അമ്മയുടെ ശരികൾ [ജ്വാല] 1324

പോടാ, നിനക്ക് തോന്നുന്നതാ, എന്താ ഇന്ന് ഈ നേർച്ചയുടെ ഒക്കെ പ്രത്യേകത?
അത്, നീ അറിയണ്ട,
ശരി ഞാൻ ചോദിച്ചതും ഇല്ല, അമ്മ പറഞ്ഞതും ഇല്ല പോരെ?
അമ്മ ചിരിച്ചു കൊണ്ട് പറഞ്ഞു അതുമതി.കാർ നല്ല വേഗതയിൽ ആണ് പോകുന്നത്,
അജു നിനക്ക് ഇന്ന് ജോലിക്ക് കയറണോ?
വേണ്ട അമ്മേ? ഇന്നും കൂടി ലീവാണ്, നാളെ ജോലിക്ക് കയറണം, അമ്മ നാളെ എന്റെ കൂടെ നിന്നാൽ ശനിയാഴ്ച നമുക്ക് ഒരുമിച്ചു വീട്ടിലേക്ക് പോകാം എന്താ?
ഞാൻ ഒന്ന് ആലോചിക്കട്ടെ, അമ്മ അതും പറഞ്ഞു റോഡിലേക്ക് നോക്കി ഇരുന്നു,

റോഡ് ഇപ്പോഴും വിജനമാണ് നഗരം ഉണർന്നു വരുന്നതേ ഉള്ളൂ…
കാർ അതിവേഗതയിൽ ഓടി കൊണ്ടിരുന്നു അമ്പലത്തിനു മുന്നിലായി പാർക്ക് ചെയ്തിട്ട് അമ്മയെ വിളിച്ചു.

അമ്മയുടെ കൈയ്യും പിടിച്ചു അമ്പലത്തിലേക്ക് പ്രവേശിച്ചു, അമ്മ പൂജകൾ ചെയ്യാനായി മുന്നോട്ട് നീങ്ങി, ഞാൻ കണ്ണുകൾ അടച്ചു പ്രാർത്ഥിച്ചു ,
കണ്ണ് തുറക്കുമ്പോൾ ഞാൻ കാണുന്നത്
എന്റെ ഇടത് ഭാഗത്ത് ഒരു പെൺകുട്ടി തൊഴുതു കൊണ്ട് നിൽക്കുന്നു, ഈശ്വരാ എന്ത് സൗന്ദര്യമാണ് അതിന്,
തൊഴുതു കഴിഞ്ഞവൾ തിരിഞ്ഞു നോക്കിയതും അവളെ സാകൂതം വീക്ഷിക്കുന്ന എന്നെയാണ് കണ്ടത്,
എന്താ? കണ്ണുകൊണ്ട് അവൾ ചോദിച്ചു , ഒന്നുമില്ല എന്നർത്ഥത്തിൽ ഞാൻ ചുമലുകൾ അനക്കി കാണിച്ചു,
അവൾ പിന്നെ അവിടെ നിന്നില്ല മുന്നോട്ട് നടന്നു അമ്മയുടെ പിന്നിലായി നിന്നു.
എവിടെയോ കണ്ടു മറന്ന മുഖം, ജ്വലിക്കുന്ന സൗന്ദര്യം, ഒറ്റ നിമിഷത്തിൽ എന്നെ വല്ലാതെ മയക്കി കളഞ്ഞു അവൾ.

അമ്മയുടെ പൂജകൾ ഒക്കെ കഴിഞ്ഞിരുന്നു, അമ്മ ആ പെൺകുട്ടിയോട് എന്തോ ചോദിക്കുന്നു, അവൾ അതിന് ഉത്തരവും നൽകി രണ്ടു പേരും പുഞ്ചിരിക്കുന്നുണ്ട്.
അമ്മ വന്ന് പറഞ്ഞു
പോകാം അജൂ,
ഞാൻ ഒന്നു കൂടി തിരിഞ്ഞു നോക്കി, അവൾ ഞങ്ങളെ നോക്കി നിൽക്കുന്നു…

ഏതാ അമ്മേ ആ കുട്ടി?
ആവോ , അമ്പലത്തിൽ വന്നതാണ്,
നല്ല മുഖപരിചയം,
ങാ… ഉണ്ടാകും , ഇവിടെ അല്ലേ നിന്റെ ജോലി വായി നോക്കി നടന്നപ്പോൾ എങ്ങാനും കണ്ടതാകാം.
അമ്മയുടെ തകർപ്പൻ മറുപടിയിൽ ഞാൻ തീർന്നു…
പിന്നെ ആത്മഗതം എന്നോണം പറഞ്ഞു നല്ല ഭംഗിയുണ്ട് അതിനെ കാണാൻ, അജു നിനക്ക് ഒന്ന് ആലോചിച്ചാലോ?
ആലോചന ഒക്കെ പിന്നീട് , വാ പോകാം നല്ല വിശക്കുന്നുണ്ട്…
അങ്ങനെ ഞങ്ങൾ ഓരോ വർത്തമാനവും പറഞ്ഞു തിരികെ പോയി.

ഏകദേശം ഒരു മാസത്തിനു ശേഷം ഓഫീസിലെ തിരക്ക് പിടിച്ച ഒരു ദിവസം ആയിരുന്നു അന്ന്, അല്ലെങ്കിലും കളക്ട്രേറ്റിലെ തിരക്ക് എന്നും ഒരേ പോലെ തന്നെ
അപരിചിതമായ ഒരു നമ്പറിൽ നിന്ന് ഒരു ഫോൺ കോൾ ഹലോ എന്റെ ശബ്ദത്തിന് മറുപടി കിട്ടാൻ ഒരു നിമിഷം വൈകി, ഞാൻ പിന്നെയും ഹലോ എന്ന് പറഞ്ഞു