മാന്ത്രിക ലോകം 1

Author – Cyril

ഹയ് ഫ്രണ്ട്സ്, ഇതൊരു ഫിക്ഷൻ കഥയാണ്. സ്ഥലവും ലോകങ്ങളും എല്ലാം സങ്കല്‍പം മാത്രം. ഇതിൽ ഒരുപാട്‌ തെറ്റുകൾ ഉണ്ടാവും, ചൂണ്ടിക്കാണിക്കാന്‍ മറക്കരുത്. നിങ്ങളുടെ പോസിറ്റിവ് ആന്‍ഡ് നെഗറ്റീവ് അഭിപ്രായങ്ങള്‍ തുറന്നു പറയുക.  എന്നാൽ ഇനി വായിച്ചോളു. 

****************

ഞാൻ ഭീരു ഒന്നും അല്ല… എങ്കിലും ചെറിയ ഭയം കാരണം ഞാൻ നടുങ്ങി.

നിലാ വെളിച്ചം എങ്ങും വ്യാപിച്ചിരുന്നു. പക്ഷേ ആ വെളിച്ചം എന്റെ മുന്നിലുള്ള ഗുഹാമുഖത്തെ തുളച്ച് അകത്ത് പ്രവേശിക്കാന്‍ മാത്രം തയ്യാറായില്ല.

കഴിഞ്ഞ ഒരു മാസമായി ഏതോ ഒരു ശക്തി എന്റെ മനസ്സിനെ ചരടിൽ കെട്ടി ഗുഹയിലേക്ക് വലിക്കുന്നത് എനിക്ക് അനുഭവപ്പെടുന്നുണ്ടായിരുന്നു.

ഗുഹയുടെ കവാടം അര്‍ദ്ധവൃത്താകൃതി രൂപത്തിൽ ആയിരുന്നു. ഗുഹയുടെ അകത്ത് കടന്നാൽ മറ്റൊരു ലോകത്ത് എത്തി പെടാനുള്ള കവാടം ദൃശ്യമാകും.

ഒരു നിമിഷം ഞാൻ അവിടേ മടിച്ചു നിന്നു. പക്ഷേ എന്റെ മനസ്സ് അക്ഷമ പ്രകടിപ്പിച്ചു. എന്തും വരട്ടെ എന്ന് മനസ്സിനെ ധൈര്യപ്പെടുത്തി കൊണ്ട് ഞാൻ മുന്നോട്ട് നീങ്ങി.

വെറും പത്ത് അടി മുന്നോട്ട് വെച്ചതും ഗുഹയ്ക്ക് മുന്നില്‍ ഞാൻ എത്തി കഴിഞ്ഞിരുന്നു. പക്ഷേ ഇപ്പോഴും എന്റെ കാഴ്ചയ്ക്ക് കവാടത്തിലുള്ള ആ ഇരുട്ടിനെ മാത്രം തുളയ്ക്കാൻ കഴിഞ്ഞില്ല. അകത്ത് എന്താണെന്നും കാണാന്‍ കഴിഞ്ഞില്ല.

അസ്വസ്ഥത, ഭയം, പരിഭ്രാന്തി പിന്നെ വേറെയും എന്തെല്ലാമോ എന്റെ മനസ്സിനെ അട്ടിമറിച്ചു.

ഏതോ ഒരു പുതിയ ശക്തി ഗുഹയില്‍ പ്രവേശിക്കുന്നതിൽ നിന്നും എന്നെ പിന്തിരിപ്പിക്കാന്‍ ശ്രമിച്ചു…, പക്ഷേ എന്റെ മനസ്സിൽ അദൃശ്യ ചരടിനൈ കെട്ടിയ ആ ശക്തി എന്നെ ഗുഹയിലേക്ക് വലിച്ചിഴച്ചു.