അപരാജിതന്‍ 34 [Harshan] 8110

പണിയെടുത്തു തളർന്നിരുന്ന ആ കുട്ടികൾ ഉച്ചസമയത്തു കങ്കാണികളോട് അല്പം സമയം നമസ്കാരം നിർവ്വഹിക്കുവാനായി അപേക്ഷിച്ചു.

അവർ അനുവാദം കൊടുത്തു.

കുട്ടികൾ അല്പം ആശ്വാസത്തോടെ വേഗം ചെന്ന് ശുദ്ധി വരുത്തി ഒരു തുണി വിരിച്ചു പുറത്തു നിരനിരയായി ഇരുന്നു കൊണ്ട് നമസ്കാരം തുടങ്ങിയപ്പോൾ  അതുവരെ മര്യാദ കാണിച്ചിരുന്ന കങ്കാണികൾ മുളവടികളും കൊണ്ട് വന്നു നമസ്കാര൦ നിർവ്വഹിച്ചു കൊണ്ടിരുന്നു കുട്ടികളുടെ പുറവും ദേഹവും അടിച്ചു പൊളിച്ചു.പല കുട്ടികളും പുറം പൊളിഞ്ഞു നമസ്കാരം നിർവ്വഹിക്കുവാനാകാതെ കുഴഞ്ഞു വീണുപോയിരുന്നു.

അവർ നമസ്കാരം മുടങ്ങിയതിന്‍റെ മനോവേദനയാലും മർദ്ദനമേറ്റതിന്‍റെ  ശാരീരീരിക വേദനയാലും ഖനിപണി തുടർന്നു.

<<<<<O>>>>>

മിഥിലയിൽ

ആദിയുടെ വല്യമ്മ പദ്മാവതി, ശ്രീമന്നാരായാണക്ഷേത്രത്തിൽ ദർശനം ചെയ്യുകയായിരുന്നു.

കൂടെ സപ്പുണ്ണിയും നളിനിയുടെ മകൻ വെങ്കിടിയുമുണ്ടായിരുന്നു.

അവർക്ക് ആദിയുടെ കാര്യത്തിൽ ആകെ മനോവേദനയായിരുന്നു.

അവന്‍റെ എടുത്തുചാട്ട സ്വഭാവം അവനെ ആപത്തുകളിൽ പെടുത്തുമോ എന്ന് അവർക്ക് നല്ലപോലെ ഭയമുണ്ടായിരുന്നു.അന്ന് ഭാർഗ്ഗവരാമ ക്ഷേത്രത്തിൽ ദർശനം നടത്തി അവന്‍റെ പേരിൽ വഴിപാടുകൾ നടത്തിയാണ് അവർ ഈ ക്ഷേത്രത്തിലേക്ക് വന്നത്.

ആദവനാഥ ഗുരുനാഥൻ തീർത്ഥാടനത്തിൽ ആയതിനാൽ അദ്ദേഹത്തിന്‍റെ ശിഷ്യനായിരുന്നു പൂജകർമ്മങ്ങൾ ചെയ്തിരുന്നത്.

അവർക്കുള്ള പ്രസാദവുമായി അദ്ദേഹം പുറത്തേക്ക് വന്നു.

“എവിടെ, ഇല്ലത്തെ ഇളയ സന്തതി , ഇപ്പോൾ കാണുന്നെയില്ലല്ലോ ?”

അദ്ദേഹം തിരക്കി

“എന്താ പറയാ സ്വാമിയാരെ  , അവൻ ഇങ്ങനെ സർക്കീട്ടിലാ, വീട്ടിലിരിക്കുന്നോരെ കുറിച്ച് ഒരു ചിന്തയുമില്ല ” ഉള്ളിലെ വ്യഥ അദ്ദേഹത്തോട് അവർ പങ്കുവെച്ചു.

“ഒന്നും പേടിക്കണ്ട അമ്മെ ,, നാരായണന്‍റെ  അനുഗ്രഹമുള്ള കുട്ടിയാ,, അവൻ രാമൻ തന്നെയാ , എല്ലാം പൂർത്തിയാക്കി വരട്ടെ ,, ” അദ്ദേഹം അവരെ ആശ്വസിപ്പിച്ചു.

പദ്മാവതിയമ്മ കൈ തൊഴുതു.

“അല്ല ,,എന്നാ വിവാഹം തീരുമാനിച്ചിരിക്കുന്നത് ?”

“ഇപ്പോൾ പറഞ്ഞുറപ്പിച്ചിട്ടേയുള്ളൂ, അവന്‍റെ തിരക്ക് കഴിഞ്ഞു വന്നിട്ടു വേണം ആ കാര്യങ്ങൾ കൂടെ വേഗത്തിലാക്കാൻ”

“നന്നായി ,,വളരെ നന്നായി , ഇനി മൂപ്പരും ഇവിടെ കാണുമല്ലോ ”

“അതെ,, അവനെയിനി വിടുന്നില്ല , ഇത്ര കാലവും അന്യനാട്ടിൽ ആരെന്നോ എന്തെന്നോ അറിയാതെ കഴിഞ്ഞു , ഇനി ബാക്കി ജീവിതം ഇവിടെ മതി ”

“അതെ ,, നല്ല കാര്യ൦ . പഠിച്ച പയ്യനാണ് , മാത്രവുമല്ല അവർക്കും അവരുടെ പത്തു തലമുറകൾക്കും സുഖമായി  കഴിയാനുള്ള എല്ലാം ഇല്ലത്തുണ്ട് ,,ഇതാ പ്രസാദം വാങ്ങിക്കൂ ,,പറഞ്ഞ എല്ലാ വഴിപാടുകളും ചെയ്തിട്ടുണ്ട് ”

അദ്ദേഹം പ്രസാദം അവർക്കു നീട്ടി

“ഗുരുനാഥ൪ എന്ന് വരുമെന്ന് വിവരമുണ്ടോ സ്വാമിയാരെ ”

“ഇല്ലില്ല ,, വരാറായി എന്ന് മനസ് പറയുന്നുണ്ട് “പദ്മാവതിയമ്മ അദ്ദേഹത്തിന് ദക്ഷിണനൽകി

ക്ഷേത്രത്തിൽ പ്രദക്ഷിണം ചെയ്ത് അവർ തിരികെ പുറപ്പെട്ടു.