💘 അരികത്തായാരോ – 1💘 വിച്ചു [ ചെകുത്താനെ സ്നേഹിച്ച മാലാഖ ] 761

” അജൂ …. നീ വരുമെന്ന് ഞാൻ ഒട്ടും പ്രതീക്ഷിച്ചില്ല … കോൺഡാക്ട് ചെയ്യാൻ വേറെ വഴിയില്ലാതെ അവസാനത്തെ ശ്രമമെന്ന നിലയിലാ നിന്റെ മെയിൽ ഐഡി തപ്പിയെടുത്ത് അതിലേയ്ക്ക് മെയിൽ അയച്ചത് … നീ …. നീ എവിടെയായിരുന്നു ഇത്രയും നാൾ ? എന്ത് കോലമാടാ ഇത് ? ….. ”

ആകാംഷ നിറഞ്ഞ മുഖത്തോടെ അവൻ ചോദിച്ചു , സന്തോഷം കൊണ്ട് അവന്റെ കണ്ണുകളിലെവിടെയോ അൽപ്പം കണ്ണുനീർ പൊടിഞ്ഞതുപോലെ എനിക്ക് തോന്നി .

” യദൂ …. എവിടെയായിരുന്നാലും ഈ ദിവസം ഞാനിവിടെ എത്തേണ്ടതല്ലേ … കാരണം ഇവിടെ അല്ലേ എന്റെ ജീവിതം മുഴുവൻ ഉള്ളത് . ”

ഒരു പുഞ്ചിരിയോടെ ഞാൻ അവനോട് പറഞ്ഞു .

അവിടെ കൂട്ടം കൂടി നിന്നവർ , എന്റെ സഹപാഠികളും സുഹൃത്തുക്കളും അങ്ങനെ എല്ലാവരും എന്റെ അടുത്തേയ്ക്ക് വന്നു . അവരുടെ എല്ലാവരുടേയും മുഖത്ത് എന്നെ കണ്ടതിലുള്ള സന്തോഷവും ഒപ്പം എന്നോ ചോദിക്കാൻ ബാക്കി വച്ച ചില ചോദ്യങ്ങളും ഉണ്ടായിരുന്നു …..

ഞാൻ യദുവിന്റെ മുഖത്തേയ്ക്ക് നോക്കി .

” അജൂ …. നിന്റെ മാനസ്സിക അവസ്ഥ എനിക്ക് മനസ്സിലാകും . നീ അകത്തേയ്ക്ക് പൊയ്ക്കോ ….. വർഷങ്ങൾക്ക് ശേഷമല്ലേ ഇവിടേയ്ക്ക് , അൽപ്പനേരം മൈന്റ് ഫ്രീയാക്കി ക്യാമ്പസ് മുഴുവൻ ഒന്ന് ചുറ്റി നടക്ക് … ആരും നിന്നെ ശല്യം ചെയ്യാൻ വരില്ല , പൊയ്ക്കോ …. ”