അപരാജിതന്‍ 34 [Harshan] 8114

“മാണിക്യ൦ സൂര്യനെ സൂചിപ്പിക്കുന്നു ,

സൂര്യനെ പ്രതിഷ്ടിച്ചിരിക്കുന്നത് സൂര്യന്‍റെ  ഏറ്റവും ഉച്ചരാശിയിലായ മേടരാശിയിൽ ,

സൂര്യന്‍റെ  കൃത്യമായ സ്ഥാനം മേടം പത്തിൽ ,

പത്താമുദയം നാളിൽ ,

ഒരു രാശി ചക്രത്തിൽ ആദിത്യ൯ ഏറ്റവും ശക്തിയിൽ അതീവ ബലവാനായി ജ്വലിക്കുന്ന ദിവസം,

ഏറ്റവും ശുഭകരമായ ദിനം,

സൂര്യൻ സർവ്വശക്തനായി നിൽക്കുന്ന സുദിനം ,

ഒരു ആശങ്കകളും വേണ്ട ,,,,

ആദിലക്ഷ്മി സ്വരുപത്തിൽ ഈ കന്യകയാണ് ഈ മഹാസാളഗ്രാമം കൈയേൽക്കുന്നുവെങ്കിൽ വിജയം സുനിശ്ചിതം ,

സകലവിഘ്നങ്ങളും സൂര്യന്‍റെ  പ്രകാശത്തിൽ കത്തിയമർന്നു പോകും യഥാസമയം മുഹൂർത്തം അണുവിടപോലും തെറ്റാതെ നാരായണന്‍റെ  സാളഗ്രാമപ്രതിഷ്ഠ നടന്നിരിക്കും ,

ഇത്  നാരായണനാണ് സത്യം “

വാഗീശ്വരന്‍ ഉറക്കെ പ്രഖ്യാപിച്ചു.

അത് കേട്ടപ്പോൾ സകലരും കൈകൾ കൂപ്പി എഴുന്നേറ്റു നാരായണ നാമം ജപിച്ചു

സൂര്യസേനൻ അഭിമാനത്തോടെ സകലരെയും നോക്കി ,സൂര്യ൯ ശക്തനായി സകല വിഘ്നങ്ങളും ഒഴിവാക്കി വിജയം നേടുമെന്ന് പറഞ്ഞപ്പോൾ അവനത് താൻ തന്നെ ആണെന്ന് ധരിച്ചു, താൻ മഹാശയനെ തോൽപ്പിച്ചു തന്‍റെ  വംശത്തിന്‍റെ  ദൗത്യമായ നാരായണപ്രതിഷ്ട ശ്രീവത്സഭൂമിയിൽ നടത്തും , തന്നിലൂടെ പ്രജാപതി സാമ്രാജ്യം കീർത്തികേൾക്കും എന്ന മൂഢവിശ്വാസത്തോടെ അവൻ ഉടവാളിൽ മുറുകെ പിടിച്ചു.

ചടങ്ങുകൾ എല്ലാം കഴിഞ്ഞപ്പോൾ ആരൂഡപൂജകൾ ചെയ്തു കളം മടക്കുകയും ആ പട്ടു തുണി വലിയ പട്ടു തുണി അഗ്നിയിൽ ജ്വലിപ്പിക്കുകയും ചെയ്തു.

അന്നേരം ആ കൃഷ്ണപ്പരുന്ത് പാര്‍വ്വതിയുടെ സമീപം വന്നു അവളുടെ പാദത്തില്‍ ഒന്നു കൊക്കുരുമ്മി  ചിറകടിച്ചു  പറന്നകന്നു.

എല്ലാവരും ആ ദൃശ്യം തൊഴുകൈകളോടെ നോക്കികണ്ടു.

അത് കഴിഞ്ഞ്

എല്ലാവരും കൂടെ വിഷ്ണു മന്ത്രങ്ങൾ ജപിച്ചു കൊണ്ടിരുന്നു.

വൈഷ്‌ണവ ബ്രാഹ്മണർ സാളഗ്രാമത്തിൽ പൂജകൾ അർപ്പിച്ചു തുടങ്ങി.

ഭഗവാന് മുന്നിലായി  പാർവ്വതിയെയാണ്   നിർത്തിയിരുന്നത്.എല്ലാവ൪ക്കും  മുന്നിലായി അവൾക്കു പിന്നിൽ സപ്തലക്ഷ്മിമാരായി തിരഞ്ഞെടുത്ത കന്യകകളും.

രാജകുടു൦ബാംഗങ്ങൾ പോലും അവൾക്കു പിന്നിലായിരുന്നു. അസൂയയോടെയാണ് ഇശാനിക ആ പൂജയിൽ നിന്നത്.

മഹാ ആരതിയോടെ വിശേഷ പൂജകൾ എല്ലാം അവസാനിച്ചു.

സകലരും പാർവ്വതിയുടെ സമീപം വന്നു.

പലരും പ്രായഭേദമന്യേ അവളുടെ കാൽ തൊട്ടു വന്ദിച്ചു.

എല്ലാം കണ്ടപ്പോള്‍ ഇശാനികയ്ക്ക് ദേഷ്യമാണ് പക വര്‍ദ്ധിച്ചു.

തനിക്കു കിട്ടേണ്ടുന്ന ഉപചാരമര്യാദകള്‍ എല്ലാം പാര്‍വ്വതി തട്ടി എടുത്തു എന്നു തന്നെ അവള്‍ മനസില്‍ ധരിച്ചു.

അതേ സമയം , പാർവ്വതി ഗുരുനാഥന്‍റെ  സമീപം ചെന്ന് അദ്ദേഹത്തിന്‍റെ  കാൽ തൊട്ടു വന്ദിച്ചു.

അദ്ദേഹം അവളുടെ ശിരസ്സിൽ കൈ വെച്ച് പറഞ്ഞു

“ചിരായുർവതി സകലസൗഭാഗ്യവതി ദീര്‍ഘസുമംഗലീ  ഭവ:”

(എല്ലാ സൗഭാഗ്യങ്ങളോടെയും ദീർഘായുസ്സോടെ സുമംഗലി ആയി  ജീവിക്കട്ടെ )