അപരാജിതന്‍ 34 [Harshan] 8114

നനവാർന്ന മിഴികളോടെ പാർവ്വതി സ്വർണ്ണപീഠത്തിൽ ഉപവിഷ്ടയായ ഇശാനികയുടെ പാദങ്ങളിൽ സ്പർശിച്ചു വണങ്ങി.

“നാരായണന് മുന്നിൽ ഞാനാ വലിയവൾ, നിനക്കെന്‍റെ  ദാസിയാകാനുളള യോഗ്യത മാത്രം ” ഒരു പുച്ഛത്തോടെ ഇശാനിക  പാർവതിയോട് പറഞ്ഞു.

അവളെല്ലാം വിഷമത്തോടെ കേട്ടുകൊണ്ട് ഇഷാനികയുടെ മുഖത്തേക്ക് ദുഖത്തോടെ നോക്കി ,അപമാനഭാരത്തോടെ എഴുന്നേറ്റു.

ഭുവനേശ്വരി ദേവി അവളെ ആദിനാരായണാരൂഢത്തിലേക്ക് ആനയിച്ചു ,

പാര്‍വ്വതി കണ്ണുകള്‍ തുടച്ചു ഇശാനിക ഇരുന്നയിടത്ത് ഇരുന്നു.

ഇശാനിക അത്രയേറെ സന്തോഷത്തിലായിരുന്നു, സര്‍വ്വരുടെയും മുന്നില്‍ പാര്‍വ്വതി തന്‍റെ  പാദനമസ്കാരം ചെയ്തതില്‍.

അവള്‍ അഹന്ത നിറഞ്ഞ മനസോടെ , മുഖഭാവത്തോടെ നാരായണ സാളഗ്രാമ വിഗ്രഹത്തില്‍ ഒന്നു നോക്കി , എന്നിട്ട് വിഷമിച്ചിരിക്കുന്ന പാര്‍വതിയെയും.

അവളുടെ ചുണ്ടില്‍ അഹമെന്ന ഭാവം ഒരു പുഞ്ചിരിയായി തെളിഞ്ഞു.

ശ്യാം ആകെ വിഷമത്തില്‍ പാര്‍വതിയെ നോക്കി നിന്നു.

<<<<O>>>>

സപ്ത ലക്ഷ്മിമാരെയും ആദിലക്ഷ്മിയെയും ആദിനാരായണാരൂഢത്തില്‍  നിന്നും തിരഞ്ഞെടുത്തതിന് ശേഷം അടുത്ത സുപ്രധാനമായ ചടങ്ങിലേക്ക് പ്രവേശിച്ചു.

പണ്ഡിതശ്രേഷ്ഠന്മാരുടെ ഉപദേശപ്രകാരം സൂര്യസേനൻ എഴുന്നേറ്റു.

രാജകൊട്ടാരത്തിന്‍റെ  ഉടവാൾ അച്ഛനായ ശ്രീധർമ്മസേനൻ , സൂര്യസേനനു നൽകി.

ആ വാളും കൊണ്ട് സൂര്യസേനൻ അവിടെ രാശിചക്രത്തിനുള്ളിലെക്കു നടന്നു.

അവിടെ മധ്യഭാഗത്തെ വൃത്തത്തിനുള്ളിൽ സൂക്ഷിച്ചിരിക്കുന്ന നാരായണവിഗ്രഹത്തിനു സമീപമായി ഇരുന്നു.അതിനർത്ഥം അധിപതിയായ നാരായണന് തുണയായി യുവരാജാവായ സൂര്യസേനൻ നിലകൊള്ളുന്നു. തുണയായും സേനാനായകനായും  നാരായണന് വേണ്ടി സൂര്യസേനൻ അടരാടും എന്നുള്ള പ്രഖ്യാപനമായിരുന്നു അത്.

നാരായണ നാമം മുഴങ്ങി

ബ്രാഹ്മണർ വിഷ്ണുമന്ത്രങ്ങൾ ജപിച്ചു കൊണ്ട് സാളഗ്രാമ പൂജ ആരംഭിച്ചു ആരതി ഉഴിഞ്ഞു

ആദിലക്ഷ്മിയുടെ സാന്നിധ്യത്തിൽ മഹാസാളഗ്രാമ പ്രതിഷ്ഠയെ സംബന്ധിച്ചുള്ള പ്രവചനത്തിനായി ആരൂഡ൦ നോക്കി ഫലം കണ്ടെത്തുന്ന അടുത്ത ചടങ്ങിനെ കുറിച്ച് എല്ലാവർക്കും അറിവ് പകർന്നതിന് ശേഷം

കൂട്ടത്തിൽ നിന്നും ഒരു അഞ്ചു വയസ്സുള്ള ബാലികയെ ജ്യോതിഷകുലപതി വാത്സല്യത്തോടെ വിളിച്ചു.

പ്രജാപതി രാജകൊട്ടാരത്തിലെ ഒരു ബാലികയായിരുന്നു.

ആ കുട്ടി അദ്ദേഹത്തിന് സമീപം നിന്നു.

അദ്ദേഹം ആ കുട്ടിയെ ഒരു താലം കാണിച്ചു.