അപരാജിതന്‍ 34 [Harshan] 8110

അവളുടെ  ആ നിസ്സഹായവസ്ഥ കണ്ടു ഇഷാനികയുടെ മുഖത്ത് പ്രസന്നഭാവം നിറഞ്ഞു.തനിക്കൊത്തവൾ അല്ല എന്ന് ഭഗവാൻ തന്നെ പാർവ്വതിയെ സകലരുടെയും മുന്നിൽ വെച്ച് തെളിയിച്ചു കൊടുത്തതിന്‍റെ  ആഹ്ലാദം.

രാജശേഖരനും മാലിനിയ്ക്കും ശ്യാമിനും അന്നേരം എന്ത് ചെയ്യണമെന്ന് അറിയാത്ത അവസ്ഥ വന്നു.

“പുറത്തിറങ്ങ് ,, നീ ആദിനാരായണാരൂഢത്തിൽ ഇരിക്കാൻ യോഗ്യയല്ല, നാരായണൻ ആഗ്രഹിക്കുന്നവർ മാത്രമേ ഇതിലിക്കാവൂ ,,, നീ കാരണമാണ് ഈ അനർത്ഥങ്ങൾ സംഭവിച്ചത്  ” മഹാബ്രാഹ്മണനായ ആദവ ഗുരുനാഥൻ പറയുന്നത് കേട്ട് എല്ലാവരും ഒരു കുറ്റവാളിയെ എന്ന പോലെ പാർവതിയെ നോക്കി.

ഇശാനിക അതുകേട്ടു ഏറെ സന്തോഷിച്ചു.

അവൾ നിറഞ്ഞ മിഴികളോടെ സകലരുടെയും മുന്നിൽ അപമാനിക്കപ്പെട്ടു കൊണ്ട് പുറത്തേക്കിറങ്ങി.

” ആദിനാരായണാരൂഢ൦  ഇവളാല്‍ അശുദ്ധമായി , വേഗം ശുദ്ധിപൂജകൾ ചെയ്യൂ ” അദ്ദേഹം എല്ലാരും കേൾക്കെ പൂജാരികളോട് പറഞ്ഞു.

താനിരുന്നതിനാൽ കണ്ണന്‍റെ  ആരൂഢം  അശുദ്ധമായി എന്ന് കേട്ടപ്പോൾ

അപമാനഭാരത്താൽ മനസ് നീറി അവൾ വിതുമ്പികരഞ്ഞു കൊണ്ട്  സകലരുടെയും മുന്നിൽ ശിരസു താഴ്ത്തി നിന്നു .

അത് കണ്ടു രാജശേഖരൻ വേഗം അങ്ങോട്ടേക്ക് നടന്നടുത്തു.

അവളുടെ അടുത്തെത്തി “മോളെ ” എന്ന് വിളിച്ചതും പൊട്ടിക്കരഞ്ഞു കൊണ്ട് അവൾ അയാളെ കെട്ടിപ്പിടിച്ചു.

“ഞാന്‍ ഇരുന്നാ അശുദ്ധിയാവോ പപ്പാ ,,, “ അവള്‍ ഏങ്ങലോടെ കരഞ്ഞു ചോദിച്ചു.

“ഇല്ല ,,ഇല്ലെടാ മുത്തേ ,, പപ്പെടെ മോള് വാ ,, “

അയാൾ അവളെ ആശ്വസിപ്പിച്ചു കൊണ്ട് തിരികെ അവളെയും കൂട്ടി നടന്നു.

“നമുക് പോകാം പപ്പാ ,,,”അവൾ സങ്കടത്തോടെ പറഞ്ഞു

“കരയണ്ട ,, നമുക്ക് പോകാം ,,,,” എന്ന് പറഞ്ഞു അവിടെ നിന്നും അവരിറങ്ങാൻ തുനിഞ്ഞു

“എവിടെ പോകുന്നു ?”  ചോദ്യം കേട്ട് രാജശേഖര൯ തിരിഞ്ഞു

കുലപതിയുടെ ശിഷ്യൻ ആയിരുന്നു

“എന്‍റെ   കുഞ്ഞിനെ വിഷമിപ്പിക്കുന്ന ഒരിടത്തും നിൽക്കാൻ ഞങ്ങൾ ആഗ്രഹിക്കുന്നില്ല , ഇതൊക്കെ നിങ്ങളുടെ  ചടങ്ങുകൾ ,,നിങ്ങൾ നടത്തികൊള്ളൂ ” രാജശേഖരൻ പറഞ്ഞു

“എങ്കിൽ നിങ്ങളവിടെ നിൽക്കൂ ,, ഇതിൽ പങ്കെടുത്താൽ അവസാനം വരെ നില്കണം അല്ലെങ്കിൽ നിങ്ങൾക്ക് തന്നെ  ദോഷം വരും ,,”

“വേണ്ട പപ്പാ ,,,ഇനിയും എന്നെ അപമാനിക്കും , പോവാം പപ്പാ , എനിക്കിവിടെ നില്ക്കാന്‍ വയ്യ “

അവള്‍ കരഞ്ഞുകൊണ്ട് പറഞ്ഞു.

“ദോഷങ്ങള്‍ ഏറ്റുവാങ്ങാന്‍ തയാറെങ്കില്‍ നിങ്ങള്ക്ക് പോകാം , അല്ലെങ്കില്‍ ചടങ്ങു കഴിയുന്നത് വരെ നില്‍ക്കുക “ അതും പറഞ്ഞു അയാള്‍ തിരികെ  നടന്നു.

അവർ നിൽക്കാൻ തന്നെ തീരുമാനിച്ചു.