അപരാജിതന്‍ 34 [Harshan] 8110

“കേട്ടിട്ടുണ്ടോ ഭാര്‍ഗ്ഗവഇല്ലമെന്ന് ?” ഒരു പുഞ്ചിരിയോടെ അദ്ദേഹം ചോദിച്ചു.

അവള്‍ ബഹുമാനത്തോടെ തലയാട്ടി.

“ഈ ചടങ്ങിൽ ഭാർഗ്ഗവഇല്ലത്തെ ആരെയും ക്ഷണിക്കണ്ട, ഇനി നിങ്ങൾ പോകാൻ ഉദ്ദേശിക്കുന്നുവെങ്കിൽ പൊക്കോളൂ , അവിടെ അറിയിച്ചോളൂ , അവരുടെ അനുഗ്രഹം തേടിക്കൊളൂ, അവരിൽ നിന്നും ഒരാളും ഈ ചടങ്ങിൽ പങ്കെടുക്കാൻ പാടില്ല , ഇതെന്റെ നിർദേശമാണ്”

അത് കേട്ട് മഹാശ്വേതാദേവി കൈകൾ കൂപ്പി ആ നിര്‍ദേശം സ്വീകരിച്ചു

“അപ്പോള്‍ കിരീടാരോഹണം , അത് കഴിഞ്ഞാല്‍ ഉട൯ തന്നെ കലിശ൯മാരുമായി പോരാട്ടം ആരംഭിക്കും , ഒന്നോ രണ്ടോ വാരമിടവേളയില്‍”

“ഉവ്വ് ,,ഗുരുനാഥാ ,,,,” അങ്ങോട്ടേക്ക് സൂര്യനെയും കൈപിടിച്ച് വന്ന ശ്രീധര്‍മ്മന്‍ പറഞ്ഞു.

അദ്ദേഹം ശിരസ് കുലുക്കി

“ഗുരുനാഥാ ,,, ഒരു അപേക്ഷയുണര്‍ത്തിക്കാനുണ്ട് “ ശ്രീധര്‍മ്മന്‍ പറഞ്ഞു.

“എന്താണ് ?”

“സൂര്യന്റെ നേതൃത്വത്തില്‍ ആണല്ലോ മല്‍സരപോരാട്ടം

ഞങ്ങളുടെ ഒരാഗ്രഹം , അങ്ങിവിടേ നിന്ന് സൂര്യനെ ആയോധനകലകള്‍ ഒന്നു പരിശീലിപ്പിക്കണം എന്നാണ് ,അത് സൂര്യന് അങ്കത്തിൽ ഏറെ ഗുണം ചെയ്യും ”

“ഇല്ല ,,,,,” ഉറച്ചശബ്ദത്തോടെ ആദവനാഥർ പറഞ്ഞു.

എല്ലാവരും അതുകേട്ട് ഒന്ന് നടുങ്ങി.

“മത്സരത്തിന് വേണ്ടി തട്ടികൂട്ടി ആയോധനകല പഠിപ്പിക്കാൻ ഞാൻ ഒരുക്കമല്ല, അതിനു വേണ്ടത് യുവരാജാവിന്റെ കൈവശമുണ്ടാകുമല്ലോ, ഞാനെന്ന ഗുരുവിന് കീഴിൽ വിദ്യ നേടാൻ തക്ക യോഗ്യത പ്രജാപതി കുടുംബത്തിലെ യുവരാജാവിനില്ല , ഇവന് ഗുരുത്വമില്ല ”

അത് കേട്ട് അവരുടെ മുഖം വിവർണ്ണമായി.

സൂര്യസേനന് അപമാനഭാരത്താൽ കോപം വന്നുവെങ്കിലും ഗുരുനാഥനെ പേടിച്ചു തല കുനിച്ചു നിന്നു.

പാർവ്വതി അതുകേട്ടു ഉള്ളിൽ ചിരിച്ചു

അദ്ദേഹം പാർവതിക്ക് നേരെ തിരിഞ്ഞു.

“ഇവിടെ ഈ മണ്ണിൽ ആദിനാരായണ ക്ഷേത്രമുണ്ട് , പോയിട്ടുണ്ടോ അവിടെ ?”

അവൾ തലയാട്ടി പോയിട്ടുണ്ട് എന്ന് സമ്മതിച്ചു അവിടെ വെച്ചാണ് പാർവ്വതി അപ്പുവിന്‍റെ   സാമീപ്യമറിഞ്ഞതും. അവൾക്കത് നല്ലപോലെ ഓർമ്മയുണ്ടായിരുന്നു.

“വേറെ എവിടെ പോയില്ലെങ്കിലും ഇടക്ക് അവിടെപോകണം , ദർശനം ചെയ്യണം ,, ഈ മണ്ണിൽ ആദ്യമായി നിർമ്മിക്കപ്പെട്ട വൈഷ്‌ണവക്ഷേത്രമാണ്,,  ആദി നാരായണന്‍റെ  ക്ഷേത്രം “ഒരു പുഞ്ചിരിയോടെ അദ്ദേഹം പറഞ്ഞു

എല്ലാവരോടും യാത്ര പറഞ്ഞു കൊണ്ട് അദ്ദേഹം അവിടെ നിന്നും പുറപ്പെട്ടു.

സപ്തലക്ഷ്മിമാരായി തിരഞ്ഞെടുക്കപ്പെട്ട സകലകന്യകമാർക്കും ആദിലക്ഷ്മിയായി ഭഗവാൻ ഉറപ്പിച്ച പാർവ്വതിക്കും സകലവിധ ഉപചാരങ്ങളും സമ്മാനങ്ങളും രാജകൊട്ടാരത്തെ പ്രതിനിധീകരിച്ചു മഹാശ്വേതാ ദേവി നൽകുകയുണ്ടായി.