പ്രാണേശ്വരി 12 [പ്രൊഫസർ ബ്രോ] 523

ഉണ്ണിയേട്ടന് നന്നായി വേദന എടുത്തു എന്ന് തോന്നുന്നു പുള്ളിയുടെ വായിൽ നിന്നും അറിയാതെ ഒരു കരച്ചിൽ പുറത്ത് വന്നു

“അയ്യോ വേദനയെടുത്തോ… സോറിഡാ… മറന്നുപോയി”

എനിക്ക് തിരിഞ്ഞിരിക്കുന്നത് കൊണ്ട് മാളുചേച്ചിയുടെ മുഖം കാണാൻ പറ്റുന്നില്ല ശബ്ദം കേട്ടിട്ട് സങ്കടത്തിൽ ആണെന്ന് തോന്നുന്നു

അവൾ ഉണ്ണിയേട്ടനോട് ചേർന്നിരുന്നു ഇടി കൊടുത്ത ഭാഗത്തു തടവാൻ തുടങ്ങി. ഉണ്ണിയേട്ടൻ കണ്ണടച്ച് അത് ആസ്വദിച്ചു കിടക്കുകയാണ്

അവരുടെ സ്നേഹം കണ്ടപ്പോൾ ഒരുപാട് സന്തോഷം തോന്നി ഒപ്പം ലച്ചുവിനെ വല്ലാതെ മിസ്സ്‌ ചെയ്തു.

ഇനി അവരെ കുറച്ചു സമയം ഒറ്റക്ക് വിടുന്നതാണ് നല്ലതെന്ന് എനിക്ക് തോന്നി.അവർക്കും എന്തെങ്കിലുമൊക്കെ തനിച്ചു സംസാരിക്കാൻ കാണില്ലേ

“ചേച്ചീ… ഞാൻ ഇപ്പൊ വരാവേ… ”

“നീ എങ്ങോട്ടാ… ഇവിടെ നിക്കടാ ചെക്കാ ”

“ഏയ്യ് എനിക്കൊരു കാൾ ചെയ്യാനുണ്ട് ”

“ഉം… ഉം… മനസ്സിലായി ചെല്ല് ചെല്ല്…”

മാളുവും ഉണ്ണിയേട്ടനും എന്നെ നോക്കി കളിയാക്കി ചിരിക്കുന്നു

അവരെ കുറച്ചു സമയം ശല്യം ചെയ്യണ്ട എന്ന് കരുതിയപ്പോൾ രണ്ടും കൂടി എനിക്കിട്ട് കൊട്ടുകയാണ്. ലച്ചുവിനെ വിളിക്കണം എന്നുള്ള ആഗ്രഹം ഉണ്ടെങ്കിലും നടക്കില്ല എന്നവർക്ക് അറിയില്ലല്ലോ

ഞാൻ റൂം തുറന്നു പുറത്തിറങ്ങി ആ ഇടനാഴി വഴി നടന്നു. ജനൽ വഴി പുറത്തെ കാഴ്ചയൊക്കെ കണ്ട് കുറച്ചു സമയം കളഞ്ഞു

“എന്താടാ വായ് നോട്ടം ആണോ… ലച്ചുവിനോട് പറയണോ… ”

മാളുവിന്റെ ശബ്ദം കേട്ട് തിരിഞ്ഞു നോക്കിയപ്പോൾ എന്നെ നോക്കി ഇളിച്ചുകൊണ്ട് നിൽക്കുകയാണ് പിശാശ്

“എന്റെ പൊന്നോ ഞാൻ വായിൽ നോക്കിയതൊന്നും അല്ല ചുമ്മാ കാഴ്ച കണ്ട് നിന്നതാ…. പിന്നെ നീ എന്തിനാ ഇപ്പൊ ഇങ്ങോട്ട് വന്നത് ഉണ്ണിയേട്ടൻ അവിടെ ഒറ്റക്കല്ലേ…”

“ഏയ്യ് അല്ല അമ്മ വന്നു ”

ഞാനും കരുതി ഉണ്ണിയേട്ടനുമായി ഒറ്റക്ക് സംസാരിക്കാനുള്ള അവസരം വെറുതെ കളഞ്ഞിട്ട് അവൾ എന്നെ വിളിക്കാൻ വരുമോ എന്ന്

“എന്താടാ ചിരിക്കുന്നത്… ”

അവളത് ചോദിച്ചപ്പോളാണ് ഞാൻ ഇതൊക്കെ ഓർത്ത് ചിരിക്കുകയായിരുന്നു എന്ന് മനസ്സിലായത്

“ഏയ്യ് ഒന്നൂല്ല… അല്ല വേറൊരു കാര്യം ചോദിക്കാൻ മറന്നു ആന്റി മാത്രേ ഉള്ളോ നിതിനും ഉണ്ടോ ”

“ഞാൻ പറഞ്ഞില്ലേ അമ്മ അവനെയും കൊണ്ടേ വരൂ എന്ന് ”

“ഓഹ്‌ വല്യ കാര്യം… നീ പൊക്കോ ഞാൻ വന്നോളാം ”

നിതിൻ ഉണ്ടെന്നറിഞ്ഞപ്പോൾ റൂമിൽ പോകാൻ ഒരു മടി. പഴയ ദേഷ്യം ഒന്നും ഇല്ലെങ്കിലും ഇത്രയും നാൾ ശത്രുവായി കണ്ടവനെ പെട്ടന്നൊരു ദിവസം മിത്രമായി കാണാൻ ഒരു ബുദ്ധിമുട്ട്

“ഞാൻ പോകും… കൂടെ നീയും വരും ”

“എടി ചേച്ചീ പ്ലീസ്… ഞാൻ വന്നേക്കാം നീ പൊക്കോ ”

“എടാ ഞാൻ നിന്നെ കൂട്ടിയിട്ട് വരാം എന്ന് പറഞ്ഞാണ് വന്നത്… നീ ഇപ്പൊ വന്നില്ലെങ്കിൽ അവന് വല്യ വിഷമമാകും ”

“എടി എന്നാലും ഒരു മടി ”

“ഒരു മടിയും ഇല്ല… നീ വന്നേ… ”