അപരാജിതന്‍ 34 [Harshan] 8088

പ്രജാപതി രാജകൊട്ടാരത്തിൽ .

അപൂര്‍വങ്ങളില്‍ അപൂര്‍വ്വമായ ആദിനാരായണാരൂഢവുമായി ബന്ധപ്പെട്ട്

വിശേഷമായി ദ്രവ്യങ്ങളും പൂക്കളും കൊണ്ടലങ്കരിച്ച പൂജാസഭയിൽ മധ്യഭാഗത്തായി സ്വർണ്ണപീഠത്തിൽ പ്രജാപതികൾ അമൂല്യമായി സൂക്ഷിക്കുന്നതും ശ്രീവത്സഭൂമിയിലെ ക്ഷേത്രത്തിൽ പ്രതിഷ്ഠിക്കേണ്ടതുമായ സാളഗ്രാമവിഗ്രഹം താത്കാലികമായി കൊണ്ട് വന്നു പ്രതിഷ്ടിച്ചിരുന്നു.

വിഗ്രഹത്തെ തുളസിമാലയണിയിപ്പിച്ചലങ്കരിച്ചിരിക്കുന്നു.

മുന്നിലായി പാരിജാതം വെള്ളതാമരപ്പൂ തുളസികതിർ എല്ലാം അർപ്പിച്ചിരിക്കുന്നു.

നിരന്നു നിന്ന് തെളിഞ്ഞിരിക്കുന്നു ചെറുനിലവിളക്കുകൾ.

പുകയുന്ന ദശാംഗംവും സാംബ്രാണിയും.

വിഗ്രഹത്തിനു മുന്നിലായി നിലവിളക്ക് പൂർണ്ണശോഭയോടെ തെളിഞ്ഞുകൊണ്ടിരിക്കുന്നു.

വിളക്കിനു ചുവട്ടിലും തുളസികതിരുകളും താമരപ്പൂക്കളും അർപ്പിച്ചിരിക്കുന്നു.

അതിനെ മുന്നിലെ ഹോമകുണ്ഡത്തിൽ ദ്രവ്യങ്ങൾ സമർപ്പിച്ചു കൊണ്ട് ഏഴു  വൈഷ്ണവബ്രാഹ്മണ ശ്രേഷ്ഠന്മാർ പൂജകൾ നിർവഹിച്ചു കൊണ്ടിരിക്കുകയായിരുന്നു.

ഭഗവാന് മുന്നിലായി സൂര്യസേനനും ഇശാനികയും അവർക്കു സമീപം മഹാശ്വേതാദേവിയും

അവർക്കു പിന്നിലായി മറ്റു നൂറിലേറെ  അംഗങ്ങളും

കിഴക്കു വശത്തെ പീഠത്തിൽ മാനവേന്ദ്രവർമ്മനും ഇരുന്നിരുന്നു.

രാജകുടുംബങ്ങൾക്കു പിന്നിലായി ആദ്യസാമന്തന്മാരായ സുദർശന കുടുംബക്കാർ.

അവരുടെ കുടുംബത്തിലെ അംഗങ്ങൾ

അവര്‍ അന്‍പതിനടുത്ത് പേരോളം ഉണ്ടായിരുന്നു.

അവർക്കു പിന്നിലായി രണ്ടാം സാമന്തരായ നന്ദക കുടുംബക്കാർ.

അവർ  മാധവപുരം  കഴിഞ്ഞുള്ള വിഷ്ണുപുരി  ദേശത്തു താമസിക്കുന്നവർ ആണ്.

അവരുടെ കുടുംബത്തിൽ നിന്നും അൻപത് അടുത്ത് അംഗങ്ങൾ വന്നിട്ടുണ്ട്

അവർക്കു പുറകിൽ ആണ് മൂന്നാം സാമന്തരായ ദേവപാല കുലത്തിന്‍റെ  സ്ഥാനം.

ഇങ്ങനെയുള്ള വിശേഷപ്പെട്ട പൂജകൾ ചടങ്ങുകൾ ആചരിക്കുമ്പോൾ ഇതേ ശ്രേണിയിൽ തന്നെ വേണം ഉപവിഷ്ടരാകാനും.

ദേവർമഠത്തിലെ എല്ലാവരും അവിടെ നിരന്നിരുന്നു

ഏറ്റവും പുറകിലായി പാർവതിയും ശ്യാമും രാജശേഖരനും മാലിനിയും.

അവർക്കു പിന്നിലായി

വൈശാലിയിലെ ഇതര ബ്രാഹ്മണരും ക്ഷത്രിയരും സന്നിഹിതരാണ്.

ഈ വക ചടങ്ങുകളിൽ വൈശ്യനോ ശൂദ്രനോ പ്രവേശനമില്ല.

ഏറ്റവും വലിയ പ്രത്യേകത എന്തെന്നാൽ  അവിടെ ഏറ്റവും കൂടുതൽ പങ്കെടുക്കുന്നതും കന്യകമാരാണ്.