💞💞അവൾ രാജകുമാരി- 7💞💞 [ ചെകുത്താനെ സ്നേഹിച്ച മാലാഖ ] 611

” അല്ല , മലയാളിയല്ല . ഞാൻ ഈ ദേശക്കാരൻ തന്നെയാ . പക്ഷെ മലയാളം എന്ന ഭാഷ അറിയാം . പിന്നെ ഈ ജന്മത്തിൽ നമ്മൾ തമ്മിൽ കണ്ടിട്ടില്ല …… അങ്ങ് ഇവിടെ എത്തിയതിന് ഒരു ലക്ഷ്യം ഉണ്ട് , കാലം നിയോഗിച്ച ഒരു ലക്ഷ്യം . ഈ കഴുകൻ അങ്ങ് ഇവിടെ എത്തിയതിന് ഒരു സഹായിയായി , അല്ല ഈ കഴുകൻ തന്റെ കടമ നിറവേറ്റി . മ് …. അങ്ങ് ഞാൻ പറഞ്ഞത് പോലെ ചെയ്യു ……. ബാക്കി കാര്യങ്ങൾ വഴിയെ മനസ്സിലാകും . ”

ആ പൂജാരി ദൂരേക്ക് വിരൽ ചൂണ്ടി പറഞ്ഞു . രാഹുലിന് മറുത്ത് ഒന്നും പറയാനോ ചോദിക്കാനോ തോന്നിയില്ല രാഹുൽ അയാൾ വിരൽ ചൂണ്ടിയ ദിശയിലേക്ക് നടന്നു , ഒരുപാട് ചോദ്യങ്ങളും മനസ്സിലേറ്റിക്കൊണ്ട് . അൽപ ദൂരം മുന്നോട്ട് നടന്നതും മുൻപിലൂടെ ഒരു നദി ഒഴുകുന്നതാണ് രാഹുൽ കണ്ടത് . കുറച്ച് മുൻപ് താൻ കണ്ട അതേ നദി . രാഹുൽ തന്റെ വേഷം മാറ്റി ആ മുണ്ട് ഉടുത്ത ശേഷം ആ നദിയിലേക്ക് ഇറങ്ങി . ആ തണുത്ത വെള്ളത്തിൽ മുങ്ങി നിവർന്നപ്പോൾ അവൻ പോലും അറിയാതെ മനസ്സിലെ വലിയ ഒരു ഭാരം നീങ്ങിയത് പോലെയാണ് രാഹുലിന് തോന്നിയത് , ഒപ്പം എവിടുന്നോ മനസ്സിനും ശരീരത്തിനും ശക്തി കിട്ടിയതുപോലെ ഒരു തോന്നലും .

രാഹുൽ ആ ഈറനോടെ തന്നെ ആ മുണ്ട് ധരിച്ച് ആ ക്ഷേത്രം ലക്ഷ്യമാക്കി നടന്നു . അവൻ പോലും അറിയാതെ തന്നെ മറ്റേതോ ഒരു ശക്തി നിയന്ത്രിക്കുന്നതായിയാണ് രാഹുലിന് അപ്പോൾ തോന്നിയത് . മനസ്സിൽ ഉണ്ടാകുന്ന തോന്നലുകൾക്ക് അനുസരിച്ച് അവൻ പ്രവർത്തിച്ചു . ആ ക്ഷേത്രത്തിനുള്ളിലേക്ക് കടന്ന് അവൻ ആ വിഗ്രഹത്തിന് മുന്നിൽ കൈൾകൂപ്പി സ്വയം മറന്ന് നിന്നു .