💘 അരികത്തായാരോ – 7 💘 വിച്ചു [ ചെകുത്താനെ സ്നേഹിച്ച മാലാഖ ] 1836

പിറ്റേന്ന് രാവിലെ പതിവ് പോലെ ദേവിക കോളേജിൽ പോകാനായി റെഡിയായി നേരത്തെ തന്നെ അഹാനയുടെ വീട്ടിലെത്തി .

” ബെർത്ത്ഡേക്കാരി എവിടെയാ അങ്കിളേ …. ? ”

സോഫയിലിരുന്ന് പത്രം വായിക്കുകയായിരുന്ന മഹേന്ദ്രനാഥിനോടവൾ ചോദിച്ചു ….

” ആ മോളെത്തിയോ , അവൾ റൂമിലുണ്ട് ചെല്ല് . ”

തൊട്ടടുത്തിരുന്ന ചായക്കപ്പ് കയ്യിലെടുത്തുകൊണ്ടയാൾ പറഞ്ഞു .
അത് കേട്ടതും അവൾ സ്റ്റെപ്പ് കയറി മുകളിലേക്ക് നടന്നു ….

” ഹാപ്പി ബർത്ത്ഡേ അച്ചൂ ….. ”

മുറിയുടെ ഡോറ് തുറന്ന് അകത്ത് കയറിയതും ദേവികയതും പറഞ്ഞ് കണ്ണാടിയുടെ മുൻപിൽ നിന്ന് ഒരുങ്ങുകയായിരുന്ന അഹാനയെ പുറകിലൂടെ ചെന്ന് കെട്ടിപ്പിടിച്ചു …

ദേവികയുടെ ആ വിളി കേട്ടതും പെട്ടെന്ന് അഹാനയുടെ മുഖം സങ്കടം കൊണ്ട് മങ്ങി . അവൾ പതിയെ തിരിഞ്ഞ് ചുവരിലെ ആ ചിത്രത്തിലേയ്ക്ക് നോക്കി നിന്നു ….

” ഒരുപാട് നാളായി ഈ വിളി കേട്ടിട്ട് . പണ്ട് അമ്മ എന്നെ അച്ചൂന്നേ വിളിക്കുമായിരുന്നുള്ളൂ , അമ്മ പോയതോടെ ആ വിളിയും നിന്നു . പിന്നെ നീയും ഇടയ്ക്കെന്നെ ആ പേര് വിളിക്കുമായിരുന്നു , പിന്നീടെപ്പോഴോ അതും ഇല്ലാതെയായി ….. ഞാൻ പോലും മറന്ന് പോയി എനിക്കിങ്ങനെ ഒരു പേരുണ്ടായിരുന്നെന്ന് … ”

സങ്കടം നിറഞ്ഞ സ്വരത്തോടെ അവൾ പറഞ്ഞു .

” നല്ലൊരു ദിവസമായിട്ട് സന്തോഷിക്കേണ്ടതിന് പകരം ഓരോന്ന് പറഞ്ഞ് സങ്കടപ്പെടുകയാ ….. പ്ലസ്ടു സമയത്ത് നിന്റെ സ്വഭാവത്തിലുണ്ടായ പെട്ടെന്നുള്ള ആ മാറ്റം അത് കാരണമാ നിന്റെ ആ പേര് പോലും ഞാൻ എന്നോ
മറന്ന് പോകാൻ കാരണം . എന്ത് പറഞ്ഞാലും ദേഷ്യമായിരുന്നില്ലേ അന്ന് , അതും എന്നോട് പോലും . പക്ഷെ , ഇന്നലെ പെട്ടെന്ന് ആ പേര് എന്റെ ഓർമ്മയിൽ വന്നു …. ”

ദേവിക ഒരു പുഞ്ചിരിയോടെ പറഞ്ഞ ശേഷം ആ ചിത്രത്തിലേയ്ക്ക് നോക്കി നിന്നു ….