ശ്രാവണി 3

Sravani Part 3 | Author : Shana | Previous Part

കാവിൽ  നാഗങ്ങൾക്ക് നൂറും പാലും നേദിച്ചു വിളക്ക് വെച്ച് പ്രാർത്ഥിച്ചു തിരിച്ചു മടങ്ങുകയായിരുന്നു വല്യമ്മാവൻ. തറവാട്ടിലേക്ക് നടന്നുനീങ്ങുന്ന വല്യമ്മാവനെ നോക്കി ദേവമ്മ പല്ലുകൾ ഞെരിച്ചുകൊണ്ട് മനസ്സിൽ ഉരുവിട്ടു…

“ഇല്ല നീ എത്ര പൊതിഞ്ഞുപിടിച്ചാലും ഞാൻ എന്റെ ആഗ്രഹം നടത്തിയിരിക്കും നിനക്ക് ചെയ്യാൻ പറ്റുന്നതൊക്കെ നീ ചെയ്തോ  അന്തിമ വിജയം എനിക്കുമാത്രമായിരിക്കും ……”

അശരീരി കേട്ടപോലെ അയാൾ തിരിഞ്ഞു ദേവമ്മയെ നോക്കി..അയാളുടെ മുഖത്ത് പുച്ഛഭാവം നിഴലിച്ചു … കണ്ണുകളിൽ കൗശലക്കാരന്റെ ഭാവം ഒളിപ്പിച്ചു അവരെ ഒന്ന് നോക്കി

“നീ കളിക്കാവുന്നടുത്തോളം കളിച്ചോ… നിയും ഞാനും നേർക്കുനേർ വരുമ്പോൾ വിജയം ആർക്കാണെന്ന്  കണ്ടറിയാം. ഞാൻ തീരുമാനിച്ചതെ നടക്കു എന്റെ ലക്ഷ്യങ്ങളും നിന്നെ ഒരിക്കലും ജയിക്കാൻ ഞാൻ അനുവദിക്കില്ല” അയാളുടെ മനസ്സ് മന്ത്രിച്ചു

അവരെ ഒന്ന് നോക്കിയശേഷം അയാൾ തിരിച്ചു  തറവാട്ടിലേക്ക് നടന്നു,തൊടിയിലേക്കു കടക്കുന്നിടത്തു വച്ചു ചിരികളികളോടുകൂടി ശ്രാവണി വരുന്നത് കണ്ടു.. വാലുപോലെ അനുവും ധനുവുമുണ്ട്..

“എങ്ങോട്ടാ മൂന്നു പേരും കൂടി   വല്യമ്മാവൻ ശബ്ദം കനപ്പിച്ചു ചോദിച്ചു”

“കാവിൽ പോയി  തൊഴാൻ മുത്തശ്ശി പറഞ്ഞു ” അനു കുറച്ചു പേടിയോടെ മറുപടി പറഞ്ഞു

“മ്മ് പോയി തൊഴുതു പെട്ടന്ന് മടങ്ങുക…. അവിടെയും ഇവിടെയുമൊന്നും ചുറ്റിത്തിരിയണ്ട, കുട്ടിക്കിവിടെ പലതും കൗതുകമായി തോന്നും ഓരോന്നും  കണ്ട് അതിന്റെ പിറകെ പോകാതെ പോയകാര്യം കഴിഞ്ഞു വരിക, പറഞ്ഞത് മനസ്സിലായോ ” ശ്രാവണിയെ നോക്കി അയാൾ ചോദിച്ചു

മനസ്സിലായെന്ന മട്ടിൽ തലയാട്ടികൊണ്ട് അവൾ  മുന്നോട്ട് നടന്നു  അവർ പോകുന്നത്  നോക്കി അയാൾ കോലായിലേക്കു കയറി..

“ചേച്ചി എന്നാലും ചേച്ചിയെന്താ ആരെയും സ്വപ്നം കാണാത്തത്  അവൾ പറഞ്ഞല്ലോ അങ്ങനെ കാണുമെന്നു” അനു സംശയത്തോടെ ചോദിച്ചു