പ്രാണേശ്വരി 12 [പ്രൊഫസർ ബ്രോ] 523

ഒന്നോ രണ്ടോ ദിവസം നിക്കേണ്ട കാര്യമേ ഉള്ളു അതിന് ഒരാഴ്ചത്തേക്ക് ഇടാൻ വേണ്ട ഡ്രസ്സ്‌ ഫുൾ വാങ്ങിപ്പിച്ചു.ഞങ്ങൾ തിരിച്ചു ചെന്നപ്പോ ഉണ്ണിയേട്ടൻ മയങ്ങുന്നു. ആന്റി കട്ടിലിന്റെ അരികിൽ ഇരുന്ന് എന്തോ വായിക്കുന്നു

“എന്താ രണ്ടിന്റേം സംസാരം ഒക്കെ കഴിഞ്ഞോ… ”

ഞങ്ങൾ വന്നിട്ടും ഒന്നും പറയാതെ വായനയിൽ മുഴുകിയിരിക്കുന്ന ആന്റിയോടായി ഞാൻ ചോദിച്ചു . ആന്റി മാസികയിൽ നിന്നും മുഖമുയർത്തി അപ്പോഴാണ് ആ കലങ്ങിയ കണ്ണുകൾ ഞാൻ കാണുന്നത്

പെട്ടന്ന് കരുതിയത് ആന്റിയും ഉണ്ണിയേട്ടനുമായി വഴക്കായി എന്നാണ്, അങ്ങനെ ആണെങ്കിൽ മാളുവിന്റെ കാര്യം തീരുമാനമായി

“എടാ ഒരു അബദ്ധം പറ്റി ”

മുഖത്തൊരു തെളിച്ചമില്ലാതെ ആണ് ആന്റിയുടെ സംസാരം.

“എന്ത് പറ്റി ആന്റി… ”

“കുറച്ചു മുൻപ് ഞാനും ഉണ്ണിയും സംസാരിച്ചു കൊണ്ടിരിക്കുകയായിരുന്നു. അപ്പൊ വാതിൽ തുറക്കുന്ന ശബ്ദം കേട്ടു. നിങ്ങൾ ആയിരിക്കും എന്ന് കരുതി ഞാൻ തിരിഞ്ഞു നോക്കിയില്ല ”

ആന്റിയൊന്ന് നിർത്തി

“എന്നിട്ട് ”

“നീ ഉച്ചക്ക് വന്നപ്പോൾ പറഞ്ഞത് പോലെ ഇതൊരു ചന്തയല്ല ആശുപത്രി ആണെന്ന് പറഞ്ഞു. നീ വീണ്ടും എന്നെ പറ്റിക്കുവാണെന്നു കരുതി ഞാൻ വീണ്ടും സംസാരത്തിന്റെ ശബ്ദം കൂട്ടി ”

ഇത്രയും കേട്ടപ്പോൾ തന്നെ ഏകദേശം കാര്യം എനിക്ക് മനസ്സിലായി

“അത് ഡോക്ടർ ആയിരുന്നു അല്ലെ”

“ഹ്മ്മ്.. ”

സങ്കടത്തോടെ ആയിരുന്നു ആ മൂളൽ

“ഡോക്ടർ ഒരുപാട് വഴക്ക് പറഞ്ഞോ ”

“ഹ്മ്മ് ”

അതിനും മൂളൽ തന്നെ ആയിരുന്നു മറുപടി. എനിക്കാണെങ്കിൽ കേട്ടിട്ട് ചിരിയും വരുന്നുണ്ട് ചിരിച്ചാൽ ആന്റി എന്നെ കൊല്ലും എന്നെനിക്ക് ഒറപ്പായിരുന്നു

എത്രയൊക്കെ ശ്രമിച്ചിട്ടും അറിയാതെ ചിരിച്ചുപോയി . കയ്യിൽ ഇരുന്ന മാസിക ചുരുട്ടി അപ്പൊ തന്നെ എനിക്കിട്ട് ഒന്ന് തന്നു ആന്റി

ഞാൻ മാളുവിനെ നോക്കുമ്പോൾ അവൾ അടുത്തുള്ള കസേരയിൽ തിരിഞ്ഞു ഇരിക്കുകയാണ്. മുഖം കാണാൻ പറ്റില്ലെങ്കിലും നല്ല ചിരി ആണെന്ന് ആ ശരീരം കുലുങ്ങുന്നത് കണ്ടപ്പോൾ മനസ്സിലായി. ആന്റിയുടെ വഴക്ക് പേടിച്ചാണ് തിരിഞ്ഞിരിക്കുന്നത്

വൈകിട്ട് ഏഴു മണിക്കാണ് സന്ദര്ശകര്ക്ക് ഉള്ള സമയം അവസാനിക്കുന്നത്. ആന്റിക്ക് പോകുന്നതിനു മുൻപ് നിതിനെ കാണണം എന്ന് പറഞ്ഞു. കൂട്ടുകാരൻ ആണെന്ന് പറഞ്ഞത് കൊണ്ട് കൊണ്ടുപോകാതെ ഇരിക്കാനും പറ്റില്ല

എന്തായാലും രണ്ടും കല്പ്പിച്ചു ഞാനും മാളുവും കൂടി ആന്റിയെയും കൂട്ടി നിതിന്റെ റൂമിലേക്ക് പോയി.ഞങ്ങൾ ചെല്ലുമ്പോൾ അവൻ മൊബൈലിൽ ഗെയിം കളി ആണ്. ഞങ്ങളെ കണ്ടതും അവൻ കട്ടിലിൽ മൊബൈൽ വച്ചിട്ട് എഴുന്നേറ്റു