അമ്മയുടെ ശരികൾ [ജ്വാല] 1324

കാറിൽ കയറി ഞാൻ വണ്ടി മുന്നോട്ടെടുത്തു ,അമ്മേ എനിക്ക് ഒരു കാര്യം പറയാനുണ്ട്?
അജു മുഖവുര വേണ്ട, കാര്യം പറയു?
അന്ന് നടന്ന കാര്യങ്ങൾ എല്ലാം അമ്മയോട് പറഞ്ഞു,
ഹും… ഒന്ന് മൂളി,
അമ്മ പുറത്തേയ്ക്ക് നോക്കി ഇരുന്നു വീടെത്തും വരെ…
ആ കൺകളിൽ എന്താ ഭാവം എന്ന് എത്ര ആലോചിച്ചിട്ടും മനസ്സിലായില്ല
അജൂ,
അമ്മയുടെ വിളിയാണ് ചിന്തകളിൽ നിന്നുണർത്തിയത്, അജു അത് നിന്റെ അച്ഛൻ ആണ്, നിന്റെ വരവും പ്രതീക്ഷിച്ചു ആശുപത്രിയിൽ എത്രയോ രാത്രികളിൽ ഉറക്കമിളച്ചു കാത്തിരുന്നത് ആണ്,
എന്തു വൃത്തികെട്ടവൻ ആണെങ്കിലും അദ്ദേഹത്തെ ഉപേക്ഷിക്കരുത്, എല്ലാ കാര്യങ്ങളും നീ മുൻപിൽ നിന്നു ചെയ്യണം, അതിന് അവകാശവും നിനക്ക് തന്നെയാണ്.

എന്റെ മനസ്സിൽ നിന്നു അയാൾ എന്നെ മരിച്ചു കഴിഞ്ഞിരിക്കുന്നു പക്ഷെ നിന്റെ കടമ നീ നിർവഹിക്കണം, മുടിയിൽ തലോടി അമ്മ കാറിൽ നിന്നിറങ്ങി വീട്ടിലേക്ക് കയറി…

അവരുടെ ഉള്ളിൽ ഇപ്പോഴും സ്നേഹമാണോ, അതോ ബഹുമാനമാണോ, രണ്ടാളും പരസ്പരം മനസ്സിലാക്കി ജീവിച്ചതിന്റെ ഭാഗമാകും, പിന്നീട് എന്നോട് അതിനെപ്പറ്റി അമ്മ ഒന്നും ചോദിച്ചില്ല.
നേരം സന്ധ്യ മയങ്ങി,
ഞാൻ പുറത്തേക്കിറങ്ങാൻ തുടങ്ങുമ്പോൾ ആണ് ഓഫീസിലെ സൂപ്രണ്ട് വിളിക്കുന്നത് , അജിത്ത് നാളെ അദാലത്ത് ഉള്ളതാണ്, കളക്ടർ സാർ നീ കൂടെ ഉണ്ടാകണം എന്ന് പ്രത്യേകം പറഞ്ഞിട്ടുണ്ട്,
രാവിലെ തന്നെ വരണം,
വരാം സാർ,

പുതിയ കളക്ടർ ആണ്, എല്ലാവർക്കും നല്ല മതിപ്പാണ്, കൂടാതെ ചെറുപ്പവും, ജനങ്ങൾക്ക് എന്തെങ്കിലും ചെയ്യണമെന്ന് ആഗ്രഹവും ഉണ്ട്, ഞാനുമായി അപ്രതീക്ഷിതമായി ആണ് സൗഹൃദത്തിലായത് ഇപ്പോൾ നല്ല ബന്ധവും ആണ്. നാളെ കൂടി അവധി ആക്കണം എന്ന് വിചാരിച്ചതാണ് ഇപ്പോൾ എല്ലാം താറുമാറായി,

രാവിലെ പുറപ്പെടാൻ തയ്യാറായി നിൽക്കുമ്പോൾ അമ്മ അടുത്തു വന്നു,
മോനേ, അച്ഛൻ എന്തെങ്കിലും സാമ്പത്തിക സഹായമോ വല്ലതും ചോദിച്ചു വന്നാൽ ഇല്ല എന്ന് പറയരുത്. നിന്റെ കടമകൾ മറക്കരുത്,
എന്നെ , വളർത്തിയത് അമ്മയല്ലേ , ഞാൻ മറക്കുമോ?

അമ്മയുടെ മുഖം ആകെ ചുവന്നിരിക്കുന്നു ഒറ്റ നോട്ടത്തിൽ മനസിലാക്കാം രാത്രി തീരെ ഉറങ്ങിയിട്ടില്ല എന്ന്.
അമ്മയുടെ നെറ്റിയിൽ ഉമ്മ കൊടുത്ത് ഞാൻ യാത്രയായി.
കാറിൽ തിരുവനന്തപുരത്തേക്ക് വരുമ്പോളും അമ്മ ആയിരുന്നു മനസ്സിൽ.

അമ്മയ്ക്ക് എങ്ങനെ കഴിയുന്നു ഇതെല്ലാം, തന്നെയും, കുട്ടികളെയും തന്റെ നല്ല പ്രായത്തിൽ ഉപേക്ഷിച്ചു പോയവനെ ഇപ്പോഴും സ്നേഹിക്കുന്നു,
പുറമെ എന്തെങ്കിലും പറയുമെങ്കിലും അമ്മയ്ക്ക് അച്ഛനോട്‌ സ്നേഹം ഉണ്ട്, അതല്ലേ ഇന്നലെ രാത്രിയിൽ ഉറങ്ങാതെ കരഞ്ഞത്.