പ്രാണേശ്വരി 12 [പ്രൊഫസർ ബ്രോ] 523

“ആഹാ അങ്ങനെ ആണോ… നീ ഇനി അങ്ങോട്ട്‌ വാട്ടോ എനിക്ക് അത് വേണം ഇത് വേണം എന്നും പറഞ്ഞ് എല്ലാം ഞാൻ ഉണ്ടാക്കി തരുന്നുണ്ട് ”

ഞാൻ എപ്പോ വീട്ടിൽ ചെന്നാലും എനിക്കിഷ്ടപ്പെട്ട ഭക്ഷണം മാത്രമേ അവിടെ ഉണ്ടാകാറുള്ളൂ. അതിനി ഉണ്ടാവില്ല എന്നാണ് ഭീഷണി. എന്നാലും തോറ്റുകൊടുക്കാൻ പാടില്ലാലോ

“ഓഹ്‌ വേണ്ട… എന്റെ മാളു ഉണ്ടാക്കി തന്നോളും ”

ഞാൻ വെറുതെ ആന്റിയെ ദേഷ്യം പിടിപ്പിക്കാൻ പറഞ്ഞതാണെങ്കിലും അത് കേട്ട് കഴിഞ്ഞപ്പോൾ ആന്റി ഒടുക്കത്തെ ചിരി.

“ആഹ് ഇവൾ ഉണ്ടാക്കി തന്നിട്ട് നീ കഴിക്കും… ഇതുവരെ ഒരു ചമ്മന്തി അരക്കാൻ പോലും എന്റെ മോൾക്കറിയിയില്ല ”

അത് കേട്ടപ്പോൾ എനിക്കും ചിരി വന്നു. മാളുവിനെ നോക്കിയപ്പോൾ അവൾ ആന്റിയുടെ പിന്നിൽ ഒളിച്ചു. ഉടനെ തന്നെ ആന്റി എരിവ് വലിക്കുന്ന ഒരൊച്ച കേട്ടു. അവൾ പിന്നിൽ നിന്ന് എന്തോ ചെയ്തതാണ്

പിന്നെയും ഞങ്ങൾ കുറെ സമയം ഇരുന്ന് സംസാരിച്ചു.ആന്റിക്ക് ഉണ്ണിയേട്ടനെ നേരത്തെ അറിയാമെങ്കിലും അന്ന് മരുമോൻ ആകേണ്ട ആളാണ് എന്നൊന്നും അറിയില്ലല്ലോ. ഇപ്പൊ രണ്ടും ഒടുക്കത്തെ കൂട്ടാണ് നാക്കിന്റെ കാര്യത്തിൽ ആന്റിയെ കടത്തി വെട്ടും ഉണ്ണിയേട്ടൻ

ഞങ്ങൾ സംസാരിക്കുന്ന സമയത്താണ് വാതിലിൽ ഒരു മുട്ട് കേൾക്കുന്നത്. ഞാൻ പോയി വാതിൽ തുറന്നു. നിതിന്റെ അമ്മയാണ്

“വരൂ അമ്മേ… ”

ഞാൻ അവരെ ഉള്ളിലേക്ക് ക്ഷണിച്ചു.

“ഇത് എന്റെ ഫ്രണ്ടിന്റെ അമ്മയാണ്. ”

മാളുവിന് അമ്മയെ നേരത്തെ അറിയാമെങ്കിലും ഉണ്ണിയേട്ടനും ആന്റിയും അറിയില്ലലോ, അവർക്ക് പരിചയപ്പെടുത്തി കൊടുത്തു

“ആ, ഇവൻ പറഞ്ഞിരുന്നു അടുത്ത റൂമിൽ ഇവന്റെ ഒരു കൂട്ടുകാരൻ ഉണ്ടെന്ന്… മോനിപ്പോൾ എങ്ങനെ ഉണ്ട് ”

ആന്റിയത് ഒരു ആശുപത്രി മുറിയാണെന്നു മറന്നെന്നു തോന്നുന്നു. സ്വന്തം വീട്ടിലേക്ക് വന്ന അഥിതിയോട് പെരുമാറുന്നത് പോലെയാണ് പെരുമാറ്റം

“കുഴപ്പം ഒന്നും ഇല്ല, അസ്ഥിക്ക് ചെറിയ പൊട്ടൽ മാത്രമേ ഉള്ളു. വേറെന്തൊക്കെയോ ടെസ്റ്റുകൾ ഒക്കെ ഉണ്ടെന്നും പറഞ്ഞ് ഇന്നിവിടെ അഡ്മിറ്റ്‌ ആക്കി.”

അധികം വൈകാതെ തന്നെ അവർ യാത്ര പറഞ്ഞു. പോകുന്നതിനു മുൻപ് ഒരിക്കൽക്കൂടി നിതിനെ ശ്രദ്ധിക്കുന്ന കാര്യം ഓർമപ്പെടുത്തി

ഞാൻ നോക്കിക്കോളാം എന്ന് പറഞ്ഞതും ആ മുഖത്തൊരു സമാധാനം വന്നു. നമ്മൾ കാരണം മറ്റുള്ളവരുടെ മുഖത്തു ഒരു സന്തോഷം വന്നാൽ അതിനോളം വലിയ പുണ്യം വേറെ ഇല്ല എന്ന് അമ്മ എപ്പോഴും പറയും

അവർ പോകാൻ ഇറങ്ങിയപ്പോളാണ് എനിക്ക് ഡ്രെസ് വാങ്ങുന്ന കാര്യം ഓർമ വന്നത്. ഞാനും മാളുവും അവരോടൊപ്പം പുറത്തേക്ക് നടന്നു. അവരെ ബസ്സ്റ്റാൻഡിൽ കൊണ്ടേ വിട്ടതിനു ശേഷമാണ് ഞങ്ങൾ ഡ്രസ്സ്‌ എടുക്കാൻ പോയത്

കിട്ടിയ അവസരം ഞാൻ ശരിക്കും മുതലാക്കി. സാധാരണ എന്റെ കാര്യങ്ങൾക്കു മറ്റുള്ളവരെ ബുദ്ധിമുട്ടിക്കുന്നത് എനിക്കിഷ്ടമല്ല പക്ഷെ മാളുവിനെ മാത്രം ഞാൻ നന്നായി ബുദ്ധിമുട്ടിക്കും