അമ്മയുടെ ശരികൾ [ജ്വാല] 1324

ചോദിക്കാനും, പറയാനുള്ളതിനും ആരെയും ഭയക്കേണ്ട, നിനക്ക് പറയാനുള്ളത് ധൈര്യമായി പറയാം.
അമ്മേ എനിക്ക് ഒരു പെൺകുട്ടിയെ ഇഷ്ടമാണ്, വിവാഹം കഴിക്കാൻ താല്പര്യവും ഉണ്ട് അമ്മ അതൊന്ന് ആലോചിക്കണം,

അമ്മയുടെ മുഖം സന്തോഷം കൊണ്ട് തിളങ്ങി ശിവനെ … എന്റെ വഴിപാടും, നേർച്ചകളും ഫലിച്ചല്ലോ !

ഞാൻ എത്ര കാലമായി കേൾക്കാൻ കൊതിച്ച വാക്കുകൾ ആണ് ഇത്.
ആട്ടെ…. ആരാണ് ആ ഭാഗ്യവതി?
അമ്മയ്ക്ക് അറിയാം,
നമ്മൾ അന്ന് അമ്പലത്തിൽ വച്ചു കണ്ട പെൺകുട്ടി ആണ്.
അവളെ സംബന്ധിച്ച വിവരങ്ങൾ എല്ലാം ഞാൻ അമ്മയോട് പറഞ്ഞു.

അജു സാമ്പത്തികം ഒന്നും നമുക്ക് ഒരു പ്രശ്നം അല്ല, നിനക്ക് ഇഷ്ടമായില്ലേ, അത് മതി. അന്ന് അമ്പലത്തിൽ വച്ചു കണ്ടപ്പോൾ തന്നെ എനിക്കവളെ ഇഷ്ടമായത് ആണ്.

നീ തിരികെ പോകുന്ന അന്ന് നമുക്ക് ഒരുമിച്ചു പോകാം,
ഹോ !!!മനസ്സിൽ നിന്ന് വല്ലാത്ത ഭാരം ഒഴിവായി, സന്തോഷം കൊണ്ട് ഞാൻ ഒരു അപ്പൂപ്പൻ താടി പോലെ പറക്കാൻ തുടങ്ങിയോ?

എന്റെ റൂമിൽ എത്തിയ ഉടനെ തന്നെ അവളെ വിളിക്കാൻ ഫോൺ എടുത്തു പിന്നെ വേണ്ട എന്ന് വച്ചു , രാത്രി ഏറെ വൈകി നാളെയാവട്ടെ , മനസ്സിൽ ഏതോ പറഞ്ഞറിയിക്കാൻ കഴിയാത്ത നിർവൃതിയിൽ ഞാൻ അലിഞ്ഞലിഞ്ഞു നിദ്രാദേവിയോടൊപ്പം ചേർന്നു…

രാത്രിയിൽ നല്ല മഴയായിരുന്നു , ആര്യയെ കല്യാണ സാരിയിൽ കാണാൻ നല്ല ഭംഗി
ചില്ലി റെഡ് കാഞ്ചീപുരം സാരിയില്‍ ചെറിയ കല്ലുകൾ പിടിപ്പിച്ച് അതീവ സുന്ദരിയായി എന്റെ കൈയും പിടിച്ച് അച്ഛന്റെയും അമ്മയുടേയും കാലുകളിലേക്ക് നമസ്ക്കരിച്ച് അനുഗ്രഹം വാങ്ങി എഴുന്നേൽക്കുമ്പോൾ അച്ഛൻ കെട്ടി പിടിച്ചു കരയുന്നു, അമ്മ അച്ഛന്റെ തോളിൽ പിടിച്ചു നിൽക്കുന്നു , ഞാൻ അച്ഛനെ ആശ്വസിപ്പിക്കാനായി കൈകൾ നീട്ടി പെട്ടന്നാണ് എന്തോ ശബ്ദം കെട്ട് ഞെട്ടി ഉണർന്നത്, മനോഹരമായ സ്വപ്നത്തിന്റെ പരിസമാപ്തി വെള്ളം നിറച്ചു വച്ചിരുന്ന കൂജ താഴേക്ക് തള്ളിയിട്ടായിരുന്നു.

മൺകൂജ വീണുടഞ്ഞിട്ടുണ്ട്, വെള്ളം നിലത്തുകൂടി ഒഴുകുന്നു, എന്റെ തന്നെ പഴയ കൈലി എടുത്ത് വെള്ളം വീണ ഭാഗത്ത് തുടച്ചു അതിനു ശേഷം ജനാല തുറന്നിട്ടു തണുത്ത കാറ്റ് എന്നെ തഴുകി കടന്നു പോയി,
ചുവരിലെ ക്ളോക്കിൽ അഞ്ചുമണി ആയിട്ടുണ്ട്, പുലർകാലത്തിലെ സ്വപ്നം ഫലിക്കും എന്നാ കാരണവർ പറഞ്ഞിട്ടുള്ളത്. ഈശ്വരാ എന്റെ സ്വപ്നം സാക്ഷാത്കരിക്കണേ, മനസ്സുരുകി പ്രാർത്ഥിച്ചു.

അടുക്കളയിൽ തട്ടും മുട്ടും കേൾക്കുന്നുണ്ട് അമ്മയുടെ ശീലമാണ് അതിരാവിലെ എഴുന്നേൽക്കുന്നത്.
ജോലി ഉണ്ടെങ്കിലും ഇല്ലങ്കിലും. അടുക്കളയിലേക്ക് നടന്നു ,
അമ്മാ…
എന്ത് പറ്റി? രാവിലെ തന്നെ ഉണർന്നല്ലോ?

നല്ല കറിയുടെ വാസന എന്റെ ഉറക്കം കെടുത്തി അതാ വേഗം ഇങ്ങ് പോന്നത്,

ചിരിച്ചു കൊണ്ട് അമ്മ ചായ തന്നു.