അമ്മയുടെ ശരികൾ [ജ്വാല] 1324

ശവസംസ്ക്കാരത്തിനുള്ള ഒരുക്കങ്ങൾ തുടങ്ങി
വായ്ക്കരി ഇടുംമുൻപ് മൃതദേഹത്തെ കുളിപ്പിച്ചു . ആദ്യം ശുദ്ധജലംകൊണ്ടും പിന്നീട് ഗംഗാതീർഥം കൊണ്ടും ശുദ്ധി ചെയ്ത് ശുദ്ധമായ വസ്ത്രങ്ങളും ഭസ്മം, ചന്ദനം എന്നിവയും ധരിപ്പിച്ച്, കിഴക്കുദിക്കിന് അഭിമുഖമായി നിലവിളക്ക് കത്തിച്ചു വച്ചു.

സംസ്കരിക്കുന്ന സമയത്താണു പിതൃകർമങ്ങൾ നടത്തേണ്ടതുണ്ടെന്ന് പുരോഹിതൻ പറഞ്ഞു ഇതിനെ അന്ത്യയാഗം എന്നു പറയുന്നു. വേദമന്ത്രോച്ചാരണങ്ങളോടെ മൃതദേഹം ചിതയിൽ വച്ചു ഇനി എന്റെ ഊഴം ആണ്,
തലയിൽ വെള്ളം ഒഴിച്ച് ശുദ്ദിയായി ഞാൻ പുരോഹിതൻ നീട്ടിയ തീ പന്തം അവർ കാണിച്ച് തന്ന സ്ഥലത്ത് വച്ചു കർപ്പൂരത്തിന്റെ പിന്നെ പേരറിയാത്ത സുഗന്ധദ്രവ്യങ്ങളുടെ മണം അന്തരീക്ഷത്തിൽ പടർന്നു , തീ ആളിക്കത്തി ദിഗന്ധം പൊട്ടുമാറു ആരുടെയോ അച്‌ഛാ എന്നുള്ള നിലവിളി കേട്ടു,
എന്റെ കണ്ണുകൾ നിറഞ്ഞിരുന്നു കാഴ്ചകൾ മങ്ങി പോകുന്നതിന്റെ ഇടയിൽ നിലവിളിച്ച ആളുടെ മുഖം കണ്ടു.

പച്ചവിറകുകൾ കത്തിയമരുമ്പോൾ എന്റെ അച്ഛന്റെ ദേഹം ചുട്ടുപൊള്ളുമോ?
എന്നാൽ അതിലേറെ തീ ആളിപ്പടർന്നത് എന്റെ നെഞ്ചിലാണ്,
ഞാൻ മറ്റൊരു വിറകുകൊള്ളിയായി മാറുകയായിരുന്നു…

ആമുഖം അത് ആര്യയുടെ ആയിരുന്നു.

എന്റെ ആദ്യ പ്രണയവും, സ്വപനങ്ങളും അവളെ കണ്ടമാത്രയിൽ തന്നെ ഞാൻ ചിതയിൽ അഗ്നിക്ക് ഇരയാക്കി.
ഞാനും അവളും നേർക്കു നേർ, കണ്ണുകൾ കൂട്ടി മുട്ടി, അവൾ കുഴഞ്ഞു വീണു.

ആരൊക്കെയോ താങ്ങി അവളെ എടുത്തു കൊണ്ട് പോയി, ദൂരെ നിന്ന് അമ്മയും ഈ രംഗം കാണുന്നുണ്ടായിരുന്നു.
അമ്മ മെല്ലെ നടന്നു എന്റെ അടുത്തു വന്നു പിന്നെ പറഞ്ഞു നമുക്ക് പോകാം.

കൃഷ്ണേട്ടന്റെ കൈകളിൽ കുറച്ച് പണം ഏൽപ്പിച്ചു , പിന്നെ പുറത്തേയ്ക്ക് നടന്നു. കൃഷ്ണേട്ടാ ആ നിലവിളിച്ച കുട്ടി, അത് ബാലേട്ടന്റെ മകൾ ആണ്, ഒരു ആക്സിഡന്റിൽ അതിന്റെ അമ്മ മരിച്ചു പോയി, ആ കുട്ടിക്ക് ബാലേട്ടൻ ഒരു ആശ്വാസം ആയിരുന്നു , ഇന്ന് ആരോ ആ കുട്ടിയെ കാണാൻ വരുന്നു എന്ന് ബാലേട്ടൻ പറഞ്ഞിരുന്നു, നല്ല സന്തോഷത്തിലും ആയിരുന്നു ഇരുവരും വല്ലാത്ത വിധി.

അതും പറഞ്ഞു കൃഷ്ണേട്ടൻ പോയി . എനിക്കും, അമ്മയ്ക്കും എന്ത് പറയണം എന്ന് അറിയില്ലായിരുന്നു.

കാർ ഓടി കൊണ്ടിരിക്കുമ്പോൾ അമ്മ ഒന്നും സംസാരിച്ചിരുന്നില്ല, വിദൂരതയിൽ നോക്കി ഇരുന്നു, ചുണ്ടുകൾ ഇടയ്ക്ക് വിതുമ്പുന്നതും കണ്ടു.ഞാൻ എന്താ ചെയ്യേണ്ടത് എന്നറിയാതെ മറ്റൊരു ലോകത്ത് ആയിരുന്നു.
യാന്ത്രികമായി കാർ ഓടിക്കുന്നു എന്ന് മാത്രം.

അജൂ വണ്ടി നിർത്ത്, അമ്മയുടെ ഗൗരവം നിറഞ്ഞ ശബ്ദം. ഞാൻ അമ്മയെ നോക്കി.
വണ്ടി തിരിക്ക്,
എങ്ങോട്ട്?
പറയാം, വന്ന വഴിയിൽ തിരികെ പോകൂ, അമ്മ വീണ്ടും പഴയ കർക്കശക്കാരിയായ അധ്യാപിക ആയപോലെ,

വണ്ടി തിരിച്ചു വിട്ടു , ഞങ്ങൾ വീണ്ടും അച്ഛന്റെ വീട്ടിൽ എത്തിയപ്പോഴേക്കും നേരം സന്ധ്യ മയങ്ങി, അപ്പോഴും ചിതയിലെ അഗ്നി കെട്ടടങ്ങിയിരുന്നില്ല,