💘 അരികത്തായാരോ – 7 💘 വിച്ചു [ ചെകുത്താനെ സ്നേഹിച്ച മാലാഖ ] 1836

” വിരലിലെണ്ണാവുന്ന കുറച്ച് മാസങ്ങൾ കൂടി അല്ലേ ….. ”

അഹാന ഒരു പുഞ്ചിരിയോടെ അതും പറഞ്ഞ് ബാഗുമെടുത്ത് റൂമിന് പുറത്തേയ്ക്കിറങ്ങി , അവളുടെ ആ പുഞ്ചിരിയിലും കണ്ണിന്റെ കോണിൽ കണ്ണുനീർ ഒളിഞ്ഞു നിൽപ്പുണ്ടായിരുന്നു ….

                           …………………………

” ഇങ്ങേര് ഇതെന്തോന്ന് വല്ല കല്യാണത്തിനും സദ്യ ഉണ്ണാൻ പോകുന്നുണ്ടോ ? ഇത്ര ദൃതി …. ഇങ്ങേരിക്കിതൊന്ന് നിർത്തി നിർത്തി പറഞ്ഞാലെന്താ …? എഴുതി എടുക്കുന്നവന്റെ കഷ്ടപ്പാട് അയാൾക്കറിയണ്ടല്ലോ …. ഹോ പിന്നേം പോയി … അജു എവിടെയാ എത്തിയേ …. ? ”

ക്ലാസ്സെടുക്കുന്ന പ്രഫസർ വേഗത്തിൽ പറഞ്ഞ് പോകുന്ന നോട്ട് അതേ വേഗത്തിൽ എഴുതാൻ കഴിയാതെ യദു വിഷമത്തോടെ അജുവിനോട് പറഞ്ഞു .. അത് കേട്ടതും അജു ഒന്ന് ചിരിച്ച ശേഷം താനെഴുതുന്ന നോട്ടുബുക്ക് യദുവിന് കൂടി കാണാൻ കഴിയുന്ന വിധത്തിൽ അൽപ്പം നീക്കി വച്ച ശേഷം ബാക്കി എഴുതി തുടങ്ങി … യദുവാകട്ടെ അവന്റെ ബുക്ക് നോക്കി ബാക്കി എഴുതാൻ തുടങ്ങി ….

അൽപ്പ സമയം കഴിഞ്ഞതും .

” ഓ … പിന്നേം പോയി . ഇത് നടപടിയാകുമെന്ന് തോന്നുന്നില്ല . ഇങ്ങേരുടെ സ്പീഡിനൊത്ത് പോകാൻ ഈ ജന്മം എന്നെക്കൊണ്ട് പറ്റുമെന്ന് തോന്നുന്നില്ല …. അജൂ നീ എഴുത് , ഞാൻ വീട്ടിൽ ചെന്നിട്ട് എന്റെ ബുക്കിലേയ്ക്ക് പകർത്തിക്കോളാം …. ”

യദു അതും പറഞ്ഞ് കയ്യൊക്കെ ഒന്ന് നിവർത്തി … കുറേ നേരമായി ഒരേ പോലെ നോക്കി ഇരുന്ന് കഴുത്ത് വേദനിച്ച കാരണം അവൻ കഴുത്തൊന്ന് കറക്കി ചുറ്റം നോക്കി , വേദന മാറാനായി ….