പ്രാണേശ്വരി 12 [പ്രൊഫസർ ബ്രോ] 523

“ഏയ്യ് ഞാൻ അതൊക്കെ അപ്പോഴേ മറന്നു… താൻ അതോർത്തു വിഷമിക്കേണ്ട ”

ഇവരൊക്കെ കഴിഞ്ഞ കാര്യങ്ങൾ ഇത്രപെട്ടെന്ന് എങ്ങനെ മറക്കുന്നോ എന്തോ…എനിക്ക് അവനോട് പഴയ ദേഷ്യം ഇല്ലെങ്കിലും അവനോട് ക്ഷമിക്കാൻ പറ്റുന്നില്ല… അല്ലെങ്കിൽ അതിന് എന്റെ ഈഗോ സമ്മതിക്കുന്നില്ല എന്നുള്ളതാണ് സത്യം

“അഖിലേ… എന്നോട് ക്ഷമിക്കണം ഞാൻ അറിയാതെ… ”

അവന് പറയുന്നത് മുഴുവനാക്കാൻ സാധിച്ചില്ല അവന്റെ വാക്കുകൾ ഇടറി കണ്ണുനീർ കവിളിൽ കൂടി ഒഴുകിയിറങ്ങി.

എന്ത് മറുപടി പറയണം എന്നറിയാതെ നിന്ന എന്നോട് ആന്റി എന്തൊക്കെയോ കണ്ണുകൾ കൊണ്ട് കാണിക്കുന്നുണ്ട് എനിക്കൊന്നും മനസ്സിലായില്ല

എന്നെ കയ്യിൽ പിടിച്ച് അവനോട് ചേർത്ത് നിർത്തിയപ്പോഴാണ് അവനെ സമാധാനിപ്പിക്കാനാണ് പറഞ്ഞത് എന്ന് മനസ്സിലായത്

നിതിന്റെ അടുത്ത് നിന്നിട്ടും അവനോട് ഞാൻ ഒന്നും സംസാരിക്കുന്നില്ല എന്ന് കണ്ടതും ആന്റി വീണ്ടും എന്നെ നോക്കി. ഞാൻ എന്ത് ചെയ്യണം എന്ന അർഥത്തിൽ മാളുവിനെ നോക്കി അവളുടെ മുഖത്തും അവനോടുള്ള സഹതാപമാണ്

“സാരമില്ല നിതിൻ അതൊക്കെ കഴിഞ്ഞില്ലേ… ”

ഞാൻ എങ്ങനെയോ അത്രയും പറഞ്ഞൊപ്പിച്ചു. എന്നിട്ടും അവൻ കരച്ചിൽ നിർത്തിയില്ല

ആന്റി നിതിന്റെ താടിയിൽ പിടിച്ചുയർത്തി

“മോനെ… കഴിഞ്ഞതൊന്നും ഓർത്ത് വിഷമിക്കേണ്ട. മോൻ ഒരു നല്ല കുട്ടിയാണ് അതുകൊണ്ടാണ് മോന് ഇതൊരു വിഷമമായി തോന്നുന്നതും ഇപ്പൊ കരയുന്നതും.ഞങ്ങൾക്ക് ആർക്കും മോനോട് ദേഷ്യം ഒന്നുമില്ല”

ആന്റി അവന്റെ കണ്ണുനീർ തുടച്ചു. ആന്റിയുടെ വാക്കുകൾ കേട്ടപ്പോൾ അവന് ഒരാശ്വാസം ആയെന്ന് തോന്നുന്നു.

“നിങ്ങൾ റൂമിലേക്ക് പൊയ്ക്കോ ഞാൻ വരാം.. ”

ആന്റി എന്നെയും മാളുവിനെയും നോക്കിയാണ് പറഞ്ഞത്. ഞാൻ ഒന്നും മനസ്സിലാവാതെ മാളുവിനെ നോക്കി അവളുടെ മുഖത്തൊരു ചിരി ഉണ്ട്

വീണ്ടും മടിച്ചു നിന്ന എന്നെ കയ്യിൽ പിടിച്ച് വലിച്ചുകൊണ്ട് മാളു പുറത്തേക്ക് നടന്നു

“നിനക്കെങ്ങനെ സാധിക്കുന്നു മാളു അവനോടൊക്കെ ഇത്ര പെട്ടന്ന് ക്ഷമിക്കാൻ.. ”

പുറത്തെത്തിയപ്പോൾ തന്നെ എന്റെ മനസ്സിൽ ഉണ്ടായിരുന്ന സംശയം ഞാൻ അവളോട് ചോദിച്ചു. അതിന് അവളുടെ മറുപടിയാണ് എന്നെ ശരിക്കും ഞെട്ടിച്ചത്

“ഡാ… അവൻ ഒരു കുട്ടിയാണ് നിന്നെപ്പോലെ തന്നെ… അവൻ ചെയ്തത് ക്ഷമിക്കാൻ പറ്റാത്ത തെറ്റ് തന്നെയാണ് പക്ഷെ അവൻ അവിടെ നിന്ന് പറഞ്ഞത് മുഴുവൻ ഉള്ളിൽ തട്ടിയാണ്. നല്ല കുറ്റബോധം ഉണ്ടവന് ”

എന്നെ കുട്ടി എന്ന് പറഞ്ഞത് എനിക്കൊരു കുറച്ചിലായി തോന്നി എങ്കിലും അപ്പൊ ഞാൻ ഒന്നും പറഞ്ഞില്ല. വീണ്ടും അവളുടെ വാക്കുകൾക്കായി കാതോർത്തു

“അന്ന് അങ്ങനെ ചെയ്യുന്ന സമയത്ത് അവന് അറിയില്ലല്ലോ നമ്മൾ തമ്മിൽ ഉള്ള ബന്ധം…. അറിഞ്ഞിരുന്നെങ്കിൽ ഒരിക്കലും അവൻ അങ്ങനെ ചെയ്യുമായിരുന്നില്ല. ”

അവൾ എന്തൊക്കെ പറഞ്ഞിട്ടും എനിക്ക് അതൊന്നും അംഗീകരിക്കാം പറ്റുന്നില്ല. എന്റെ മുഖത്തു നിന്നും അത് മനസ്സിലായിട്ടാണ് എന്ന് തോന്നുന്നു അവൾ വീണ്ടും സംസാരിച്ചു തുടങ്ങി.