പ്രാണേശ്വരി 12 [പ്രൊഫസർ ബ്രോ] 523

“നിതിന് എന്ത് പറ്റിയതാ ”

“ഒന്നും പറയണ്ട ടീച്ചറെ. അവന്റെ അച്ഛൻ ഒരു ബൈക്ക് വാങ്ങിക്കൊടുത്തിരുന്നു മുഴുവൻ സമയം അതിന്റെ പുറത്താ കറക്കം. ഇന്ന് രാവിലെ ബൈക്കും എടുത്ത് പോയതാ പിന്നെ വരുന്നത് ഇവന്റെ കൂട്ടുകാരന്റെ ഫോൺ ആണ്. ആക്‌സിഡന്റ് ആയെന്നും ആശുപത്രിയിൽ ആണെന്നും പറഞ്ഞ്. ഇവിടെ എത്തുന്നത് വരെ ഒരു സമാധാനവും ഉണ്ടായിരുന്നില്ല. ഇതൊക്കെ ഇവർക്ക് പറഞ്ഞാൽ മനസ്സിലാകുമോ ”

അത് പറയുമ്പോൾ ആ അമ്മയുടെ മുഖത്തു മകനെക്കുറിച്ചുള്ള വേവലാതിയും. അവൻ തന്നെ വരുത്തി വച്ചതാണെന്നുള്ള ദേഷ്യവും വന്നു

“എന്നിട്ട് ഡോക്ടർ എന്ത് പറഞ്ഞു? ”

“വല്യ കാര്യമായൊന്നും പറ്റിയില്ല, അസ്ഥിക്ക് ചെറിയ പൊട്ടൽ മാത്രമേ ഉള്ളു.കുറച്ചു ടെസ്റ്റ്‌ ഒക്കെ ഉണ്ട് അതിന്റ റിസൾട്ട്‌ നാളെയെ കിട്ടു അത് കഴിഞ്ഞ് പോകാം എന്ന് ”

“എന്താ നിതിൻ വണ്ടിയൊക്കെ സൂക്ഷിച്ചു ഓടിക്കണ്ടേ.. എന്തിനാ വീട്ടിൽ ഉള്ളവരെ ഇങ്ങനെ വിഷമിപ്പിക്കുന്നത് ”

മാളു ആ സമയത്ത് വാണി മിസ്സ്‌ ആയി. എനിക്ക് അത് കണ്ട് ചിരി വരുന്നുണ്ട് തൊട്ടടുത്ത റൂമിൽ വേറെ ഒരാൾ ഇതേ അവസ്ഥയിൽ കിടക്കുന്നുണ്ടല്ലോ

“സോറി മിസ്സ്‌… ”

നിതിന്റെ ശബ്ദം വളരെ നേർത്തതായിരുന്നു

പിന്നെയും കുറച്ചു സമയം ഞങ്ങൾ അവിടെ ഇരുന്ന് അവന്റെ അമ്മയോട് സംസാരിച്ചു. ഒരു പാവം അമ്മ ആയിരുന്നു മകനെ കുറിച്ച് ഭയങ്കര വേവലാതി ആണ്

ഞങ്ങൾ അമ്മയോട് സംസാരിക്കുന്ന സമയം അത്രയും നിതിന്റെ മുഖത്ത് പേടി ആയിരുന്നു ഞങ്ങൾ വല്ലതും പറയുമോ എന്ന്

കുറച്ചു കഴിഞ്ഞു ഞങ്ങൾ തിരിച്ചു പോകാനായി എഴുന്നേറ്റു

“ടീച്ചറെ ഒരു കാര്യം ചോദിക്കാൻ മറന്നു. ടീച്ചർ എന്താ ഇവിടെ ആരെയെങ്കിലും കാണാൻ വന്നതാണോ ”

നിതിന്റെ അമ്മയുടെ ചോദ്യം കേട്ടപ്പോൾ മാളു എന്റെ മുഖത്തേക്ക് ഒന്ന് നോക്കി. അവരോട് എന്ത് പറയണം എന്നറിയില്ല എന്ന് വ്യക്തം

“ഞങ്ങളുടെ ഒരു കസിൻ ഇവിടെ അഡ്മിറ്റാണ് ചേട്ടനെ കാണാൻ വന്നതാ ”

മാളുവിനോടുള്ള ചോദ്യത്തിന് മറുപടി കൊടുത്തത് ഞാൻ ആണ്

“ഓ അപ്പോ നിങ്ങൾ ഇന്ന് പോകുമോ ”

“ഞാനും അമ്മയും പോകും ഇവൻ ഇവിടെ ഉണ്ടാകും ”

എന്നെ പറയാൻ അനുവദിക്കാതെ മാളു ഇടയ്ക്കു കയറി പറഞ്ഞു അപ്പോളാണ് അവൾക്ക് അങ്ങനെ ഒരു പ്ലാൻ ഉണ്ടെന്ന് ഞാനും അറിഞ്ഞത്

ഞാൻ അവളെ ഒന്ന് നോക്കി അവൾ എന്റെ മുഖത്തു നോക്കുന്നതെ ഇല്ല

“മോനെ അപ്പോ ഞാൻ ഒരു കാര്യം ആവശ്യപ്പെട്ടാൽ ബുദ്ധിമുട്ട് ആകുമോ ”

“പറഞ്ഞോ അമ്മേ… ഞാൻ എന്താ ചെയ്യേണ്ടത് ”

“എനിക്ക് ഇന്ന് ഇവിടെ നിൽക്കാൻ പറ്റില്ല, ഇവന്റെ ചേച്ചി ഉണ്ട് വീട്ടിൽ പ്രസവം കഴിഞ്ഞ് കിടക്കുകയാണ് അപ്പൊ എനിക്ക് പോകാതെ പറ്റില്ല ”

അവർ പറഞ്ഞു തുടങ്ങിയപ്പോൾ തന്നെ ആവശ്യം എന്തായിരിക്കും എന്ന് ഞാൻ ഊഹിച്ചു

“ഇവന്റെ അച്ഛനും ഇവിടെ ഇല്ല പുറത്താണ്. ഇവിടെ ഇവന്റെ കൂടെ നിൽക്കാൻ ആരുമില്ല മോന് ബുദ്ധിമുട്ടാവില്ലെങ്കിൽ ഇടക്ക് ഇവനെ കൂടി ഒന്ന് ശ്രദ്ധിക്കാമോ ”