വൈഷ്ണവം (അവസാന ഭാഗം) മാലാഖയുടെ കാമുകൻ 1452

തേൻമൊഴി അവളെ ഒന്ന് പുച്ഛിച്ചു..

അപ്പോഴും അവൾ ഒന്നും മിണ്ടിയില്ല..

നോട്ടം വിഷ്ണുവിലേക്ക് ചെന്നു..

അതെ നിമിഷം ആണ്‌ വിഷ്ണു അവളെ ഒന്ന് നോക്കിയത്..

അവൻ പെട്ടെന്ന് നോട്ടം മാറ്റിക്കളഞ്ഞു..

“തിരിച്ചു കൊണ്ട് വിട് വിഷ്ണു.. അവൾക്ക് ഒന്നും പറയാൻ ഇല്ല.. അപ്പോൾ എല്ലാം പറഞ്ഞത് പോലെ..

അടുത്ത മാസം തന്നെ നമ്മുടെ കല്യാണം നടത്തണം..

ഇനിയും നീട്ടാൻ പറ്റില്ല..”

തേൻമൊഴി വിഷ്ണുവിനോട് പറഞ്ഞപ്പോൾ വൈഷ്ണവി ഒന്ന് നിലത്തേക്ക് നോക്കി തല കുനിച്ചു..

“മോളുടെ കാര്യം എന്ത് ചെയ്യും..? ഇടക്ക് വന്നു കണ്ടോട്ടെ അല്ലെ..?”

“നിർത്തഡീ…!!!”

തേൻമൊഴി അത് പറഞ്ഞു തീർന്നതും വൈഷ്ണവിയുടെ അലർച്ച അവിടെ മുഴങ്ങി.

വിഷ്ണുവും തേൻമൊഴിയും ഞെട്ടി അവളെ നോക്കി..

“കുറെ നേരമായല്ലോ നീ തുടങ്ങിയിട്ട്…?”

വൈഷ്ണവിക്ക് നന്നായി ദേഷ്യം വന്നിരുന്നു….

അവൾ ചാടി എഴുന്നേറ്റു..

“എന്റെ മോളുടെ കാര്യങ്ങൾ തീരുമാനിക്കാൻ ഇവിടെ ഈ ഞാനുണ്ട്.. വിഷ്ണുവിന്റെ വേണ്ടപ്പെട്ട ആളാണെന്നു കരുതിയാണ് ഇത്ര നേരം ക്ഷമിച്ചതും..

നീ ആരായാലും എന്റെ കാര്യത്തിൽ ഇടപെടാൻ നിൽക്കരുത്.. കേട്ടോടീ..?

പിന്നെ ഇവനെ അത്രക്ക് സ്നേഹിച്ചിരുന്നത് കൊണ്ടാണ് അവന്റെ കുട്ടി എന്റെ വയറ്റിൽ വളർന്നത്.. അല്ലാതെ ബോധം പോയി കണ്ടവന്റെ കൂടെ കിടക്കുന്നവൾ അല്ലാ ഈ വൈഷ്ണവി..

പിന്നെ.. രണ്ടുപേർക്കും അത്രക്ക് ആഗ്രഹം ആണെങ്കിൽ അങ്ങ് കെട്ടിക്കോ..

എന്തേലും കാണിക്ക്.. പക്ഷെ എന്റെ മോളെ കിട്ടുമെന്ന് സ്വപ്നത്തിൽ പോലും കാണണ്ട..!”

അവൾ അതും പറഞ്ഞു വിഷ്ണുവിനെ ഒന്ന് ഇരുത്തി നോക്കിയ ശേഷം ബൈക്ക് വന്ന വഴിയേ സ്പീഡിൽ നടന്നു..

വിഷ്ണു ഒരു നിമിഷം അവൾ പോയ വഴിയേ നോക്കി..

അതിന് ശേഷം ഒന്നും മിണ്ടാതെ ബൈക്ക് സ്റ്റാർട്ട്‌ ആക്കി..

തിരിച്ചു ഓടിച്ചു..