മനസ്സിൽ തോന്നിയ ഒരു ചെറിയ തീം അത് ഒരു കഥയായി ഞാൻ ഇവിടെ എഴുതുകയാണ് . ഇത് കഥയുടെ ആദ്യഭാഗമാണ് , തുടർന്നുള്ള ഭാഗങ്ങൾ സമയം പോലെ എഴുതി ഇടാം . സ്നേഹത്തോടെ ….

💘അരികത്തായാരോ – 1💘
Arikathayaro…  Part -1 

Author : വിച്ചു [ചെകുത്താനെ സ്നേഹിച്ച മാലാഖ] 

View post on imgur.com

…………………………

ജീവിതം ! ഒട്ടും പ്രതീക്ഷിക്കാത്ത സംഭവങ്ങളുടെ ചെറിയ ഒരു കൂടാരമെന്ന് ആരോ പറഞ്ഞ് കേട്ടിട്ടുണ്ട് . എത്ര നിയന്ത്രിക്കാൻ ശ്രമിച്ചാലും കെട്ട് പൊട്ടിയ പട്ടം പോലെ അതിങ്ങനെ കാറ്റത്ത് പാറി പറന്ന് നടക്കും ….

…………………………

കേരളത്തിലെ ഒരു പ്രസിദ്ധമായ കോളേജ് . ആ കോളേജിന്റെ കവാടം കടന്ന് ഒരു ടാക്സി കാർ മെല്ലെ അകത്തേയ്ക്ക് നീങ്ങി …. ആ കോളേജ് ക്യാമ്പസ് മനോഹരമായി ചെറിയ രീതിയിൽ അലങ്കരിച്ചിട്ടുണ്ട് , പക്ഷെ അത് പുതിയ വിദ്യാർത്ഥികളെ സ്വീകരിക്കാനല്ല . പകരം വർഷങ്ങൾക്ക് മുൻപ് കലാലയ ജീവിതം കഴിഞ്ഞ് അവിടെ നിന്നും പടിയിറങ്ങിയവരുടെ ഒരു ഒത്തുചേരൽ . ഒരു പൂർവ്വ വിദ്യാർത്ഥി സംഗമം .

വർഷങ്ങൾക്ക് മുൻപ് അവിടെ നിന്ന് പടിയിറങ്ങിയവരിൽ മിക്കവരും കുടുംബമായി തന്നെ ആ കോളേജ് ക്യാമ്പസിൽ എത്തിയിട്ടുണ്ട് . എല്ലാവരും വീണ്ടും ഒത്തുചേർന്നപ്പോൾ ആ കോളേജ് ക്യാമ്പസ് ആ പഴയ കാലത്തേയ്ക്ക് പോയത് പോലെ . എല്ലാവരുടേയും മുഖത്ത് അളവില്ലാത്ത സന്തോഷവും ആകാംഷയും കളിയും ചിരിയും ഒക്കെ നിറഞ്ഞ് നിൽക്കുന്നു . ക്യാമ്പസിന്റെ പല ഭാഗത്തായി കൂട്ടം കൂടി നിന്ന് ആ പഴയ വിദ്യാർത്ഥികൾ സൗഹൃദം പുതുക്കുകയും വിശേഷങ്ങൾ പങ്കുവയ്ക്കുകയും ചെയ്യുകയാണ് …