അപരാജിതൻ 29 [Harshan] 9703

“ശങ്കരാ ,,, പകല് വരാം ,,,,,,ജോലിക്കാരെയും കൂട്ടാം ,,, ഇതും ഇതിനോട് ചേർന്നുള്ള  കാടു വെട്ടിയ അന്‍പതെക്കറും  എന്‍റെ സ്ഥലം തന്നെയാ ,,,,,,,ഞാൻ അഞ്ചു കൊല്ലം മുന്പ് ലിക്കർ ഫാക്ടറിക്കായി വാങ്ങിയതാ ,, “പേടിച്ച് വിറച്ച് കൊണ്ട് ജഗന്നാഥന്‍ പറഞ്ഞു.

അത് കേട്ടപ്പോൾ ഒരുപാട് സന്തോഷത്തോടെ ആദി വേഗം അവനെ നോക്കി ചോദിച്ചു

“ഇത് നിന്‍റെ സ്ഥലമാണോ ?”

“അതേ ശങ്കരാ ,,നമുക്ക് പോകാം ശങ്കരാ  “ പേടിയോടെ ജഗന്നാഥൻ ചുറ്റും നോക്കി വിറയലൊടെ പറഞ്ഞു.

ആദി അല്പം നേരം എന്തൊക്കെയോ ആലോചിച്ചു

“ഈ സ്ഥലം എനിക്ക് വിൽക്കാമോ . എനിക്ക് വേണം ,,, ?” ആദി ജഗനാഥനോട് ചോദിച്ചു

ജഗന്നാഥൻ ചുറ്റും നോക്കി പേടിയോടെ

“ഇതിനു വേണ്ടിയാണോടാ നാറി ,  നീയെന്നെ ഈ നേരത്ത് ഈ പാമ്പി൯ കൂട്ടിൽ കൊണ്ട് വന്നത് ,,,അയ്യോ ,,,,,” പാമ്പിന്‍റെ  സീൽക്കാരം കേട്ടു ജഗന്നാഥൻ ഒന്ന് ഞെട്ടി

“ജഗന്നാഥാ ,,,ബിസിനസ് സംസാരിക്കുമ്പോ ബിസിനസ് ,,എനിക്ക് ഈ സ്ഥല൦ വേണം ,,, എത്ര രൂപ തരണം ?”

“ഈ പാമ്പുകളുടെ ഇടയില്‍ നിന്നാണോ ബിസിനസ്സ് ശങ്കരാ, ഒരു രൂപയും നീ തരണ്ട ,,,നാളെ തന്നെ ഈ അന്‍പത്തി മൂന്നു  ഏക്കറും നിന്‍റെ പേരിൽ എഴുതി തരാം ”

“എനിക്കീ ഭൂമി മാത്രം മതി , ഈ മൂന്നേക്കര്‍ ഭൂമി ,,,,ഇതിനു നീ പറയുന്ന വില ഞാൻ തന്നേക്കാം ”

“ഇതൊരു ശാപം പിടിച്ച മണ്ണാ ,,, ഇവിടെ നൂറ്റാണ്ടുകളായി പാമ്പുകളാ വാഴുന്നത് , ഇതെടുക്കണ്ട ശങ്കരാ”

“ജഗന്നാഥാ ,,,നാഗം ശിവന് ആഭരണമാണ് ,,,പിന്നെ ഞാനെന്തിനാ പേടിക്കുന്നത് ?”

“അയ്യോ നമുക്ക് പോകാ ശങ്കരാ : ജഗന്നാഥൻ തിരികെ പോകാനായി പേടിച്ചു നിലവിളിക്കാൻ തുടങ്ങി

ആദി ചിരിച്ചു കൊണ്ട് അവനെ തന്‍റെ പുറത്തു കയറ്റി ഇരുത്തി പാമ്പുകളുടെ ഇടയിലൂടെ നടന്നു വന്നു . ആ പറമ്പു കഴിയാറായപ്പോൾ ജഗന്നാഥനെ താഴെ നിർത്തി.

“ദേ ,,നോക്ക്  സർപ്പം ഇണ ചേരുന്നത് ” എന്നുപറഞ്ഞു കൊണ്ട് ആദി അവനെ ആ കാഴ്‌ച കാണിച്ചു കൊടുത്തു.

പരസ്പരം കെട്ടിപുണർന്നു ഓരോ അംഗങ്ങളും സ്പർശിച്ചു കൊണ്ട് ഇണ ചേരുന്ന രണ്ടു നാഗങ്ങൾ ജഗന്നാഥനു ആകെ നാണമായി.

“ചെന്നിട്ട് ഇങ്ങനെയൊക്കെ കെട്ടിപ്പുണര്‍ന്ന് കിടന്നോളണം , നാഗങ്ങളെ പോലെ , കേട്ടല്ലോ “ ആദി അവനെ ഉപദേശിച്ചു കൊണ്ട് അവർ ജീപ്പിൽ കയറി.

“പറ ,,,ജഗന്നാഥാ എത്ര രൂപയാ ഈ സ്ഥലത്തിനു ഞാൻ തരേണ്ടത് ?”

“നിനക്കു എന്തുവേണമെങ്കിലും എന്നോട് ചോദിക്കാം ,,അതിനു നീ ഇടയിൽ പണം ചേർത്ത് എന്നെ വിഷമിപ്പിക്കല്ലേ ശങ്കരാ ,, ഈ ജീവന്‍ പോലും നിനക്കു ഞാന്‍ സമര്‍പ്പിക്കും  ” ജഗന്നാഥൻ പറഞ്ഞു

“ജഗന്നാഥാ ,,നീ പറയുന്നത് ശരിയായിരിക്കാം ,പക്ഷെ ഈ സ്ഥലത്തിന് ഞാനുമായോ എന്‍റെ കാരണവന്മാരുമായോ  എന്തോ ബന്ധം എനിക്കനുഭവപെടുന്നുണ്ട് ,,അങ്ങനെയുള്ള സ്ഥലം ഞാൻ ദാനമായോ സമ്മാനമായോ  വാങ്ങിക്കാൻ പാടില്ല ”

“ശരി ,,എങ്കിൽ നീ ഒരു വില പറഞ്ഞോളൂ ” ജഗന്നാഥൻ പറഞ്ഞു

“കോടികൾ ഒന്നും എനിക്ക് തരാനുണ്ടാകില്ല , പക്ഷെ ഈ മൂന്നേക്കര്‍ മണ്ണ് നീ പറയുന്ന വില  തന്നു ഞാൻ വാങ്ങണം ,,,വാങ്ങുന്നവനല്ല വില്‍ക്കുന്നവനല്ലേ വില പറയേണ്ടത് ”

ജഗന്നാഥൻ ആദി പറയുന്നത് കേട്ട് കൊണ്ട് ആലോചിച്ചു.