💞💞അവൾ രാജകുമാരി- 7💞💞 [ ചെകുത്താനെ സ്നേഹിച്ച മാലാഖ ] 611

അതിന് ശേഷം ആ മൺറോഡിന്റെ കുറച്ച് മുൻപിലേക്ക് അത് പറന്ന് പോയി നിലത്തിരുന്ന ശേഷം വീണ്ടും അത് രാഹുലിനെ നോക്കി ശബ്ദം ഉണ്ടാക്കാൻ തുടങ്ങി .

അത് വീണ്ടും എങ്ങോട്ടോ തന്നെ വിളിക്കുന്നതാണ് എന്ന് രാഹുലിന് മനസ്സിലായി . രാഹുൽ വേഗം ജിപ്സിയിൽ കയറി വണ്ടി ആ കഴുകനെ ലക്ഷ്യമാക്കി ആ മൺറോഡിലൂടെ മുൻപോട്ട് ഓടിച്ചു . തന്നെ ലക്ഷ്യമാക്കി രാഹുൽ ജിപ്സി ഓടിച്ച് വരുന്നത് കണ്ട കഴുകൻ സന്തോഷത്തോടെ ശബ്ദിച്ച ശേഷം മുന്നോട്ട് പറന്നു , രാഹുൽ ആ കഴുകന്റെ പുറകേ അതിനെ ലക്ഷ്യമാക്കി ജിപ്സി ഓടിച്ചു .

കുറച്ച് ദൂരം മുന്നോട്ട് പോയതും ആ കഴുകൻ മറ്റൊരു ദിശയിലേക്ക് പറക്കുന്നത് രാഹുൽ കണ്ടു രാഹുൽ ആ ദിശയിലേക്ക് വണ്ടി തിരിച്ചു . അത് മറ്റൊരു ചെറു റോഡായിരുന്നു അതും ആ വരണ്ട പ്രദേശത്തിന് ഉള്ളിലേക്ക് .

കുറച്ച് ദൂരം മുന്നോട്ട് പോയതും ആ ഭൂപ്രകൃതിയിൽ മാറ്റങ്ങൾ ഉള്ളതായി രാഹുൽ കണ്ടു . പച്ചപ്പ് ഉള്ള , മരങ്ങളും മറ്റും ചെറുതായി തിങ്ങി നിറഞ്ഞ സ്ഥലം ….. ആ കാഴ്ച രാഹുലിൽ അൽഭുതമാണ് സൃഷ്ടിച്ചത് .

‘ ഇതെന്താ ഈ പ്രദേശം മാത്രം ഇങ്ങനെ ….. ഈ വരണ്ട പ്രദേശത്തിനുള്ളിൽ പച്ചപ്പ് നിറഞ്ഞ മറ്റൊരു സ്ഥലം . ഇതെന്ത് അൽഭുതമാ…. ? ‘

രാഹുൽ സ്വയം മനസ്സിൽ ചിന്തിച്ചു.

അൽപ ദൂരം ഉള്ളിലേക്ക് രാഹുൽ ജിപ്സി ഓടിച്ചതും ആ കഴുകൻ ദൂരെ ഒരിടത്ത് നിലത്ത് താൻ വരുന്ന ദിശയിലേക്ക് തന്നെ നോക്കി ഇരിക്കുന്നത് കണ്ടു . പക്ഷെ രാഹുലിന്റെ കാഴ്ചയിൽ ആ കഴുകൻ മാത്രമല്ല അതിന്റെ പുറകിലെ ആ ക്ഷേത്രവും ഉണ്ടായിരുന്നു . രാഹുൽ ക്ഷേത്ര ചുറ്റുമതിലിന് പുറത്ത് ജിപ്സി നിർത്തി പുറത്തേക്ക് ഇറങ്ങി .