മാന്ത്രികലോകം 1 [Cyril] 2319

അഭ്യസനം പൂര്‍ത്തിയാക്കി ഈ ലോകത്ത് വരുന്ന യോദ്ധാക്കളേയും മാന്ത്രിക മാരെയും എന്റെ മാന്ത്രിക ശില്‍പങ്ങള്‍ ആണ് പരീക്ഷിക്കുന്നത്. നിനക്കെന്നെ ‘ശില്‍പ്പി’ എന്നു വിളിക്കാം.”

“അപ്പോ നിങ്ങളുടെ സഹോദരന്റെ പേരും ശില്‍പ്പി എന്നാണോ?” കൗതുകത്തോടെ ഞാൻ ചോദിച്ചു.

“തല്‍കാലം എന്റെ സഹോദരന്റെ കാര്യം ഇവിടെ ഒഴിവാക്കാം….” ശില്‍പ്പി തെല്ല് ദുഃഖത്തോടെ പറഞ്ഞു.

“പക്ഷേ എന്റെ പരീക്ഷണം നേരിടാൻ അല്ല ഞാന്‍ ഇപ്പോൾ ഇവിടെ വന്നത്….! എന്റെ അഭ്യസനം പോലും ഇതുവരെ പൂര്‍ത്തിയായില്ല. ഭീതിയുടെ ഗുഹ എന്നെ സ്വാധീനിച്ച് ഇവിടെ വരുത്തി…. അല്ലാതെ എന്റെ സ്വന്തം ഇഷ്ടപ്രകാരം അല്ല ഞാനിവിടെ വന്നത്.” പരിഭ്രാന്തിയോടെ ഞാൻ പറഞ്ഞു.

ശില്‍പ്പി ഉടനെ എന്നെ സൂക്ഷ്മതയോടെ നിരീക്ഷിച്ചു. അയാളുടെ മുഖത്ത് സംശയത്തിന്റെ നിഴല്‍ പടരുന്നത് ഞാൻ കണ്ടു. എന്റെ മനസ്സിനെ വായിക്കാൻ എന്ന പോലെ അയാൾ എന്റെ കണ്ണില്‍ തുളയ്ക്കുന്നത് പോലെ നോക്കി.

“വിധി പ്രകാരം ഇപ്പോൾ നി എന്നെ തിരഞ്ഞെടുത്ത് കഴിഞ്ഞിരിക്കുന്നു…. നിന്റെ പരീക്ഷണം തുടങ്ങുക അല്ലാതെ ഇനി ഒരിക്കലും എനിക്കോ നിനക്കോ ഇതില്‍ നിന്നും പിന്മാറാൻ കഴിയില്ല. പോരാട്ടം തുടങ്ങുന്നതിന് മുന്നേ അതിനെ അവസാനിപ്പിച്ചാൽ നിനക്ക് ഈ ലോകത്തെ വിട്ട് പോകാൻ കഴിയില്ല…. പക്ഷേ മറ്റു പലർ ചെയ്തത് പോലെ പോരാട്ടത്തിന്റെ ഇടയില്‍ നിനക്ക് തോല്‍വി സമ്മതിക്കാന്‍ കഴിയും…”

അതും പറഞ്ഞ്‌ ശില്‍പ്പി അയാളുടെ കൈ മുന്നോട്ട് നീട്ടിയതും കാഴ്ചക്ക് ഒരേ പോലത്തെ രണ്ട് വാളുകൾ അയാളുടെ കൈയിൽ പ്രത്യക്ഷപ്പെട്ടു.

പെട്ടന്ന് അയാളുടെ മുഖത്ത് സംഭ്രമം മിന്നിമറഞ്ഞു.

“നി മറ്റുള്ളവരെ പോലെയല്ല — നിന്റെ ആത്മാവിലും രക്തത്തിലും എന്തോ വെത്യസ്ത്തത ഞാൻ അനുഭവപ്പെടുന്നു….. അത് എന്താണെന്ന് മനസ്സിലാക്കാൻ കഴിയുന്നില്ല….,

പക്ഷേ എല്ലാ ആയുധങ്ങളിലും ഒരുപോലെ നി പരിശീലനം നേടുന്നു എന്ന് ഞാൻ മനസ്സിലാക്കുന്നു. എല്ലാവർക്കും അത് സാധ്യമാവില്ല…. പിന്നെ നി ഒരു മാന്ത്രിക—”

“പക്ഷേ ഞാൻ നിങ്ങളെ എപ്പോഴാണ്…. എങ്ങനെയാണ് ഈ പോരാട്ടത്തിന് വേണ്ടി തിരഞ്ഞെടുത്തത്?” ഇടക്ക് കേറി സംശയത്തോടെ ഞാൻ ചോദിച്ചു.

“ശില്‍പ്പലോകത്ത് പരീക്ഷണങ്ങളെ നേരിടാന്‍ വരുന്നതിന് മുന്നോടിയായി നിങ്ങളുടെ ആചാര്യന്‍മാര്‍ അവർക്ക് ഈ ലോകത്തെ കുറിച്ചുള്ള സകല വിധികളേയും വ്യക്തമായി പറഞ്ഞ്‌ ബോധ്യപ്പെടുത്തി കൊടുക്കുന്നതാണ് പതിവ്. പക്ഷേ നിന്റെ വരവ് അകാലപക്വമായ ഒന്നാണെന്ന് ഞാൻ മനസ്സിലാക്കുന്നു.