അമ്മയുടെ ശരികൾ [ജ്വാല] 1324

അത് കുടിച്ച് പത്രവും വായിച്ചു കൊണ്ടിരുന്നപ്പോൾ അമ്മ പറഞ്ഞു നീ ആര്യയെ ഒന്ന് വിളിച്ചു താ, ഞാൻ അവളോട് സംസാരിക്കട്ടെ,
അപ്പോൾ തന്നെ ഫോൺ ഡയൽ ചെയ്ത് അമ്മയുടെ കൈവശം കൊടുത്തു.എന്താ സാർ, മറുവശത്ത് നിന്ന് ആര്യയുടെ ചോദ്യം സാർ അല്ല അവന്റെ അമ്മയാണ്…

അമ്മ …. അവൾ പകുതിയിൽ നിർത്തി.
മോളെ ഞങ്ങൾ ഞായറാഴ്ച വീട്ടിലേക്ക് വരുന്നുണ്ട്, അച്ഛനോട് പറയുക.

പിന്നെയും എന്തോ പറയാൻ ആര്യ തുടങ്ങും മുൻപേ അമ്മ പറഞ്ഞു, അവൻ എല്ലാ വിവരവും എന്നോട് പറഞ്ഞു, നിന്നെ അന്ന് അമ്പലത്തിൽ വച്ചു കണ്ടപ്പോഴേ ഞാൻ തീരുമാനിച്ചതാ നീ ഈ വീട്ടിലെ കുട്ടിയാണെന്ന്, ഈശ്വരൻ ഒരു വഴി ഇപ്പോഴാണ് തെളിച്ചു തന്നത് .

അവളുടെ സംസാരം എല്ലാം അമ്മയ്ക്ക് വളരെ ഇഷ്ടമായി, രണ്ടാളും കൂടി ചിരിച്ചു വർത്തമാനം പറയുന്നത് കേട്ടാൽ യുഗാന്തരങ്ങളായി ഒന്നിച്ചു ഇരുന്നവരാണെന്ന്, എനിക്ക് എന്തായാലും സന്തോഷം ആയി, എല്ലാ കടമ്പകളും കഴിഞ്ഞിരിക്കുന്നു. ഞാൻ പുറത്തേയ്ക്ക് നോക്കി.
എന്റെ കണ്ണുകൾ കൊണ്ട് കാണുന്നതെല്ലാം അതിമനോഹരം ഋതുക്കള്‍ തന്റെ വരവറിയിക്കാൻ തുടങ്ങി,
ഒപ്പം എന്റെ പ്രണയവും പൂക്കാന്‍ തുടങ്ങി.

ഞായറാഴ്ച ആകാൻ വേണ്ടിയുള്ള കാത്തിരുപ്പ്, ഓരോ നിമിഷങ്ങൾക്കും
ഇത്ര ദൈർഘ്യം ഉണ്ടെന്ന് തിരിച്ചറിഞ്ഞു.

ഞായറാഴ്ച രാവിലെ തന്നെ പുറപ്പെട്ടു, അമ്മയ്ക്കായിരുന്നു നിർബന്ധം രാഹുകാലത്തിനു മുൻപേ ഇറങ്ങണം എന്ന്, അതിലുപരി എന്നെക്കാൾ കൂടുതൽ സന്തോഷവും , അമ്മയുടെ ഏറെ നാളത്തെ വഴിപാടിനും, നേർച്ചകൾക്കും ഉപദേശങ്ങൾക്കെല്ലാം ഇന്നാണ് ഫലവത്തായത്.

കാർ നല്ല വേഗതയിൽ ആണ്, സമയം ഏകദേശം ഏഴ് മണി കഴിഞ്ഞിരിക്കുന്നു. കൊല്ലം കഴിഞ്ഞു മുന്നോട്ട് പോകുമ്പോൾ ആണ് ഒരു പരിചിതമല്ലാത്ത നമ്പറിൽ നിന്ന് ഫോൺ വന്നത് ഞാൻ കാർ റോഡിന്റെ വശം ചേർന്നു നിർത്തി, ഫോൺ എടുത്തു മറുവശത്ത് നിന്ന് ചോദ്യം
ഹലോ , അജിത് ബാലകൃഷ്ണൻ
അതെ,
ഞാൻ കൃഷ്ണൻ ബാലകൃഷ്ണന്റെ സുഹൃത്താണ് അച്ഛൻ മരിച്ചു,
മോനേ അറിയിക്കണം എന്ന് പറഞ്ഞു ഏൽപ്പിച്ചിരുന്നു ,

മോൻ വരില്ലേ?
വരാം,

കൃഷ്ണേട്ടാ എന്താ വേണ്ടത് എന്ന് വച്ചാൽ ചെയ്തോളൂ , ഒന്നിനും ഒരു കുറവ് വരുത്തണ്ട, ഞാൻ ഉടനെ എത്താം, എത്താനുള്ള വഴി പറഞ്ഞു തന്ന് കൃഷ്ണേട്ടൻ ഫോൺ കട്ട് ചെയ്തു.

എന്റെ മുഖഭാവം ശ്രദ്ദിച്ചിരുന്ന അമ്മ ചോദിച്ചു എന്താ?
അച്ഛൻ ,
പോയി അല്ലേ?

കണ്ണുകൾ നിറയാൻ വെമ്പി നിൽക്കുന്നു, ചുണ്ടുകൾ വിതുമ്പുന്നു, അമ്മയുടെ മുഖം ആകെ മാറി , മടിയിലേക്ക് തല ചായ്ച്ച് ഇരുന്നു,

അമ്മേ … പിടിച്ചു നിൽക്കാൻ കഴിയാതെ അമ്മ പൊട്ടി കരഞ്ഞു. അഞ്ചുമിനിറ്റ് മാത്രം അതിനു ആയുസ് ഉണ്ടായിരുന്നുള്ളൂ