?The Hidden Face? [ പ്രണയരാജ ] 592

ഇല്ല മാഡം

അതെങ്ങനാ ബോധം വേണ്ടെ, തന്നെ ജോലി ഏൽപ്പിച്ചവരെ  പറഞ്ഞാ മതി.

മാഡം,

അവൾ അവനെ ദേഷ്യത്തിൽ തന്നെ തുറിച്ചു നോക്കി ഒരു വിധം പാൻ്റിൻ്റെ പോക്കറ്റിൽ നിന്നും താക്കോൽ എടുത്ത് അവൻ ഡോർ തുറന്നു. അവൾ അവനെ ഒന്ന് കൂടെ തുറിച്ചു നോക്കിയ ശേഷം അകത്തേക്കു കയറി. അമ്മ അവനെ നോക്കി ഒന്നു പുഞ്ചിരിച്ചു. എന്നാൽ അവനു പുഞ്ചിരിക്കാനായില്ല.

പേടിക്കണ്ട മോനെ, ഈ ചെറുപ്രായത്തിലെ ഇങ്ങനെ കുടിക്കരുത് കേട്ടോ. .

ഞാൻ കുടിച്ചിട്ടില്ല അമ്മേ…

എന്തിനാ മോനെ കള്ളം പറയുന്നെ, അവൾക്ക് കള്ളം പറയുന്നത് കേട്ടാൽ കലിയിളകും.

സത്യായിട്ടും കുടിച്ചിട്ടില്ല അമ്മേ.. ഇന്നലെ 3 മണി കഴിഞ്ഞു കിടക്കാൻ, അതാ അറിയാതെ പോയത്.

അവനെ നോക്കി ഒന്നു കൂടെ പുഞ്ചിരിച്ച ശേഷം അവൻ സാധനങ്ങൾ ഇറക്കാൻ പോട്ടർമാരെ വിളിച്ചു സാധനങ്ങൾ ഒക്കെ ഇറക്കി കഴിഞ്ഞതും അർച്ചന പുറത്തേക്കെത്തി.

എത്രയായി,

11000,

എന്ത് 8000 തരാം അതിൽ കൂടുതൽ പറ്റില്ല,

ദേ… പോലീസുകാരുടെ സ്വഭാവം കാണിക്കരുത് കാരാറാക്കിയിട്ടാ ഞങ്ങൾ വന്നത്.

ആരോട്

ദേ ഈ സാറിനോട്,

തനിക്കൊരു കാര്യം നേരാവണ്ണം ചെയ്യാനറിയില്ലെ,

അത് മാഡം ഞാൻ,

ദാ.. പിടിക്ക്, ബാക്കി താൻ എന്താ വെച്ചാ ചെയ്യ്.

അതും പറഞ്ഞ് 8000 രൂപ അവൾ അരവിന്ദൻ്റെ കയ്യിൽ കൊടുത്ത് അകത്തേക്ക് പോയി.

സാറെ,

അവർ അരവിന്ദനെ തന്നെ നോക്കിയതും അവൻ വേഗം തൻ്റെ പെഴ്സിൽ നിന്നും 3000 എടുത്ത് അവർക്കു കാശ് കൊടുത്തു. അത് അർച്ചനയും കണ്ടിരുന്നു. അവൾ നേരെ അടുക്കളയിലേക്ക് പോയി.

ഇവനെയൊക്കെ ആരാ പോലീസിലെടുത്തത്, അവരെ പറഞ്ഞാ മതി.

നീയിനെന്താ പറയുന്നെ,

ആ കോൺസ്റ്റബിളിൻ്റെ കാര്യമാ അമ്മേ… ഒരു കാര്യം നേരെ ചെവ്വെ ചെയ്യാനറിയില്ല. പോട്ടർമാരോട് 11000 കരാറാക്കിയിരിക്കുന്നു.

എന്നിട്ട്,

എന്നിട്ടെന്താവാൻ ഞാൻ 8 K കൊടുത്തു ബാക്കി 3 K അവൻ തന്നെ കൊടുത്തു. കൊടുക്കട്ടെ തോന്നിവാസം കാണിച്ചിട്ടില്ലെ.

അതിനെ കണ്ടിട്ടു ഒരു പാവത്തിനെ പോലെ തോന്നുന്നു.

അമ്മ എനിയും പഠിച്ചില്ലെ, നിങ്ങൾ ഒരിക്കലും നന്നാവില്ല.

എന്നാലും മോളെ, നീ ആ കാശു തിരിച്ചു നൽകണം.