അപരാജിതന്‍ 34 [Harshan] 8110

“ഇപ്രകാരം ഇരുപത്തിഏഴു നക്ഷത്രങ്ങൾക്ക് തുല്യമായി ഇരുപത്തി ഏഴു കന്യകമാർ അതാത് രാശി ചക്രങ്ങളിൽ ഉപവിഷ്ടരാകണം, ഈ ചക്രത്തെ അടിസ്ഥാനപ്പെടുത്തിയാണ് ആദിനാരായണാരൂഢം പ്രശ്ന മാർഗ്ഗം അവലംബിക്കുന്നത് ,

കന്യകമാർ ആകണം , അത്  കുമാരികളോ യുവതികളോ ആകാം , പക്ഷെ ഇരുപത്തി ഏഴു നക്ഷത്രങ്ങളും ഉണ്ടായിരിക്കണം ”

ജ്യോതിഷ കുലപതി എല്ലാവരെയും അറിയിച്ചു.

“ഇവിടെ രാശി ചക്രത്തിൽ നക്ഷത്രങ്ങളെ പിന്നിലേക്കാണ് പ്രതിഷ്ഠിക്കുന്നത് അതിനാൽ മീന രാശിയിൽ ഉൾക്കൊള്ളുന്ന രേവതി , ഉത്തര ഭാദ്രപദം , പൂർവ്വ ഭദ്ര പദം നക്ഷത്രങ്ങൾ ജനിച്ച കന്യകമാർ എഴുന്നേൽക്കുക ”

അദ്ദേഹം പറഞ്ഞതു കേട്ട് രേവതി , ഉത്രട്ടാതി , പുരുരുട്ടാതി നക്ഷത്രങ്ങളിൽ ജനിച്ച കന്യകമാർ എഴുന്നേറ്റു.

അതില്‍  ദേവർമ്മഠത്തെ വൈഷ്ണവിയെ രേവതിയുടെ സ്ഥാനത്തും സുദർശനത്തെ ഒരു യുവതിയെ ഉത്രട്ടാതിയുടെ സ്ഥാനത്തും നന്ദക കുടുംബത്തിലെ ഒരു പെൺകുട്ടിയെ പൂരുട്ടാതി സ്ഥാനത്തും  മൂന്നു നക്ഷത്രങ്ങളെ സൂചിപ്പിച്ചു കൊണ്ട് ഉപവിഷ്ടരാക്കി.

അടുത്തത് കുംഭ രാശി , അത് കഴിഞ്ഞ് മകര രാശി ഇപ്രകാരം കന്യകകളെ ഇരുത്തി ഒടുവിൽ ഇടവരാശിയിൽ എത്തി.

” വൃഷഭരാശിയിലെ കാർത്തിക രോഹിണി മൃഗശീ൪ഷ നക്ഷത്രജാതകളായ കന്യകമാർ എഴുന്നേൽക്കുക”

ജ്യോതിഷി പറഞ്ഞതിന് പ്രകാരം

കാർത്തികയിൽ ജനിച്ച ഇന്ദുലേഖയും രോഹിണിയിൽ ജനിച്ച പ്രജാപതി വംശത്തെ ഒരു കൗമാരപ്രായക്കാരിയും എഴുന്നേറ്റു ,, ”

“മൃഗശീർഷമില്ലെ ,,,” മകയീര്യം നക്ഷത്രം കാണാതെ ആയപ്പോൾ അദ്ദേഹം ഉറക്കെ ചോദിച്ചു.

“മോളെ എഴുന്നേൽക്ക് ” മാലിനി പാർവതിയോടു പറഞ്ഞു

അവൾ ഒരൽപം സങ്കോചത്തോടെ എഴുന്നേറ്റു.

അതെ സമയം തന്നെ

മറ്റൊരു യുവതി കൂടെ എഴുന്നേറ്റു.

രാജകുമാരിയായ ഇശാനിക, അവളുടെയും മകയീര്യം നക്ഷത്രം തന്നെ

“രണ്ടു പേരുണ്ടല്ലോ ?” എന്ന് ജ്യോതിഷി എല്ലാവരും കേൾക്കെ പറഞ്ഞു.

അത് കേട്ട് ഇശാനിക പിന്നിലേക്ക് നോക്കി

തനിക്ക് തുല്യമായി ദേവർമഠത്തെ തന്‍റെ  എതിരാളി പാർവ്വതി കൂടെ നിൽക്കുന്നത് കണ്ടപ്പോൾ അവൾക്കു കോപം വന്നു.

“ഇവരില്‍ ആരാ രാശി ചക്രത്തിൽ ഇരിക്കുക ?” ജ്യോതിഷി ചോദിച്ചു.

“സംശയമെന്താ ,, ഇശാനിക തമ്പുരാട്ടി തന്നെ ” സുദർശനകുലത്തിലെ അൽപ്പം പ്രായമുളള  രാജഭഭക്തയായ സ്ത്രീ പറഞ്ഞു.

“ആ കുട്ടിയല്ലേ ആദ്യം എഴുന്നേറ്റത് ?’ ജ്യോതിഷി ചോദിച്ചു.

“അതിന് ,,, രാജകുമാരിക്ക് തുല്യയാകുമോ മൂന്നാം സാമന്തരുടെ കുടുംബത്തിലെ കുട്ടി ”