നിയോഗം 2 Dark World Part X (മാലാഖയുടെ കാമുകൻ) 1555

സംഭവിക്കാൻ ഉള്ളത് സംഭവിക്കും.. മരണം വരെ സന്തോഷം ആയി ഇരിക്കുക..

കൊച്ചിയുടെ തിരക്കിലൂടെ അവസാനം ബൈക്ക് ശോഭയിൽ എത്തി..

“കുറച്ചു ദിവസം ആയല്ലോ കണ്ടിട്ട്.. നാട്ടിൽ ആയിരുന്നോ?”

സെക്യൂരിറ്റി കുശലം ചോദിച്ചു.. കുറെ ദിവസം ആയോ? ആർക്കറിയാം..

“അതെ..”

എന്ന് പറഞ്ഞു ഞാൻ വണ്ടി മുൻപോട്ട് എടുത്തു പാർക്കിങ്ങിൽ കൊണ്ടുപോയി.. ഹൃദയം വല്ലാതെ തുടിച്ചു..

മുകളിലേക്ക് ഓടുകയായിരുന്നു.. ലിഫ്റ്റിന് കാത്തു നിൽക്കാതെ സ്റ്റെപ് ഒക്കെ ഓടി കയറി..

ബി24 നു മുൻപിൽ എത്തി.. മെല്ലെ ശ്വാസം വലിച്ചു നോർമൽ ആയി.. അവർ എങ്ങനെ പ്രതികരിക്കും എന്ന് അറിയില്ല… അർച്ചന കരയും എന്ന് ഉറപ്പാണ്.. മീനു….?

മെല്ലെ കാളിങ് ബെല്ലിൽ വിരൽ അമർത്തി..

“My heart is pierced by Cupid
I disdain all glittering gold…
There is nothing can console me
But my jolly sailor bold…”

ക്രിസ്റ്റൈൻ സ്ലഗ്മന്റെ സുന്ദരമായ ജോളി സെയിലർ പാട്ടിന്റെ വരികൽ അകത്തു മുഴങ്ങി..

ആരോ നടന്നു വരുന്ന ശബ്ദം കെട്ടു.. എന്റെ നെഞ്ചിടിപ്പ് കൂടി..

നടന്നു വന്ന ശബ്ദം ഒരു നിമിഷം അവിടെ നിന്നു. പീപിങ് ഹോളിലൂടെ നോക്കുകയായിരിക്കണം..

ഡോർ തുറക്കാതെ വന്ന ആൾ അകത്തേക്ക് ഓടി പോയി എന്ന് തോന്നി.. അകത്ത് അനക്കം ഒന്നും ഇല്ല..

കുറച്ചു കഴിഞ്ഞപ്പോൾ വാതിൽ തുറന്നു.. അർച്ചന..അവൾ പകപ്പോടെ എന്നെ നോക്കി.. ഞാൻ ചിരിച്ചു എങ്കിലും അവൾ ചിരിച്ചില്ല.. ഇതെന്തു കൂത്ത്? അവൾ എന്നെ അടിമുടി നോക്കി.

“അർച്ചു…?”

ഞാൻ വിളിച്ചപ്പോൾ അവൾ പുറകോട്ട് മാറി വാതിൽ മുഴുവൻ തുറന്നു.. ഞാൻ അകത്തേക്ക് കയറി.. അർച്ചന എന്തോ പറയാൻ വന്നു.. അവളുടെ കണ്ണുകൾ തുളുമ്പി..

പെട്ടെന്നാണ് എന്റെ കഴുത്തിൽ ഒരു തണുത്ത വസ്തു മുട്ടിയത്.. പുറകിൽ നിന്നും.. ഞാൻ തല തിരിച്ചു നോക്കി..

വാതിലിന്റെ മറവിൽ മീനു… അവളുടെ കയ്യിൽ ഒരു പിസ്റ്റൾ. അതാണ് എന്റെ കഴുത്തിൽ മുട്ടിച്ചിരിക്കുന്നത്..

അവളുടെ കണ്ണിൽ എന്താണ് ഭാവം എന്ന് എനിക്ക് മനസിലായില്ല..

പക്ഷെ എന്റെ വാ പൊളിഞ്ഞുപോയി.. ഇവളെന്താ ഈ കാണിക്കുന്നത്?

“നീ ക്വീൻ അല്ലെ?”

അവളുടെ ചോദ്യം.. എനിക്ക് പെട്ടെന്ന് ദേഷ്യം വന്നു.

“നിന്റെ തന്തയാണ് ക്വീൻ..!”

എടുത്തടിച്ച പോലെ മറുപടി കൊടുത്തു.. രണ്ടു ദിവസം കൂടി വന്നിട്ട് ക്വീൻ അല്ലെ പോലും..

അത് കേട്ടപ്പോൾ അവൾ ജാള്യതയോടെ തോക്ക് താഴ്ത്തി നാക്ക് കടിച്ചു അർച്ചനയെ നോക്കി..

അതിനു മുൻപേ തന്നെ ഏട്ടാ എന്നൊരു നിലവിളിയോടെ അർച്ചന എന്റെ നെഞ്ചിൽ അമർന്നിരുന്നു..

“എന്താ ഏട്ടാ ഒന്ന് പറയാതെ.. എത്ര വേദനിച്ചു അറിയോ.. ഇവിടെ എന്തൊക്കെയാ നടന്നേ അറിയ്യോ?“

അവൾ നെഞ്ചിൽ മുഖം അമർത്തി പരാതിയുടെ കെട്ടുകൾ അഴിക്കാൻ തുടങ്ങി..

മീനു എന്നെ ഒന്ന് നോക്കി.. കണ്ണിൽ നനവ്..