാലിച്ചെടുത്ത കാഴ്ചകളും, മനസ്സിൽ കോറിയിട്ട സുന്ദര നിമിഷങ്ങളുടെ ഏടുകൾ നെയ്തെടുക്കുന്ന അനുഭൂതികളും.. ഏതൊരു പെൺമനസ്സിനേയും എന്നത്പോലെ, എന്നെയും പ്രണയത്തിൻ്റെ ആഴങ്ങളിലേക്ക് നടത്താൻ കഴിവുള്ളതാണ്.

ഇന്ന് എന്നിലും ഉണ്ട് അതുപോലൊരു ലോകം. ജീവിതത്തിൽ പ്രതീക്ഷിക്കാതെ കടന്നു വന്നു കൂടെ ചേർന്നൊരു ഹൃദയം.. സ്വപ്നങ്ങൾ കാണാൻ പഠിപ്പിച്ച പ്രണയം.. കൈ കോർത്തു ചേർത്ത് പിടിച്ചു ഈ ലോകത്തിൻ്റെ ഏതു അറ്റം വരെയും ഒപ്പം യാത്ര ചെയ്യാൻ ഒരു മനസ്സ്.. 

കിഴക്കൻ ചക്രവാളത്തിൽ ഉദിച്ചു ഉയരുന്ന സൂര്യൻ സ്വർണ്ണ നൂലിഴകൾ വാരി വിതറുന്നത് പോൽ പ്രഭാതകിരണങ്ങൾ പൊഴിക്കുന്നുണ്ട്. ജനലഴികൾക്കിടയിലൂടെ വിദൂരതയിലേക്ക് നോക്കിയാൽ ഇരുളിനെ നീക്കി ഓരോ കാഴ്ചകളും വ്യക്തമാക്കുന്നു. ജീവിതത്തിൻ്റെ പുതിയൊരു അദ്ധ്യായത്തിന് തുടക്കം കുറിക്കുന്നു. പുതു പ്രതീക്ഷകൾ മൊട്ടിട്ടു.. വിടർന്നു ആത്മാവിനെ അലിയിച്ചു ചേർക്കാൻ കഴിവുള്ള സൗരഭ്യം പൊഴിച്ചു സ്വപ്നങ്ങൾക്ക് ചിറകേകാൻ പ്രകൃതി ഒരുക്കി തരുന്ന അസുലഭ മുഹൂർത്തം.

സ്നേഹത്തിന് ഒരു അർത്ഥം ഉണ്ടെങ്കിൽ അതിന് എൻ്റെ ജീവിതത്തിൽ ഒരു മറുപടി മാത്രമേ ഉണ്ടാകൂ. ഞാൻ ഓരോ നിമിഷവും കാണാൻ കൊതിക്കുന്ന ആ ഒരാൾ. ഇവിടെയും തേടുന്ന മുഖം.. എൻ്റെ എല്ലാം എല്ലാം.. എൻ്റെ ജീവൻ്റെ ജീവൻ. സ്നേഹിച്ചു ഒരുപാട് ഒരുപാട്.. പിരിയാൻ ആകാത്ത വിധം.

അരികിൽ ഉള്ള ഓരോ നിമിഷവും  പറഞ്ഞറിയിക്കാൻ ആകാത്ത സന്തോഷങ്ങളും കരുതലും സ്നേഹവും നൽകി കടന്നു പോയ ക്ഷണിക നിമിഷങ്ങൾ. കടലിനു കരയോടെന്ന പോലെ.. സൂര്യകാന്തിയ്ക്ക് സൂര്യനോടെന്ന പോലെ… ഒരിക്കലും വിരാമം കുറിക്കാൻ ആകാത്ത അനന്തമായ സ്നേഹം… 

കൈ കോർത്തു കടലോരങ്ങളിലൂടെ നടക്കുമ്പോൾ, ലോകം കീഴടക്കിയ സന്തോഷം ആണ്. പക്ഷേ കരയിലേക്ക് അടുക്കുന്ന തിരമാലകൾ പാദങ്ങളെ പുൽകി കടന്നു പോകുമ്പോൾ ഞങ്ങളുടെ യാത്രയുടെ കാൽപ്പാടുകൾ മാത്രം എപ്പോൾ ഒക്കെയോ ബാക്കിയായിരുന്നു.. അതിനൊപ്പം ഹൃദയം കൊണ്ട് സമ്മാനിച്ച സുന്ദര നിമിഷങ്ങളും.. 

കടലാഴങ്ങളിൽ ഒളിക്കുന്ന അസ്തമയ സൂര്യൻ ചുറ്റും അന്ധകാരം പടർത്തുമ്പോൾ, കടലിനെ സാക്ഷിയാക്കി അരികിലുരുന്ന് കൊണ്ട് ആസ്വദിക്കുന്ന ആ കാഴ്ചയ്ക്ക് ഒരിക്കൽ മനോഹാരിത ഏറെ ആയിരുന്നു. സിന്ദൂരം വിതറിയ പോൽ ചെഞ്ചായം അണിയുന്ന വിണ്ണിൽ കൂട് തേടി പോകുന്ന പക്ഷികൾ പറന്നകലുന്നു. വളരെ കുറഞ്ഞ ദിവസത്തിന് ഉള്ളിൽ എത്രയോ നാൾ ആ ഇരുളിൻ്റെ സൗന്ദര്യം ഒന്നിച്ചു കണ്ട് മറഞ്ഞു.

എല്ലാം മറന്ന് ആസ്വാദനത്തിൻ്റെ കൊടുമുടികൾ ഒന്നിച്ചു താണ്ടുമ്പോൾ അവിടെയും വിധി വില്ലൻ ആകും എന്ന് സ്വപ്നത്തിൽ പോലും ചിന്തിച്ചിരുന്നില്ല. അറിഞ്ഞു കൊണ്ടല്ലാതെ ആ ഇരുൾ ജീവിതത്തിലേയ്ക്ക് കടന്നു വരുമ്പോൾ , അസ്തമയവും.. അതിൻ്റെ ശോഭയും.. ഉള്ളിൽ നീറുന്നൊരു ഓർമ്മ മാത്രം ആയി മാറിയിരിക്കുന്നു. 

അച്ഛൻ്റെയും അമ്മയുടെയും തീരുമാനങ്ങൾക്ക് മുന്നിൽ ജീവിതവും.. സ്വപ്നങ്ങളും ബലി കൊടുക്കേണ്ടതായി വരുമോ എന്ന് ഓർത്തു ഈ സന്തോഷങ്ങൾ ഇടയിലും മനസ്സ് പിടഞ്ഞിരുന്നു. കണ്ണേട്ടൻ്റെ ക്ലാസ്സ്, എക്സാം ഒക്കെ കഴിഞ്ഞിരുന്നു. കാണുന്നത് വളരെ കുറഞ്ഞു വന്നു. നിമിഷങ്ങൾ മാത്രം ദൈർഘ്യം ഉള്ള ഫോൺ കാളുകൾ മാത്രം ആയിരുന്നു പിന്നെ എന്നെ തേടി വന്നിരുന്നത്. എങ്കിലും അകലുതോറും കൂടുതൽ അടുപ്പിക്കുന്ന ഏതോ ഒരു ശക്തി ഞങ്ങൾക്ക് ഇടയിൽ ഉണ്ടായിരുന്നു.