അപരാജിതന്‍ 34 [Harshan] 8110

ശിവശൈലത്ത്

“സത്യമാണോ വേലാ .. മഠത്തിലമ്മ അവ്വയാറെ തല്ലിയോ ?” സ്വാമി മുത്തശ്ശൻ ചോദിച്ചു.

“ഉവ്വ് ,,സത്യമാണ് സ്വാമിയയ്യാ ,,നമ്മൾക്ക് സാധനങ്ങൾ വാങ്ങി തന്നതറിഞ്ഞ ദേഷ്യത്തിലാ മഠത്തിലമ്മ തല്ലിയത് ,, കണ്ടു നിന്ന ഞങ്ങൾക്ക് ഒരുപാട് വിഷമമായി”

“എന്നിട്ടു അവരെങ്ങോട്ടാ പോയതെന്നറിയുമോ ?”

“അറിയില്ല ,, ആ കുഞ്ഞിന്‍റെ  അച്ഛനാണ്  അവരോടു ഇറങ്ങാൻ പറഞ്ഞത് ”

“കഷ്ടമായല്ലോ ,,നമ്മളെ  സഹായിച്ചതിന് അവ്വയാറിന്  വേദന അനുഭവിക്കേണ്ടി വന്നല്ലോ ,,”

വിഷമത്തോടെ വൈദ്യർ മുത്തശ്ശൻ പറഞ്ഞു.

അപ്പോളാണ്

ആദി ജീപ്പുമായി അവിടെ വന്നത്.

എല്ലാരും കൂടി നില്‍ക്കുന്നത് കണ്ടു അവന്‍ അങ്ങോട്ടേക്ക് നടന്നു.

“എന്താ വിഷയ൦ ?”

“അറിവഴകാ ,, ഇന്ന് അരിയും പലവ്യഞ്ജനവും തന്നു  സഹായിച്ചതിന് പാർവ്വതി മോളെ മഠത്തിലമ്മ ഒരുപാട് തല്ലിയെന്ന്”

അത് കേട്ടിട്ടും ആദിയുടെ മുഖത്ത് യാതൊരു  ഭാവമാറ്റവുമുണ്ടായില്ല.

“അതെന്താ ആഎരണം കെട്ട  തള്ളയ്ക്ക് അരിയോടും പലവ്യഞ്ജനത്തോടും മാത്രേ വെറുപ്പുള്ളോ , ഇതിനു മുൻപ് പശുക്കളെ  കൊണ്ട് തന്നപ്പോൾ ഇല്ലായിരുന്നോ ?” ആദി എല്ലാരും കേൾക്കെ ചോദിച്ചു

“മഠത്തിലമ്മയെ അങ്ങനെ ഒന്നും പറയല്ലേ കുഞ്ഞേ ,,, ” വൈദ്യർ മുത്തശ്ശൻ അവനെ പറഞ്ഞു മനസിലാക്കിക്കാന്‍ ശ്രമിച്ചു.

“അറിവഴകൻ വെറുതെ പ്രായം നോക്കി ആർക്കും ബഹുമാനം കൊടുക്കാറില്ല, അങ്ങനെ നോക്കിയാൽ കടലാമകളെ  ഞാൻ ചിലപ്പോ കുമ്പിട്ടു നമസ്കരിക്കേണ്ടി വരും ,അവര്‍ക്കല്ലേ ആയുസ്സും പ്രായവും കൂടുതല്‍ .. , ആ ചുടലക്കളത്തിലേക്ക് എടുക്കേണ്ട തൈ കിളവിക്ക് എന്തിന്‍റെ  ചൊരുക്കാ ”

അവൻ വെറുപ്പോടെ ചോദിച്ചു

“അറിവഴകാ ,, ഇങ്ങോട്ടു ഭക്ഷണ സാധനങ്ങൾ തന്നത് രാജകൊട്ടാരം അറിഞ്ഞാൽ അവരോടു ചോദിക്കുമെന്ന് ,രാജകൊട്ടാരം മനഃപൂർവ്വം നമുക്കുള്ള റേഷൻ പോലും നിർത്തലാക്കിയിട്ടു അവരുടെ സാമന്തന്മാർ  തന്നെ നമുക്ക് ഭക്ഷണസാധനങ്ങൾ നൽകിയാൽ അതവരുടെ കുടുംബത്തിനു പോലും അപമാനമാണെന്ന്  മഠത്തിലമ്മ പറഞ്ഞു, ആ ദേഷ്യമാണ് അവ്വയാറെ അടിച്ചു തീർത്തത് ”

” ഇങ്ങനെയൊക്കെ ഉള്ള നിയമങ്ങളുള്ള കുടുംബമാണെങ്കിൽ ആ പെണ്ണിന് തരാതേയിരുന്നാൽ പോരായിരുന്നോ ,, കൈയിലെ കാശു മുടക്കി തല്ലു കൊള്ളുന്ന ഓരോരോ പ്രാന്തുകളെ ,,,അല്ലാതെയെന്തു പറയാനാ ,,അതൊക്കെ കണ്ടു പുകഴ്‌ത്താൻ നിങ്ങളോരോരുത്തരും ,, അവ്വയാറ് ,,അവള്ടെ അമ്മേടെ കുവ്വയാറ്”

ആദി അവിടെ നിന്നും തന്‍റെ  വീട്ടിലേക്ക് നടന്നു

<<<<O>>>>