👥The Hidden Face👥 [ പ്രണയരാജ ] 591

മോനെ നമ്മൾ
പോലീസുകാർ, ആരോടും അടുക്കരുത്, ഒരു സ്ഥലത്തിനോടും, ഭരണത്തിൽ ഇരിക്കുന്നവർ അവർക്ക് വേണ്ടവരെ കൊണ്ടു വരാനും വേണ്ടാത്തവരെ ഒഴുവാക്കാനും ആയി അങ്ങോട്ടും ഇങ്ങോട്ടും തട്ടി കളിക്കും അതൊക്കെ പതിവാ..

എന്നാലും , രാജേട്ടാ…

ഒരെന്നാലും ഇല്ല ചെക്കാ… നീ ഇങ്ങനെ പവത്താനാവല്ലെ നീ ഒരു പോലീസുകാരന അതു മറക്കരുത്.

പിന്നെ, അതെനിക്കറിയില്ലെ.

അതു കേട്ടതും രാജേട്ടൻ പൊട്ടി ചിരിച്ചു.

രാജേട്ടനും എന്നെ കളിയാക്കാൻ തുടങ്ങി അല്ലെ.

അവൻ്റെ മുഖത്ത് വിഷാദം നിറഞ്ഞത് അയാൾക്കും താങ്ങാനായിരുന്നില്ല.

ചിരിയടക്കാൻ കഴിഞ്ഞില്ല മോനെ, അല്ലാതെ നിന്നെ കളിയാക്കാൻ വേണ്ടിയല്ല.

എനിക്കറിയാം രാജേട്ടാ… ഞാനിങ്ങനെയായി പോയി എന്തു ചെയ്യാനാ… എന്തോ ഒരു ഭാഗ്യം ഈ ജോലി കിട്ടി.

നീ ഇങ്ങനെ തളരല്ലെടാ ചെക്കാ…

ഉം…

ആ മോനെ നാളെ ചാർജ് എടുക്കുന്നത് അർച്ചന മാഡമാ…

പെണ്ണാണോ…

പെണ്ണാണെന്നു കരുതി ഒരു മയവും പ്രതീക്ഷിക്കണ്ട, വല്ലാത്ത ഒരു സാധനമാണെന്നാ കേട്ടത്.

രാജേട്ടാ…

അതെടാ… ചെക്കാ… അതിന് ആണുങ്ങളോട് കലിപ്പാ… പിന്നെ ചെറിയ തെറ്റിനും വലിയ ശിക്ഷയാണെന്നാ കേട്ടത്.

പണിയാവോ…

കൊറെ എണ്ണത്തിന് സസ്പൻഷൻ ഉറപ്പാ… പിന്നെ നീ സൂക്ഷിച്ചോ…

അതെന്താ… രാജേട്ടാ….
.
ആളെ കാണാൻ നല്ല ഭംഗിയുണ്ടെന്നാ കേട്ടത്. നീ കൂടുതൽ സമയം മാഡത്തോടൊപ്പം ഉണ്ടാവുക, നോട്ടത്തിലോ മറ്റോ എന്തെങ്കിലും പിഴവുണ്ടായ പണി പോകും അതോർത്താ നന്ന്.

ഈ പണി പോയാ ശരിയാവില്ല. ഞാൻ നോക്കി കൊള്ളാം.

എന്തുണ്ടായാലും പിടിച്ചു നിക്കാൻ നോക്ക്.

എന്നാ മോനെ ഞാൻ പോവാ… നിനക്കിവിടെ നിന്നേ പറ്റൂ…

അറിയാം, രാജേട്ടാ… വല്ലാത്ത കഷ്ടാ.. അമ്മയെ അടുത്ത വീട്ടിലെ ഏച്ചിയെ ഏൽപ്പിച്ചാ ഞാൻ വന്നത്. എൻ്റ ഒരു ഗതികേട്.

രാജേട്ടൻ, പതിയെ യാത്രയായി, പുതിയ സിറ്റി കമ്മിഷ്ണർ അർച്ചന Ips പുലർച്ചെ , ഗസ്റ്റ് ഹൗസിൽ എത്തും അവരെ സ്വീകരിക്കേണ്ടതും വേണ്ട സഹായം നൽകേട്ടതിൻ്റെയും ചുമതല എൻ്റെ തലയിലായി.

കൊലായിൽ ഒരു വിരി വിരിച്ചു ഞാൻ കിടന്നു. പുറത്തെ തണുപ്പും, കൊതു കടിയും വല്ലാത്ത ഒരു ഗതികേട് എങ്ങനെയോ ഒന്നു ഉറക്കം പിടിച്ചു.