അപരാജിതന്‍ 34 [Harshan] 8110

“അതിമഹത്തായ സുദർശനചക്രതുല്യമായ ആദിനാരായണാരൂഢത്തെയാണ് നീ നിരായുധനെ ആക്രമിച്ചു വീഴ്ത്തി  അപമാനിച്ചത് , നീ നിന്ദിച്ചത് സാക്ഷാൽ നാരായണനെ തന്നെ , എന്‍റെ   ആജ്ഞയാണ് വേഗം ആയുധവുമായി  പുറത്തിറങ്ങി നാരായണനോടും കുലപതി വാഗീശ്വരനോടും മാപ്പ് ചോദിക്ക്,,,,,,”

സൂര്യസേനൻ തന്‍റെ   കായബലത്തിൽ അഹങ്കരിച്ചു കൊണ്ട് പുച്ഛത്തോടെ അദ്ദേഹത്തെ നോക്കി.

തന്‍റെ  ആജ്ഞ അനുസരിക്കുന്നില്ലെന്നു കണ്ടപ്പോൾ അദ്ദേഹം മഹാശ്വേതാ ദേവിയെയും ശ്രീധർമ്മസേനനെയും നോക്കി.

“സൂര്യാ ,,,,,ഗുരുനാഥൻ പറയുന്നത് പോലെ അനുസരിക്കൂ ,,,” മഹാശ്വേതാ ദേവി ആരൂഡത്തിനു സമീപത്തേക്ക് വന്നു  കൊണ്ട് അവനോടു അപേക്ഷിച്ചു.

“സൂര്യാ ,,,അദ്ദേഹം പറഞ്ഞത് ചെയ്യൂ ” ശ്രീധർമ്മനും പറഞ്ഞു

“ഈ രാജകൊട്ടാരത്തിൽ വന്നു എന്നോട് ആജ്ഞാപിക്കാൻ ഒരാളും ധൈര്യപെട്ടിട്ടില്ല , അങ്ങനെ ആരെങ്കിലും ചെയ്താൽ ഈ ഉടവാള് കൊണ്ട് തന്നെ ഞാൻ മറുപടി പറയും ,,അതേത് ക്ഷത്രിയനായാലും ബ്രാഹ്മണനായാലും ” അഹന്തയോടെ സൂര്യസേനൻ സർവ്വരുടേയും മുന്നിൽ വെച്ച് ഉദ്ഘോഷിച്ചു.

“മോനെ ,, മണ്ണിലവതരിച്ച ഭാ൪ഗ്ഗവരാമനാണ് പറയുന്നത് ,,അനുസരിയ്ക്ക് മോനെ ,,” കൈകൾ കൂപ്പി നിറകണ്ണുകളോടെ മഹാശ്വേതാ ദേവി അപേക്ഷിച്ചു.

സകലരും എഴുന്നേറ്റു നിന്ന സമയത്ത് മാനവേന്ദ്ര വർമ്മൻ തന്‍റെ  ഇരിപ്പിടത്തിൽ കാലിന്മേൽ കാൽ  കയറ്റി വെച്ച്  ഇരിക്കുകയായിരുന്നു എല്ലാം വീക്ഷിച്ചു കൊണ്ട്. വൃദ്ധനായ മാനവേന്ദ്ര വർമ്മന് തന്‍റെ   സമകാലികനായ ആദവനാഥരോട്‌ പണ്ട് മുതലെ വിവിധ കരണങ്ങളാൽ വൈരാഗ്യം ഉള്ളിലുണ്ട്.

സൂര്യസേനൻ വേഗം മാനവേന്ദ്രനെ നോക്കി

അയാൾ ഊന്നുവടിയിൽ കൈയമർത്തി ഒരു വിരൽ പൊക്കി അത് അനുസരിക്കേണ്ട കാര്യമില്ല എന്ന അർത്ഥത്തിൽ  തന്നെ ആംഗ്യം കാണിച്ചു.

മറ്റുള്ളവരുടെ മുന്നിൽ ആദവനാഥ൪ അപമാനിക്കപെടുന്നത് കാണാനുള്ള ഒരാഗ്രഹം

“സൂര്യസേനാ ,,,,,,,,ഇതെന്‍റെ  അവസാനവാക്ക് , ഞാൻ പറഞ്ഞത് അനുസരിക്കാത്ത പക്ഷം നാരായണന് വേണ്ടി നിന്നോട് എതിരിടാൻ ഞാൻ ബാധ്യസ്ഥനാകും ,,,,അതിനു നിനക്ക് ധൈര്യമുണ്ടോ ?”

“നിങ്ങൾ വൈഷ്‌ണവ ബ്രാഹ്മണനാണ് , എന്നുള്ള ബഹുമാനം എനിക്കുണ്ട് , എന്നതല്ലാതെ നിങ്ങൾ പറയുന്നതൊക്കെ അനുസരിക്കേണ്ടുന്ന ബാധ്യത എനിക്കില്ല ,, ഇവിടത്തെ വിശ്വാസം അനുസരിച്ച് പ്രജാപതി  സാമ്രാജ്യത്തിലെ കിരീടാവകാശി നാരായണന്‍റെ  പ്രതിപുരുഷൻ തന്നെയാണ് ,,  മഹാവിഷ്ണുവിന് തുല്യന്‍ , അതായത് ഞാൻ തന്നെ നാരായണ൯, ഈ കൊട്ടാരത്തില്‍ വന്ന് എന്നോട് ആജ്ഞാപിച്ചതിനു എന്നോട് നിങ്ങൾ ക്ഷമ ചോദിക്കണം ”

പരുഷമായി  സൂര്യസേനൻ പറഞ്ഞു

സർവ്വരും ആകെ ഭയത്തിലായി രാജകുടുംബ൦ഗങ്ങളും സകലസാമന്തരും

സൂര്യസേനൻ എതിരിടാൻ പോകുന്നത് ബലവാനായ ആദവനാഥരോടാണ്

പാർവ്വതി എന്താണ് സംഭവിക്കാൻ പോകുന്നത് എന്ന് അങ്ങേയറ്റം ആകാംഷയോടെ വീക്ഷിച്ചു കൊണ്ടിരുന്നു.