ഇവാ, An Angelic Beauty അവസാന ഭാഗം[ മാലാഖയുടെ കാമുകൻ] 2232

ഇവാ, An Angelic Beauty

Author മാലാഖയുടെ കാമുകൻ

Previous Part 

എല്ലാം നഷ്ടപെട്ടവനെപോലെ അവൻ തിരിഞ്ഞു നടന്നു.. പ്രണയം സുഖകരമാണ്.. എന്നാൽ അത് ഇല്ലാതെയാകുമ്പോൾ ഉള്ള വേദന.. ശരീരം കീറി മുറിച്ചാൽപോലും വേദനിക്കില്ല എന്നവന് തോന്നി..

കരയുന്ന അവനെ ചിലർ ശ്രദ്ധിക്കുന്നത് കണ്ടു..

വേഗം കർചീഫ് എടുത്തു കണ്ണ് തുടച്ചു അവൻ മുൻപിലേക്ക് നോക്കിയപ്പോൾ ആണ് ഒരു ആണും പെണ്ണും വഴിയിൽ നിന്നു ചുംബിക്കുന്നത് അവൻ കണ്ടത്..

അവൻ മിഴികൾ പിൻവലിച്ചു..

നീല കടലിലേക്ക് ആണ് കണ്ണുകൾ പോയതും.. അവൾ അവിടെ ഉണ്ട് എന്നുള്ള തോന്നൽ വീണ്ടും..

ചേച്ചിയോട് പറഞ്ഞത് മറന്ന് അവൻ എന്തോ ഒരു ആവേശത്തിൽ തിരിഞ്ഞു നടന്നു.. വളരെ വേഗത്തിൽ.. അല്ല.. ഓടി..

നേരെ ചെന്ന് കേബിൾ കാറിൽ ടിക്കറ്റ് എടുത്തു അവിടെ കാത്തു നിന്ന് കയറി.. ഡോർ അടഞ്ഞു..

അത് മെല്ലെ മെല്ലെ ആവരെയുംകൊണ്ട് താഴേക്ക് പോകാൻ തുടങ്ങി.. അതി മനോഹരമായ കാഴ്ച.. വലിയൊരു പാറക്കെട്ടിന്റെ അടിവാരത്തേക്ക് ആണ് പോകുന്നത്..

ഫിറാ എന്ന് വിളിക്കുന്ന ഓൾഡ് പോർട്ട് ആണ് അടിയിലെ കൊച്ചു ടൌൺ..

അല്പം സമയംകൊണ്ട് തന്നെ കേബിൾ കാർ അടിയിൽ എത്തി.. അതിമനോഹരമായ ഒരിടം..അവൻ കാറിൽ നിന്നും ഇറങ്ങി മെല്ലെ ചുറ്റിനും നോക്കി.. അതിമനോഹരമായ ഒരിടം.

നിറയെ ആളുകൾ.. പ്രണയജോഡികൾ ആണ് കൂടുതലും.. അവർ പ്രണയം കൈമാറുന്നു..

മുൻപോട്ട് നടന്നു.. സുവനീർ ഷോപ്പുകളും റെസ്റ്റോറന്റുകളും.. പാർക്ക് ചെയ്ത ബോട്ടുകൾ ചുറ്റിനും. ചില ബോട്ടുകൾ ആളുകളെയും വഹിച്ചുകൊണ്ട് അങ്ങോട്ടും ഇങ്ങോട്ടും പോകുന്നു… മീൻ പിടിക്കുന്ന ബോട്ടുകളും അതിലുണ്ട്..