അപരാജിതന്‍ 34 [Harshan] 8114

ആദി ഒന്നും മിണ്ടാതെ ദേഷ്യത്തോടെ അവിടെ നിന്നും വീട്ടിലേക്ക് നടന്നു.

അത്രക്കും കോപം  അവളോട് അവനു തോന്നിയിരുന്നു.

അവൻ പോയി മിണ്ടാതെ ദേഷ്യത്തോടെ ആ തിണ്ണയിൽ ഇരുന്നു.

സ്വയ൦ ഓരോന്നും പിറുപിറുത്ത്കൊണ്ടിരുന്നു.

അവനു പുറകെ കസ്തൂരി അങ്ങോട്ടേക്ക് വന്നു

“കണ്ടില്ലേ ചേച്ചി ,,ഞാനെവിടെ ചെന്നാലും ആ മാരണം കെട്ടവള്  അങ്ങോട്ടേക്ക് വരും ,കൈയിലെ കാശ് മുടക്കി ഈ നാട്ടുകാരെയൊക്കെ അവള് കൈയിലെടുത്തു ,, അവളെയൊക്കെ എന്താ ചെയ്യേണ്ടത് ,, ആ മുത്തശ്ശന്മാർ പോലും ഇപ്പോ ,,അവള് അന്നപൂർണ്ണേച്ചരി ,,,അവ്വയാര്‍,,കുവ്വയാര്‍   ,, ഞാനീ കഷ്ടപ്പെട്ട് കാട്ടികൂട്ടിയതൊക്കെ വെറുതെ ,, “അവന്‍ ദേഷ്യത്തോടെ പറഞ്ഞു.

അതുകേട്ടു കസ്‌തൂരി ചിരിച്ചു

“കുശുമ്പ് തോന്നുന്നുണ്ടല്ലേ അനിയാ ,,,,,”

“എനിക്കാരോടും കുശുമ്പൊന്നുമില്ല ,,ആ പിശാശ് എന്തിനാ ഇവിടെ കേറി നിരങ്ങുന്നത് ”

അവൻ ദേഷ്യത്തോടെ ചോദിച്ചു

അവന്‍റെ  ദേഷ്യം കസ്തൂരിയെ ചിരിപ്പിക്കുകയാണ് ചെയ്തത്

“കടലാസിൽ പാർവ്വതി ശങ്ക൪ എന്ന് മനഃപൂർവ്വം പേര് കൊടുത്തായിരിക്കുമല്ലേ അനിയാ ,,” കസ്തൂരി ചോദിച്ചു

“ആവോ ആർക്കറിയാം ,,ഓരോരോ നാശങ്ങള് കുറ്റീം പറിച്ചു പോന്നോളും ,, ഇപ്പോ അവള് അന്നപൂ,,, കോപ്പ് ,എന്നെ കൊണ്ട് ഒന്നും പറയിക്കണ്ട ,, മുൻപ് ഞാൻ അവിടെ മാടിനെ പോലെ പണിയെടുത്ത് നടന്നപ്പോ എനിക്ക് തിന്നാൻ കിട്ടുന്ന പഴകിയ ചോറിൽ വരെ മണ്ണ് വാരിയിട്ട് എന്നെ പട്ടിണി കിടത്തിയവളാ ,, ഇപ്പോ കണ്ടില്ലേ ,,അവളിപ്പോ ഈ നാടിന് അമ്മയും  അവ്വയാറും അന്നപൂര്‍ണ്ണേശ്വരിയുമായി ,, ഇതൊക്കെ കാണുമ്പോ തിളച്ചു കയറാ ,, ഞാനിവിടെ നിന്നാൽ ശരിയാകില്ല ,,”

ആദി കോപം സഹിക്കാനാകാതെ വാതിലുമടച്ചു നടന്നു

“അനിയാ നില്‍ക്ക് ,, “ എന്നു പറഞ്ഞു കൊണ്ട് അവള്‍ പുറകെ ഓടിയെങ്കിലും അവന്‍ ജീപ്പില്‍ കയറി അതിവേഗം മുന്നോട്ടേക്ക് കുതിച്ചു.

അവർക്കു ഒരുമാസത്തേക്ക് മൃഷ്ടാന്നം കഴിക്കാൻ വേണ്ട  സകല ഭക്ഷണ സാമഗ്രികളും പാർവ്വതി അവർക്കായി കൊടുത്തയച്ചിരുന്നു.

ഗ്രാമീണര്‍ സാധനങ്ങളെല്ലാം ഉള്ളിലേക്ക് എടുത്ത് വെക്കുകയായിരുന്നു.

<<<<O>>>>

 മുത്യാരമ്മയുടെ മാളികയിൽ

ചാരുലത അമ്രപാലിയെ കാണാതെ ആയപ്പോൾ പാതിചാരി കിടന്ന വാതിൽ തുറന്നു കൊണ്ട് ഉള്ളിലേക്ക് പ്രവേശിച്ചു.

അമ്രപാലി എഴുന്നേൽക്കാതെ തലയിണയിൽ താടിയമർത്തി കൈകൾ മുന്നിലേക്ക് കെട്ടി കമഴ്ന്നു കിടക്കുകയായിരുന്നു.

“എഴുന്നേൽക്കുന്നില്ലേ അമിയേച്ചി ,,” എന്ന് ചോദിച്ചു കൊണ്ട് ചാരുലത അമ്രപാലിയുടെ സമീപം വന്നിരുന്നു.എന്നിട്ടു മെല്ലെയവളുടെ തുടയിൽ കൈയമർത്തി തലോടി.

“എന്താ അമിയേച്ചി ,,സുഖോല്ലേ ..?”

മുഖമാകെ ചുവന്നു നിറയുന്ന കണ്ണുകളോടെ അവൾ ചാരുവിനെ നോക്കി.