അപരാജിതന്‍ 34 [Harshan] 8110

എല്ലാവരും കേൾക്കെ ഗുരുനാഥര്‍ ഉറക്കെ പറഞ്ഞു

“ആരാണ് പറഞ്ഞത് നാരായണന് മുന്നിൽ  ബ്രാഹ്മണനും പ്രജാപതികളും അതിനു ശേഷം സാമന്തൻമാർക്കുമാണ് ,സ്ഥാനമെന്നും ,,ഈശ്വരന് മുന്നിൽ ഭക്തിക്കും സദ്കർമ്മങ്ങൾക്കും മനശുദ്ധിക്കും മാത്രമേ മൂല്യമുള്ളൂ ,, കുലമഹിമകളെ ഭഗവാന് മുന്നിൽ  ആരും പ്രതിഷ്ടിക്കണ്ട,, വർണ്ണങ്ങൾക്കും കുലങ്ങൾക്കും മേലെയാണ് ഭഗവാന്‍റെ  സ്ഥാനം ,, ആരും അത് വിസ്മരിക്കരുത് ,,ഈ കന്യക നിങ്ങള്‍ വിചാരിക്കുന്ന പോലെയൊരു അശ്രീകരമല്ല, ഇവള്‍ വിഷ്ണുപ്രിയയാണ് , നാരായണനേറെ ഇഷ്ടമുള്ളവള്‍ , ഇവള്‍ നിനയ്ക്കുന്നയിടത്ത് ഇവള്‍ക്ക് വേണ്ടി   വിഷ്ണുവാഹനമായ ഗരുഡന്‍ വന്നിരിക്കും”

അദ്ദേഹം അവളെ നോക്കി കൈകൂപ്പി വണങ്ങി,

അവളാകെ അമ്പരന്നു പോയിരുന്നു.

“ഈ ആദിനാരായണ ആരൂഢം സാക്ഷിയാക്കി നാരായണനെ മുന്നിര്‍ത്തി ഇവിടെ അസന്നിഗ്ദമായി ഞാന്‍ പ്രഖ്യാപിക്കുന്നു..

ഇവള്‍ ദേവ൪മഠത്തെ സമരേന്ദ്ര ദേവപാലരുടെ പൗത്രി ,,

പാർവതി ,,

ഇവളാണ് ആദിനാരായണൻ തിരഞ്ഞെടുത്ത ആദിലക്ഷ്മി

ഇവളെയാണ് സുവര്‍ണ്ണപീഠത്തില്‍ ആചാരമര്യാദകളോടെ ഇരുത്തേണ്ടത്”

അദ്ദേഹം അത് പറഞ്ഞപ്പോള്‍ കരഘോഷം ഉയര്‍ന്നു

നാരായണജപം മുഴങ്ങി

“പാര്‍വ്വതിയുടെ കണ്ണുകൾ നിറഞ്ഞൊഴുകുകയായിരുന്നു

സങ്കടം സഹിക്കാനാകുന്നില്ല

അവൾ കരച്ചിൽ കടിച്ചു പിടിക്കാൻ ശ്രമിച്ചു കൊണ്ടിരുന്നു

പറ്റുന്നില്ല ,

അവൾ ഇരു കൈകളും കൊണ്ട് മുഖം പൊത്തി ആ വിശാലമായ മണ്ഡപത്തിന് പുറത്തേക്ക് ഓടി , ഒരു തൂണില്‍ മുഖം പൊത്തി പൊട്ടിക്കരഞ്ഞുകൊണ്ടിരുന്നു.

എത്ര ശ്രമിച്ചിട്ടും കരച്ചിലടക്കാനാകുന്നില്ല.

അപ്പോളേക്കും മാലിനിയും രാജശേഖരനും ബന്ധുക്കളും അവിടെ ഓടിയെത്തി   അവരവളെ വളെ ആശ്വസിപ്പിച്ചുകൊണ്ടിരുന്നു.

സർവ്വരും അത്ഭുത കാഴ്‌ച കണ്ട അനുഭവത്തിന്‍റെ  തീവ്രതയിൽ നിന്നും വിട്ടു മാറിയിട്ടില്ല

“ആ കുട്ടിക്ക് അര്‍ഹിക്കുന്ന ഉപചാരങ്ങളും ബഹുമാനങ്ങളും നല്കി   ആദി ലക്ഷ്മി സുവര്‍ണ്ണപീഠത്തിൽ ഉപവിഷ്ടയാക്കൂ ,,,”  അദ്ദേഹം മഹാശ്വേതദേവിയെയും ശ്രീധര്‍മ്മ സേനനെയും നോക്കി പറഞ്ഞു

അന്നേരം കൃഷ്ണപരുന്ത് ചിറകടിച്ചു കൊണ്ട് പീഠത്തിൽ നിന്നും ഉയർന്നു ഒരു വലിയ സ്തംഭത്തിനു മുകളിൽ പോയി ഇരുന്നു ,

ഒരു കാഴ്‌ചക്കാരനെ പോലെ

അദ്ദേഹം പറഞ്ഞതു കേട്ട് മഹാശ്വേതാ ദേവിയും ശ്രീധര്‍മ്മനും  അവളെ അവിടെ നിന്നും ആനയിച്ചു കൊണ്ട് വന്നു.

പീഠത്തിൽ തുളസി തീർത്ഥം തളിച്ചു

പാർവതിയെ ആദിലക്ഷ്മി പീഠത്തിൽ ഉപവിഷ്ടയാക്കി.

അവളുടെ സഹോദരിമാരും ബന്ധുക്കളും സന്തോഷം കൊണ്ട് നിറഞ്ഞ കണ്ണുകൾ തുടച്ചു .

കൈയിൽ താമരപ്പൂവും പിടിച്ചു പീഠത്തിൽ പാർവതി ഇരുന്നു

ആദിനാരായണ ആരൂഢത്തിന്‍റെ അധിപതിയായ ആദിലക്ഷ്മിയായി”