ശ്രാവണി 3 [Shana] 185

സ്നേഹത്തോടെയുള്ള ക്ഷണം സ്വീകരിക്കാതിരിക്കാൻ ശ്രാവണിക്കും തോന്നിയില്ല.. ആ നിമിഷം വല്യമ്മമ്മയെയും വാക്കുകളെയും അവൾ മറന്നു

ദേവമ്മയുടെ കൂടെ ചെന്നെങ്കിലും ഉള്ളിലിരുന്ന് ആരോ പോകരുതെന്ന് പറയുന്നതുപോലെ ശ്രാവണിക്ക് തോന്നി…

വാ മോളെ ഇവിടിരിക്ക്  ദേവമ്മ അവളെ കട്ടിലിൽ പിടിച്ചിരുത്തി, കുടിക്കാനായി മഞ്ഞൾഇട്ടു തളപ്പിച്ച പാൽ കൊടുത്തു..കുടിച്ചോ നല്ല രുചിയാണ്… പ്രത്യേക ഗന്ധവും രുചിയുമുള്ള പാൽ അവൾക്കു ഒരുപാട് ഇഷ്ടപ്പെട്ടു…

മോൾക്കൊരു കൂട്ടം കാണിച്ചു തരട്ടെ…

മ്മ്… അവൾ ദേവമ്മയോട് ചേർന്നിരുന്നു… എന്തോ പറഞ്ഞറിയിക്കാനാവാത്ത പ്രത്യേക ഇഷ്ടം അവരോടു തോന്നിതുടങ്ങി..

കട്ടിലിനടിയിൽ നിന്നും മഞ്ഞ പട്ടുകൊണ്ട് മൂടിയ ചെമ്പു പട്ടകൾ കൊണ്ട് ചിത്രപണി ചെയ്ത വലിയൊരു പെട്ടി വലിച്ചു പുറത്തേക്കെടുത്തു..
പ്രത്യേക തരത്തിലുള്ള ചിത്രപൂട്ടു ഘടിപ്പിച്ച അതിലെ പുഷ്പങ്ങൾക്ക് സമാനമായ ഭാഗങ്ങളിൽ വിരലുകൾ ചിത്രങ്ങൾ തീർത്തപ്പോൾ പെട്ടിയുടെ പൂട്ട് മണി കിലുങ്ങുന്ന ശബ്ദത്തിൽ വേർപെട്ടു…

ശ്രാവണിക്ക് ഓരോ കാഴ്ചകളും അത്ഭുതമായിരുന്നു..പെട്ടിത്തുറന്നപ്പോൾ കൈതപ്പൂവിന്റെ യും ഇലഞ്ഞി പൂവിന്റെയും പ്രത്യേക ഗന്ധം അവിടെ നിറഞ്ഞു… തുറന്ന പെട്ടിക്കുള്ളിൽ കരിഞ്ഞുണങ്ങിയ ഇലഞ്ഞി പൂമാലകൾ വാഴനാരിൽ കൊരുത്തു വച്ചിരിക്കുന്നു..

ദേവമ്മക്കും ഇഷ്ടമാണോ ഇലഞ്ഞിപ്പൂക്കൾ  അവൾ ആശ്ചര്യത്തോടെ ചോദിച്ചു

ആർക്കാ ഇഷ്ടമാകാത്തത്… എല്ലാർക്കും ഇഷ്ടമാണല്ലോ… ഞാനും ഇടക്ക് കോർത്തുവെക്കും  മാലകളെ തഴുകിക്കൊണ്ട് പറഞ്ഞു.

മോൾക്ക്‌ ദേവമ്മയെ ഇഷ്ടാണോ ….

എനിക്ക് ഇഷ്ടമാണല്ലോ നിഷ്കളങ്കമായി അവൾ മറുപടി കൊടുത്തു