അപരാജിതന്‍ 34 [Harshan] 8110

“അവർ തമ്മിലെന്താണ് എന്ന് അവർക്കുമറിയില്ല , പക്ഷെ അത്ര നല്ല രസത്തിലല്ല , വിവാഹം നിശ്‌ചയിച്ചു വെച്ചതല്ലെ ഇരുവരുടെയും , പക്ഷെ അങ്ങോട്ട് ഒരു വിളിയോ സംസാരമോ ഒന്നുമില്ല , ഇങ്ങനെയാണോ വിവാഹനിശ്‌ചയം കഴിഞ്ഞവർ ”

“താനെന്താ പറയുന്നത് അവർ തമ്മിൽ യാതൊരുവിധ സംസാരവും ഇല്ലെന്നോ ”

“ഇല്ലെടോ ,, ഭാര്യയും മോളും ഇതൊക്കെ തന്നെയാണ് പറയുന്നതും ”

“അങ്ങനെ വരാൻ വഴിയില്ലല്ലോ , അവർ പ്രണയിച്ചു തന്നെയല്ലേ വിവാഹം നിശ്‌ചയിച്ചതും ?”

“അതെ,,അതല്ലേ ഞങ്ങൾക്കും സംശയം ”

“തനിക്കിപ്പോൾ എന്താ വേണ്ടത് ?”

“എടോ , എനിക്കെന്താ വേണ്ടത് എന്ന് തനിക്കറിയാമല്ലോ , പാർവ്വതി ഇളയിടത്തു വലതു കാൽ വെച്ച് വന്നു കയറണം അതിനൊരു തടസവും ഉണ്ടാകരുത് , അതിനിടയിൽ എന്ത് തടസം വന്നാലും അത് അങ്ങോട്ട് തീർക്കണം”

“അതുറപ്പായും വേണം” പട്ടേരി പറഞ്ഞു.

“അപ്പോൾ നമുക്ക് എന്തായിങ്ങനെ ഒരു സംഭവത്തിന് കാരണം എന്ന് കണ്ടുപിടിക്കണമല്ലേ ”

“അതെ പട്ടേരി ,, അത് കൊണ്ടാണ് ഞാൻ തിരക്കിനിടയിലും നേരിട്ട് വന്നത് ”

“താൻ വരൂ ,, പൂജാമുറിയിലേക്ക് ”

പട്ടേരി ഈശ്വരവർമ്മയെ പൂജാമുറിയിലേക്ക് ആനയിച്ചു.

പൂജാമുറിയില്‍

പതിനെട്ടു തിരിയിട്ട വിളക്കിനു മുന്നിലായി പട്ടേരിയിരുന്നു.

മുന്നിലായി ഈശ്വരവർമ്മയും.

പട്ടേരി മന്ത്രങ്ങൾ ജപിച്ചു പ്രാർത്ഥനകൾ ചെയ്തു പരദേവതവിഗ്രഹത്തിനു മുന്നിൽ നിന്നും ഒരു സ്വർണ്ണചെപ്പ് കൈയിൽ എടുത്തു തൊട്ടു വന്ദിച്ചു.

മുന്നിൽ വെച്ചിരുന്ന വെള്ളിതളികയിൽ തീർത്ഥം തളിച്ച് അതിൽ  മഞ്ഞൾപൊടി കൊണ്ട് സ്വസ്തിക വരച്ചു പൂവും  ചന്ദനവും അർപ്പിച്ചതിന് മുകളിൽ ലക്ഷണയുക്തമായ തളിർവെറ്റില വച്ചു തൊഴുതു.

ഗണപതിയേയും സരസ്വതിയെയും പരദേവതയെയും ഏഴുതലമുറ ഗുരുകാരണവന്മാരെയും സ്മരിച്ചു കൊണ്ട് സ്വർണ്ണചെപ്പ് തുറന്നു.അതിലെ കറുത്ത അഞ്ജനം മോതിരവിരൽ കൊണ്ട് തൊട്ടു.

വെറ്റില കൈയിൽ എടുത്തു കൈപ്പത്തിയിൽ വെച്ച് കൊണ്ട് അതിന്‍റെ  മധ്യഭാഗത്ത് വലത്തേക്ക് മോതിരവിരൽ ചുറ്റിച്ചു കൊണ്ട് വൃത്താകൃതിയിൽ അഞ്ജനമെഴുതി.

വെറ്റിലയിൽ നിന്നു ദിവ്യ ചക്ഷു  മന്ത്രമുരുവിട്ട് കൊണ്ട് കണ്ണുകളടച്ചു.

നൂറ്റിഎട്ട് ഉരു മന്ത്രജപ൦ കഴിഞ്ഞു പട്ടേരി ഭക്തിപൂർവ്വം കണ്ണുകൾ തുറന്നു വെറ്റിലയിൽ നോക്കി.

ഈശ്വരവർമ്മ ആകാ൦ക്ഷയോടെ പട്ടേരിയുടെ മുഖത്തേക്ക് നോക്കിയിരുന്നു.

അല്പം കഴിഞ്ഞപ്പോൾ പട്ടേരിയുടെ മുഖം അത്ഭുതം കണ്ടപോലെ നിലയിലായി.

കണ്ണുകൾ കൂടുതൽ മിഴിഞ്ഞു .

അയാൾ കണ്ണുകൾ അടച്ചു വീണ്ടും തുറന്നു.

വീണ്ടും കണ്ട കാഴ്‌ചയിൽ അയാളേറേ ആശങ്കയിലായ പോലെ.

അയാൾ മന്ത്രജപം ചെയ്തു വെറ്റില തളികയിൽ വെച്ച് നമസ്കരിച്ചു.

“എന്താ പട്ടേരി , എന്താ കണ്ടത് ?”

ചോദ്യം കേട്ട് ആശ്ചര്യം നിറഞ്ഞ മുഖത്തോടെ ഈശ്വരവർമ്മയുടെ മുഖത്തേക്കു നോക്കി പട്ടേരിപറഞ്ഞു

“മായ ,,,വിഷ്ണുമായ,,,,,,എല്ലാം മായ ”

“മനസിലായില്ല പട്ടേരി ”