അപരാജിതന്‍ 34 [Harshan] 8110

പാവം പാർവ്വതി ഒരു മൂലയിൽ വിഷമ൦ സഹിക്കാനാകാതെയിരുന്നു.

അവളുടെ അടുത്തു തന്നെ ശ്യാമും ഇരുന്നു.

പാര്‍വ്വതി ഇരുന്നതിനാല്‍ അശുദ്ധി സംഭവിച്ച ആദിനാരായണാരൂഢത്തിൽ ശുദ്ധിപൂജകൾ ചെയ്തു പുണ്യാഹം തളിച്ച് ശുദ്ധി വരുത്തി.

പുറകിൽ പലരും അവജ്ഞയോടെ പാർവതിയെ നോക്കുകയായിരുന്നു.

പലരും അടക്കം പറഞ്ഞു കൊണ്ടിരുന്നു

“മൃത്യുദോഷമുള്ള പെണ്ണാണ് , ദുശ്ശകുനം , ദുശ്ശകുനത്തെ പുണ്യമായ ആദിനാരായണാരൂഢത്തിൽ ഇരുത്തിയതിൽ വിഷ്ണു ഭഗവാൻ കോപിച്ചതു കൊണ്ടാണ് “

“ശാപം കിട്ടിയ പെണ്ണ് കാരണം ഭഗവാന്‍ കോപിച്ചു “

ഇതെല്ലാം പാർവ്വതിയും വിഷമത്തോടെ  കേട്ട് കൊണ്ടിരുന്നു

അതെല്ലാം അവളെ കൂടുതൽ കൂടുതൽ നൊമ്പരപ്പെടുത്തികൊണ്ടിരുന്നു.

താനൊരു ദുശ്ശകുനമാണെന്ന് സ്വയം അവൾ വിശ്വസിച്ചു

ആ നിമിഷം ഭൂമി പിളര്‍ന്ന് ഉള്ളിലേക്ക് പോയിരുന്നുവെങ്കില്‍ എന്നു വരെ അവള്‍ ആഗ്രഹിച്ചിരുന്നു.

ഒഴിഞ്ഞു കിടക്കുന്ന മൃഗശീർഷ നക്ഷത്രത്തിൽ ഭഗവാന്‍റെ  പൂജയ്ക്കു വെച്ചിരുന്ന ഒരു താമരപ്പൂവ് കൊണ്ട് വന്നു ഗുരുനാഥർ വെച്ചു.

അപ്പോൾ ഇശാനിക ആദിലക്ഷ്മി പീഠത്തിൽ ഇരിക്കാൻ പോകുകയായിരുന്നു.

“കുമാരി അവിടെ നില്‍ക്കൂ “  ഗുരുനാഥന്‍ വിളിച്ച് പറഞ്ഞു

എന്തെന്നറിയാതെ അവൾ പീഠത്തിനു സമീപം നിന്നു.

“കുലപതി ,, ഭഗവാന് പ്രിയപ്പെട്ട തുളസികതിർ കൊണ്ട് ഒരു തവണ കൂടെ ശ്രമിക്കൂ ”

അദ്ദേഹം പറഞ്ഞത് കേട്ടു  ഒരു തുളസി കതിർ കയ്യിലെടുത്തു കൊണ്ട് രാശി ചക്രത്തെ പ്രദക്ഷിണം ചെയ്തു മധ്യഭാഗത്തു ചെന്ന് നിന്ന് മുകളിലേക്ക് എറിഞ്ഞു.

ആ തുളസി വായുവിൽ തെന്നിനീങ്ങി കൃത്യം ഇടവരാശിയിലെ മകയീര്യ നക്ഷത്ര ഭാഗത്തു വെച്ചിരുന്ന താമര പൂവിൽ തന്നെ പതിച്ചു

അത് കണ്ടു അദ്ദേഹം പുഞ്ചിരിച്ചു.

“കണ്ടില്ലേ ,,എല്ലാം നാരായണന്‍റെ  മനസ്സാണ് , മൃഗശീര്‍ഷത്തില്‍ പിറന്ന ഇഷാനിക തന്നെ ആദിലക്ഷ്മി “

അതുകേട്ട് ഇഷാനിക ഏറെ ആഹ്ലാദിച്ചു.

“കുമാരി തന്നെയാണ് വിഷ്ണുപ്രിയ , നാരായണനു പ്രിയമായവള്‍ , ആദിലക്ഷ്മി സ്ഥാനത്ത് ആരാണോ അവരുടെ ഐശ്വര്യം കൊണ്ട് മാത്രമേ എന്തിന് വേണ്ടിയാണോ ഈ ആരൂഢം നടത്തുന്നത് അത് പൂര്‍ണ്ണമാകുകയുള്ളൂ”

അദ്ദേഹം എല്ലാവരും കേള്‍ക്കെ പറഞ്ഞു.

“ശരി ,,ഇനി കുമാരി ആദിലക്ഷ്മി പീഠത്തിൽ ഇരുന്നു കൊള്ളൂ ”

അഭിമാനത്തോടെ ഇശാനിക പീഠത്തിൽ ഇരുന്നു

അവൾ ആദ്യം നോക്കിയതും പിന്നിൽ ഒരു കോണിൽ വിഷമിച്ചിരിക്കുന്ന പാർവതിയെ തന്നെ.ഒപ്പം ഉടവാൾ പിടിച്ചു കൊണ്ട് സൂര്യസേനനെ മധ്യഭാഗത്ത് ഇരുത്തി.