നിയോഗം 2 Dark World Part X (മാലാഖയുടെ കാമുകൻ) 1563

ശോഭ അപ്പാർട്മെന്റ്, കൊച്ചി

“ആകെ പേടിച്ചുപോയിരുന്നു.. അവളുടെ നെഞ്ചിൽ കൂടി ആണ് ഏട്ടാ അമ്പു തുളച്ചു കയറിയത്… മരിച്ചു എന്ന് വിചാരിച്ചതാണ്…”

ബാൽക്കണിയിൽ നിന്നും അന്ന് ഒരു പെണ്ണ് കൊല്ലാൻ വന്ന കഥ പറഞ്ഞു തന്നതായിരുന്നു അർച്ചനയും മീനുവും..

റാണ അവളെ അടിച്ച കാര്യം കേട്ടപ്പോൾ ഞാൻ ഇറങ്ങി പോകാൻ നോക്കിയപ്പോൾ രണ്ടും കൂടി എന്നെ ബലമായി പിടിച്ചു വച്ചതാണ്… എനിക്ക് അവനെ കൊല്ലാനുള്ള ദേഷ്യം വന്നു…

അവർ രണ്ടും എന്നെ മുറുക്കെ പിടിച്ചു..

ഞാൻ അവരെ ചേർത്ത് പിടിച്ചു.. ഞാൻ അവിടെ ആയിരുന്നപ്പോൾ എന്തൊക്കെ ആണ് സംഭവിച്ചത്.. എനിക്ക് അല്പം കുറ്റബോധം തോന്നി..

അർച്ചനയ്ക്ക് പറഞ്ഞിട്ടും പറഞ്ഞിട്ടും തീരുന്നില്ല.. എന്നാൽ മീനുവിന് ഇത് പുതിയ കാര്യം അല്ല..

എനിക്ക് ഇവരോട് എന്ത് പറയണം എന്ന് സത്യത്തിൽ അറിയുന്നില്ലായിരുന്നു.. അവർക്ക് പരാതികളും പരിഭവങ്ങളും പറയാൻ ഉള്ള ഏക ആൾ ഞാൻ ആണ്.. എന്നാൽ എനിക്കോ? ആരാണ് ഉള്ളത്..

“വാവേ….”

മനസ്സിൽ ചിന്തിച്ച മുഖത്തിന്റെ ശബ്ദം പുറകിൽ നിന്നും കേട്ടപ്പോൾ ഞാൻ വെട്ടിത്തിരിഞ്ഞു.. വാതിൽക്കൽ ഏട്ടത്തി..

“ഏട്ടത്തി….”

ഞാൻ അവളെ കെട്ടിപിടിച്ചു..

അവൾ ഒന്നും ചോദിച്ചില്ല.. എന്റെ തലമുടി തലോടി നെറ്റിയിൽ ഉമ്മ വച്ചു.. എനിക്ക് വല്ലാത്ത ഒരു സംരക്ഷണം തോന്നി.. മനസൊക്കെ ഒന്ന് ശാന്തം ആയതു പോലെ…

കുറച്ചു നേരം അങ്ങനെ നിന്നു..

“രണ്ടെണ്ണം കൂടി ഇനി ഇവനോട് ഒന്നും ചോദിക്കണ്ട.. കേട്ടോ? പോയി വല്ലതും വായിക്ക് രുചി ആയി ഉണ്ടാക്കിക്കെ.. എന്റെ മോൻ ക്ഷീണിച്ചു ആകെ…”

ഏട്ടത്തി എന്റെ തലമുടി കൊതികൊണ്ടു പറഞ്ഞു..

എന്തോ ഭാഗ്യം ഏട്ടത്തി അർച്ചനയുടെ മുഖത്തെ പാടുകൾ ശ്രദ്ധിച്ചില്ല..

എന്നെ കണ്ടതിൽ ഉള്ള സന്തോഷം ആയിരിക്കാം..
സാധാരണ അർച്ചന കരഞ്ഞാൽ അവളുടെ മുഖം മൊത്തം ചുവന്നു കിടക്കാറുണ്ട്.. അതാകും എന്ന് വിചാരിച്ചിരിക്കാം..

“നീ എവിടെ ആയിരുന്നു എന്ന് ചോദിക്കുന്നില്ല… എല്ലാം ശരിയാകും… “

ഏട്ടത്തി അത്രയേ പറഞ്ഞുള്ളു.. അത് മതിയായിരുന്നു എനിക്ക്.. ഏട്ടത്തി തരുന്ന ആത്മവിശ്വാസം അത്രക്ക് ആണ്..

ഏട്ടത്തി വേഗം തന്നെ വീട്ടിലേക്ക് പോയി.. ഏട്ടൻ മുംബൈയിൽ നിന്നും വന്നിരുന്നു. എന്നെ കാണണം എന്ന് ഏട്ടത്തിയോട് പറഞ്ഞിരുന്നു എങ്കിലും ഏട്ടത്തി തന്നെ വേണ്ട എന്ന് പറഞ്ഞു. കൂടാതെ അമ്മക്ക് സുഖം ഇല്ലായിരുന്നു.. ഞാനും എല്ലാം ഒതുങ്ങിയിട്ട് പോകാം എന്ന് കരുതി..

ലിസയും മെറിനും അല്പം വൈകി ആണ് വന്നത്.. അവൾ വന്ന പാടെ തളർന്നു സെറ്റിയിൽ ഇരുന്നു.. അവർ എന്നെ കണ്ടിട്ടില്ല.. ഞാൻ റൂമിൽ ആയിരുന്നു.. അവരുടെ പുറകിൽ. അവർ ഇരുന്നതിന്റെ പുറകിൽ ഞാൻ വാതിൽചാരി നിന്നു..

മീനുവിനെയും അർച്ചനയെയും കണ്ണ് കാണിച്ചു പറയണ്ട എന്ന്..

മീനുവും അർച്ചനയും അവർക്ക് ചുറ്റും ഇരുന്നു കെട്ടിപിടിച്ചു..