❤️ദേവൻ ❤️part 13 [Ijasahammed] 286

“” ഞാൻ രോഹിത്തിന് അയച്ച മെസ്സേജ് ഒരു ട്രാപ് ആണെന്ന് മനസ്സിലാക്കിയതും, ഭയന്ന് പോലീസിന് കീഴടങ്ങാൻ നിന്ന രോഹിത്തിനെ, അതിൽനിന്നും പിന്തിരിപ്പിക്കാൻ നോക്കിയിട്ടും നടക്കാതെ വന്നപ്പോൾ, ചെയ്തുകൂട്ടിയ തെറ്റുകൾക്ക് പോംവഴിയായി അവൻ കണ്ട വഴി അത് മാത്രമായിരുന്നു..

രോഹിത്തിനെ ബാക്കി വെച്ചാൽ ഭാവിയിൽ തന്നിലേക്ക് ആ കുറ്റം നീളുമെന്ന് ഭയന്നു ആ രാത്രിയിൽ അവനെ കൊല്ലാൻ നോക്കിയതും, ന്റെ വീട്ടിൽകയറി അച്ചുവിനെയും, തടയാൻ ചെന്ന അമ്മിണിയമ്മയെ കൊന്നൊടുക്കിയതും അവനാണ്..

പ്രണവ്..

കഴിഞ്ഞ മൂന്ന് കൊല്ലങ്ങളായി ഞാൻ തിരയുന്നത് അവനെ മാത്രമാണ്…

അവനിൽനിന്നൊരു മടക്കമുണ്ടെങ്കിൽ അത് തൂക്കുകയറിലേക്ക് മാത്രാവും….

അതുകൊണ്ട് നിന്നെ സ്നേഹിക്കാൻ ഞാനൊരുക്കവല്ല…

പറഞ്ഞു നിർത്തിയ ദേവേട്ടന് അരികിലായി ചെന്നു നിന്നു കൊണ്ട്ഞാൻ ചോദിച്ചു….

“ഞാൻ കൂടെവേണം ന്ന് ആഗ്രഹിക്കണില്ലേ…?? ”

“നിനക്ക് എത്ര പറഞ്ഞാലും മനസ്സിലാകാത്തെ എന്താ… “”

നടത്തം നിറുത്തികൊണ്ട് വീണ്ടും തലയിൽ കൈ വെച്ച് പടിയിൽ വന്നിരുന്നു  ഇല്ലെന്ന് പറയാൻ ഒരുങ്ങി നിക്കണ ദേവേട്ടന്റെ അടുത്തു ചെന്നു ആ മുഖം കൈയിലെടുത്തു കൊണ്ട്  ആ ചോദ്യം ചോദിച്ചു..

“ന്നെ വേണ്ടേ…?? ”

രണ്ടാമതായി വീണ്ടും ആ ചോദ്യം ചോദിക്കുമ്പോൾ തൊണ്ട വിറച്ചിരുന്നു.. ശബ്ദം ഇടറിയിരുന്നു…

കണ്ണിലേക്കു ആഴത്തിൽ ഇമചിമ്മാതെ നോക്കിനിന്ന ദേവേട്ടൻ ഒന്നും പറയാൻ വയ്യാതെ കണ്ണിലേക്കു തന്നെ ഉറ്റുനോക്കി കൊണ്ടിരുന്നു…

മൂക്കിലെ മൂക്കുത്തിമേൽ പതുക്കെ ആ വിരലുകൾ തൊട്ടു..

കണ്ണുനീർ ഒലിച്ചിറങ്ങുന്ന എന്റെ കവിളിൽ പതിയെ ആ കൈകൾ വെച്ചുകൊണ്ട് മിണ്ടാതെ നിക്കുന്ന ദേവേട്ടന്റെ ഉള്ളിലുണ്ടായ
വേദനയുടെ കനലിളക്കം ഞാൻ അറിഞ്ഞു…

ആ കണ്ണ് നിറഞ്ഞുവന്നു…

ഉള്ള് വീണ്ടും പിടഞ്ഞു…

കവിളിൽ നിന്നും കൈഎടുത്തു തലതിരിച്ചു കൊണ്ട് എഴുന്നേൽക്കാൻ നിന്ന ദേവേട്ടന്റെ കൈ ഞാൻ വീണ്ടും കവിളിൽ ചേർത്ത് വെച്ചു തേങ്ങി…