അപരാജിതന്‍ 34 [Harshan] 8114

കുലപതി പറയുന്നത് കേട്ടു എല്ലാവരും അല്പം നേരം ചിന്തിച്ചു.

“നിയമം എന്താണോ അത് അനുവർത്തിക്കണമെന്നാണ് എന്‍റെ   അഭിപ്രായം ,,ബാക്കി നിങ്ങളുടെ തീരുമാനം പോലെ ” മഹാശ്വേതാ ദേവി എല്ലാവരും കേൾക്കെ വിനീതമായി തന്‍റെ   അഭിപ്രായം പറഞ്ഞു.

ശ്രീധർമ്മസേനൻ എന്താണോ ആദിനാരായണാരൂഢ നിയമം അത് പോലെ നടക്കട്ടെ  എന്ന് തന്‍റെ  തീരുമാനം അറിയിച്ചു.

അതി൯ പ്രകാരം സാളഗ്രാമ വിഗ്രഹത്തിന്‍റെ  കാൽപാദത്തിൽ സമർപ്പിച്ചിരുന്ന താമരപ്പൂവില്‍ നിന്നും ഒരു ഇതള്‍ ഇറുത്ത്   ജ്യോതിഷ കുലപതി

വന്നു.

പ്രാർത്ഥനകൾ നടത്തികൊണ്ടു പിൻതിരിഞ്ഞു നിന്ന്  മുകളിലേക്ക്  ഇതള്‍ ഉയർത്തി എറിഞ്ഞു.

സർവ്വരും ആ താമരപ്പൂവിതളിന്റെ  സഞ്ചാരം ഭക്തിയോടെ കൈകൾ കൂപ്പി കണ്ടു നിന്നു.

മുകളിൽ നിന്നും താമരപ്പൂവിതള്‍ മെല്ലെ വായുവിലൂടെ തെന്നി നീങ്ങി രാശിചക്രത്തിൽ മൃഗശീർഷ നക്ഷത്രചക്രത്തിനു മുന്നിലായി വന്നുപതിച്ചു.

താമരപ്പൂവിതള്‍ പതിച്ചത് ഇശാനികയുടെ സ്ഥാനത്ത് തന്നെ

ആദിലക്ഷ്മി സ്വരൂപമായി നാരായണൻ കണ്ടത് ഇശാനികയെ തന്നെ.

സർവ്വരും അത്ഭുതത്തോടെ തന്നെ നാരായണനാമം ജപിച്ചുകൊണ്ട് ഭഗവാനെ വാഴ്ത്തി.

“കണ്ടില്ലേ കുലപതി ,, ഇപ്പോൾ മനസിലായില്ലേ ,, ഇത് നാരായണന്‍റെ  തീരുമാനം തന്നെയാണ് ” മാനവേന്ദ്ര വർമ്മൻ എല്ലാരു൦ കേൾക്കെ തന്നെ പറഞ്ഞു.

സർവ്വ ആദരവും കൊടുത്തു കൊണ്ട് തന്നെ ഇശാനികയെ അവിടെ നിന്നും എഴുന്നേൽപ്പിച്ചു.

ഏഴു വെള്ളി പീഠങ്ങൾക്കു മേലെയുള്ള ഉയർന്ന സ്വർണ്ണ പീഠത്തിൽ ഇശാനികയെ ഇരുത്തി.

നാരായണന്‍റെ  തീരുമാനം ഇശാനിക ആദിലക്ഷ്‌മി സ്വരൂപം കൊള്ളുന്ന കന്യകയായി തന്‍റെ   സാളഗ്രാമത്തിന്‍റെ  ഉടമസ്ഥയായി അമൂല്യമായ വിഗ്രഹത്തെ   കൈകളിലേന്തി കർമ്മങ്ങളിൽ പങ്കാളിയാകും.

ഇശാനിക എഴുന്നേറ്റപ്പോൾ മൃഗശീർഷ നക്ഷത്രക്കളം ശൂന്യമായി.

ജ്യോതിഷകുലപതി പറഞ്ഞു

ആദിനാരായണാരൂഢ൦ ശൂന്യമായി ഇരിക്കാൻ പാടില്ല , അത് കൊണ്ട് നേരത്തെ ഇശാനിക തമ്പുരാട്ടിയുടെ ഒപ്പം എഴുന്നേറ്റ ആ പെൺകുട്ടി ഇങ്ങോട്ടു വരൂ ”

മാലിനി പാർവതിയെ തോണ്ടി

“മോളെ എഴുന്നേൽക്ക് ,, ”

അവൾക്ക് എഴുന്നേൽക്കാൻ ഒട്ടും താല്പര്യമുണ്ടായില്ല

“മറ്റൊരാൾക്ക് പകരം പോയി താനെന്തിനാണ് അവിടെയിരിക്കുന്നത് , എണ്ണം തികയ്ക്കാനോ എന്നവൾ ചിന്തിച്ചതിനാൽ എഴുന്നേറ്റില്ല

അപ്പോളേക്കും ഭുവനേശ്വരി ദേവി കൂടെ അവളെ നിർബന്ധിച്ചു.